Hebrews 3

Ilokano (Ti Biblia (1973))

← Chapter 2 Jump to: Chapter 4 →

1Gapuna, cacabsat a sasanto, a mairaman iti pannacaawis a nailangitan, panpanunutenyo ti Apostol ken Cangatoan a Padi ti pammatitayo, nga isu ni Jesus;

2Isu a nagtalcan daydi nangtuding kencuana, a cas met ken Moises iti isu-amin a balayna.

3Ta daydi naibilang a maicari iti dacdackel a dayaw ngem ni Moises, a cas ti nangbangon iti balay, dacdackel ti dayawna ngem iti balay.

4Ta amin a balay adda nangbangon, ngem ti nangbangon cadagiti isu-amin a banbanag isu ti Dios.

5Ket ni Moises kinapudnoanna a napagtalcan idi iti isu-amin a balayna, cas maysa nga adipen a maipaay a pamanecnec cadagidiay banag a maipacaammonto idi;

6Ngem ni Cristo cas maysa nga anac nga agaywan iti balayna; ket datayo ti balayna, no taginayonentayo ti bilegtayo ken ti ragsac ti pananginanamatayo, agingga iti panungpalan.

7Gapuna, castoy ti cuna ti Espiritu Santo: Ita nga aldaw no mangngegyo ti timecna.

8Saanyo a patangkenen degiti puspusoyo a cas idi pannacagargari, Cas idi aldaw ti pannacasulisog, idiay let-ang,

9Idiay a nangsulisoganda caniac dagidi ammayo, gapu ti panangsuutda, Ket nakitada dagiti ar-raramidco iti uppat a pulo a tawen

10Gapuna naglucsawac iti daydi a caputotan, Ket kinunac: Agnanayon a maisiasi ti pusoda: Ket dida naammoan dagiti daldalanco;

11Iti casta insapatac iti lucsawco: Saandanto a sumrec iti paginanaac.

12Kitaenyo ngarud, cacabsat, di la ket ta addanto iti siasinoman cadacayo, ti maysa a puso a dakes a saan a mamati, nga umadayu iti Dios a sibibiag:

13No di ket, agbibinnalacadcayo, iti inaldaw, ita ta nasasao; Itoy nga aldaw: tapno saan a tumangken ti uray siasino cadacayo gapu iti panangallilaw ti basol:

14Ta naaramidtayo a mairaman ken Cristo, no taginayonentayo a sititibker ti pamunganayan ti panagtalectayo agingga iti panungpalan:

15Ita, ta masasao: Ita, no mangngegyo ti timecna, Saanyo a patangkenen dagiti puspusoyo, a cas idi pannacagargari.

16Ta siasinoda dagidi, nga idinto ta nangngegda, ginargarida? Saanda aya nga isu-amin dagidi rimmuar idiay Egipto a nakicuyog ken Moises?

17Ket siasino dagiti naglucsawanna iti uppat a pulo a tawen? Saan aya a dagidi nagbasol, a dagiti bangbangcayda napasagda idiay let-ang?

18Ket siasino dagidi nangisapataanna a didanto sumrec iti paginanaanna no saan a dagiti di nagtulnog?

19Ket makitatayo a dida nabalin ti simrec gapu iti dida panamati.

← Chapter 2 Jump to: Chapter 4 →