Colossians 1

Ilokano (Ti Biblia (1973))

Jump to: Chapter 2 →

1Ni Pablo, apostol ni Cristo Jesus, ken ni cabsat Timoteo gapu iti nakem ti Dios,

2Isuratda cadagiti sasanto ken matalec a cacabsat ken Cristo idiay Colosas: Parabur cadacayo ken talna iti biang iti Dios nga Amatayo.

3Agyamancami iti Dios, nga Ama ni Apotayo a Jesu-Cristo, a cancanayon nga icarcararagandacayo.

4Iti pannacadamagmi iti pammatiyo ken Cristo Jesus, ken ti ayatyo cadagiti isu-amin a sasanto.

5Gapu iti inanama a naidulin cadagiti langlangit a maipaay cadacayo, isu a nangngegyon gapu iti sao ti kinapudno ti evangelio.

6A dimteng cadacayo, a cas met iti isu-amin a lubong adda nga agbungbunga ken dumackel; a cas met cadacayo, nanipud iti aldaw a pannacangngeg ken pannacaammoyo iti parabur ti Dios iti pudno;

7Cas nasursuroyo ken Epafras, ni ay-ayatenmi a cadua iti panagservi, isu cadacayo ti maysa a matalec a ministro ni Cristo.

8Isu imbagana met cadacami ti ayatyo babaen ti Espiritu.

9Gapu itoy, dacami met, nanipud idi aldaw a pannacadamagmi, saancam nga umingga a mangicarcararag ken mangidawdawat cadacayo tapno mapnocayo coma iti pannacaammo iti pagayatanna, iti amin a naespirituan a kinasirib ken pannacaawat,

10A magnacayo a maicari iti Apo, a maipaay iti amin a pacaayaywan, nga agbungacayo iti isu-amin nga aramid a naimbag, ket rumangay cayo iti pannacaammo iti Dios;

11A mapapigsa iti amin a pannacabalin, cas mayannugot iti pannacabalin ti dayagna, a maipaay iti amin a kinaanus ken nabayag a panagitured, a siraragsac;

12A pagyamanan iti ama, a nangaramid cadatayo a maicari a makipagtawid cadagiti sasanto iti lawag;

13Isu a nangluc-at cadatayo iti pannacabalin ti sipnget, ket inyallatiwnatayo iti pagarian ti dungdongoenna nga Anac;

14A kencuana maaddaantayo ti pannacasubbot, ti pannacapacawan dagiti basbasoltayo:

15Isu a ladawan ti Dios a di makita, ti anac nga inauna cadagiti amin a naparsua;

16Ta kencuana naparsua dagiti amin nga adda cadagiti langlangit ken daga, makita ken saan a makita, uray dagiti trono, wenno kinaturay wenno pagturayan, wenno dagiti pannacabalin; dagiti isu-amin naparsuada gapu kencuana ken mapaayda kencuana;

17Ket isu ti umuna cadagiti isu-amin nga adda, ket isu-amin a banbanag addada kencuana.

18Ket isu ti ulo ti bagi, cayatna a sao-en, ti Iglesia, isu ti puon: ti inauna nga anac cadagiti natay; tapno cadagiti isu-amin isu ti catan-ocan.

19Ta macaay-ayo iti Ama a ti amin a pannacapunno agtaeng kencuana;

20Ket gapu kencuana maicappia kencuana met laeng dagiti isu-amin a banbanag, idinto nga inaramidna ti cappia a gapu iti darana iti cruz; gapu kencuana, cunac uray dagiti adda iti rabaw ti daga, uray dagiti adda sadi langit.

21Ket dacayo, idinto a gangannaetcayo idi ken ti nakemyo naibusor, gapu cadagiti dakes nga aramidyo, nupay casta ita pinakicappianacayo.

22Gapu iti natao-an a bagina babaen ti patay, tapno agparangcayo a sasanto ket awan tulawyo ket awan ti pacapilawanyo iti sangoananna:

23No, pudno nga agtalinaedcayo iti pammati, naipasdec ken natibker, ket dicay pacuti iti pananginanama iti evangelio a nangngegyo, a naicascasaba iti amin a parsua iti baba ti langit; a gapu kencuana nagbalinac a ministro, siac ni Pablo.

24Ita agragragsacac cadagiti sagabaec gapu cadacayo, ket tultuluyec ti biangco babaen ti lasagco ti agcurang pay cadagiti sinagaba ni Cristo, gapu iti bagina, nga isu ti Iglesia;

25A gapu kencuana nagbalinac a ministro cas mayannugot iti pannacaaywan nga intalec ti Dios caniac, a maipapan cadacayo, tapno icascasabac a naan-anay ti sao ti Dios,

26Cayatco a sao-en, ti palimed a nailemmeng bayat ti ginasgasut a tao-en ken cadagiti caputotan, ngem ita naiparangarang cadagiti sasantona,

27Isuda a kinayat ti Dios a nangipacaammoan no ania ti kinabacnang ti dayag daytoy a palimed iti tengnga dagiti Gentil, a ti caadda ni Cristo cadacayo isu ti inanama ti gloria:

28Isu nga icascasabami, a bagbagaan ti amin a tao, ken sursuroan ti amin a tao, a babaen ti amin a kinasirib, tapno idatagmi ti isu-amin a tao a nataengandan gapu ken Cristo;

29Ket maipanggep itoy, agaramidac met, a sipipinget cas mayannurot iti bilegna, isu nga agaramid caniac a buyugen ti pannacabalin.

Jump to: Chapter 2 →