Exodus 30

Ilokano (Ti Biblia (1973))

← Chapter 29 Jump to: Chapter 31 →

1Ket mangaramidcanto iti maysa nga altar a pagpuuran iti incienso iti rabawna: iti cayo nga acacia ti aramidem.

2Maysa a sico ti caatiddugnanto, ket maysa a sico ti caacabana; agcuadradonto; ket dua a sico ti catayagnanto: dagiti sarana sangsangcanayondanto iti altar.

3Ket calupcupamto iti bin-ig a balitoc, ti rabawna, ken dagiti bacrangna nga aglawlaw, ken dagiti sarana; ket yaramidamto iti balangat a balitoc iti lawlawna.

4Ket mangaramidcanto cadagiti dua a singsing a balitoc iti babaen ti balangatna; cadagiti dua a paragpagna, cadagiti dua a bacrangna aramidemto dagitoy; ket isudanto ti pagsaadan dagiti pagassiwan a pamaclayan.

5Ket ti cayo nga acacia ti aramidemto nga pagassiwan ket calupcupam ida iti balitoc.

6Ket icabilmonto iti sango ti abbong nga adda iti abay ti lacasa ti pamanecnec, iti sango ti tugaw ti caasi nga adda iti rabaw ti pamanecnec, a pangsaracacto kenca.

7Ket ni Aaron puurannanto iti rabawna ti incienso dagiti nasayamusom nga recrecado: iti tunggal bigat no saganaenna dagiti pagsaingan, puurannanto.

8Ket no ni Aaron seggedanna dagiti pagsaingan iti rumabii, puurannanto, maysa nga incienso a cancanayon iti sango ni Jehova iti bayat dagiti putputotyo.

9Dicayonto mangidaton iti sabali nga incienso iti rabawna uray daton a mapuuran, uray daton a bel-laay; ket dicayto ibuyat iti rabawna ti daton a inumen.

10Ket ni Aaron aramidennanto ti pannacaabbong a maipanggep cadagiti sarana maminsan iti macatawen; aramatennanto ti dara ti daton gapu iti basol ti pannacaabbong maminsan iti macatawen iti panangaramidna iti pacaabbongan iti dayta cadagiti caputotanyo: casantoan unay ken Jehova daytoy.

11Ket ni Jehova nakisao ken Moises a kinunana.

12Intono alaem ti dagup dagiti annac ti Israel, a mayannurot cadagiti mabilang cadacuada, ited ngarud ti tunggal maysa a tao ti maysa a subbot ti cararuana a maipaay ken Jehova, no bilangem ida; tapno awan ti angol cadacuada, no bilangemto ida.

13Daytoy ti iteddanto, tunggal maysa a mapan cadagiti nabilang, guddua ti maysa a siclo cas iti siclo ti santuario: (ti siclo duapulo a geras;) guddua a siclo a pagdaton ken Jehova.

14Tunggal maysa a mapan cadacuada a nabilang, manipud agtawen iti duapulo wenno sumuroc, mangtedto iti daton ken Jehova.

15Dagiti nabacnang didanto mangted iti nasuroc, ket dagiti napanglaw didanto mangted iti nacurcurang ngem ti guddua ti siclo, no mangtedda iti daton ken Jehova, tapno maaramid ti pacaabbongan a maipaay cadagiti cararuayo.

16Ket alaemto ti pirac ti pannacaabbong cadagiti annac ti Israel, ket ikeddengmonto iti pacaaramatan ti tolda ti gimong; tapno isunto ti pacalaglagipan dagiti annac ti Israel ti sango ni Jehova, tapno aramidenda ti pacaabbongan a maipaay cadagiti carcararuayo.

17Ket ni Jehova nakisao ken Moises a kinunana,

18Mangaramidcanto met iti maysa a palangana a suer, ken ti sacana a suer, nga isu ti pagbuggoanto. Ket icabilmonto iti nagbaetan ti tolda ti gimong ken iti altar, ket iccamto iti danumna.

19Ket ni Aaron ken dagiti annacna a lallaki buggoandanto dagiti im-imada ken sacsacada idiay:

20No sumrecda iti tolda ti gimong, agbuggodanto iti danum, tapno dida matay; wenno intono mapanda umasideg nga agannung iti altar tapno puuranda ti maysa a daton a maaramid iti apuy ken Jehova.

21Iti casta buggoandanto dagiti im-imada ken dagiti sacsacada, tapno saanda a matay: ket isu ti alagadendanto nga agnanayon cadacuada, isu man ken dagiti putotna iti bayat dagiti caputotanda.

22Maysapay ni Jehova nakisao ken Moises a kinunana,

23Mangalacanto met iti biangmo cadagiti casayaatan nga recrecado: iti mirra nga agtubbog limagasut a siclo, ken iti canela a nasam-it ti guddua ti mirra, nga isu ti duagasut ket limapulo, ken iti calamo a nabanglo duagasut ket limapulo.

24Ken iti casia limagasut, cas iti siclo ti santuario, ken iti lana ti olivas maysa nga hin;

25Ket aramidemto a maysa a nasantoan a lana a sapsapo, maysa a bangbanglo a maaramid a cas gapuanan ti mangaramid iti bangbanglo: isunto ti nasantoan a lana a sapsapo.

26Ket isu ti pangsapsapomto iti tolda ti gimong, ken ti lacasa ti pamanecnec,

27Ken ti lamisaan ken amin nga ar-aruatna, ken ti candelero ken amin nga ar-aruatna, ken ti altar ti incienso,

28Ken ti altar ti daton a mapuuran agraman amin nga ar-aruatna, ken ti palangana ken ti sacana.

29Ket santificaremto ida, tapno isuda ti casantoanto unay: uray ania a macasagid cadacuada nasantoanto.

30Ket sapsapoamto ni Aaron ken dagiti annacna, ket santificarem ida, tapno agannungda caniac iti akem ti padi.

31Ket ibagamto cadagiti annac ti Israel, a cunam, Daytoy isunto caniac ti lana a nasantoan a sapsapo bayat dagiti caputotanyo.

32Dinto maibuyat iti lasag ti tao dicayo met mangaramidto iti uray ania a capadana, maitucad iti pannacaaramidna: isu nasantoan, ket nasantoanto cadacayo.

33Siasinoman nga mangaramid iti capadpadana; wenno siasinoman a mangicabil iti uray bassit kencuana iti maysa a gangannaet, maipusayto iti ilina.

34Ket ni Jehova nakisao ken Moises, Alaem iti biangmo dagiti nasayamusom nga recrecado, estacte, ken onicha, ken galbanum; nasayamusom nga recrecado agraman bin-ig nga olibanum: iti tunggal maysa agpapadadanto ti timbengna;

35Ket aramidemto nga incienso, maysa a bangbanglo a cas iti gapuanan ti manangaramid iti bangbanglo, a naiccan iti asin, nadalus ken nasantoan:

36Ket mecmekemto a sagbabassit unay ti dadduma kencuana ket mangicabilca iti dayta iti sangoanan ti pamanecnec iti uneg ti tolda ti gimong, isu a pangsaracacto kenca: isunto kenca ti casantoan unay.

37Ket incienso nga aramidenyonto, mayannurot iti panaglalaocna dicayonto mangar-aramid ti maipaay laeng cadacayo: isunto ti nasantoan kenca a maipaay ken Jehova.

38Siasinoman a mangaramidto iti capada daydiay tapno say-upenna, maipusayto iti ilina.

← Chapter 29 Jump to: Chapter 31 →