Hebrews 6

Ilokano (Ti Biblia (1973))

← Chapter 5 Jump to: Chapter 7 →

1Gapuna, bay-antayon dagiti nagdamdamoan a sursuro ni Cristo, ket agtuloytayo iti naananay a sursurona: a ditay mangicabil manen ti cimiento ti panagbabawi cadagiti ar-aramid a natay, ken ti pammati iti Dios.

2Ti maipapan iti panangisuro cadagiti pammautizar, ti panangipatay cadagiti im-ima, ken ti panagungar dagiti natay ken ti pannacaocom nga agnanayon.

3Ket aramidentayto daytoy, no ipalubos ti Dios.

4Ta saan a mabalin a dagiti nalawagan iti naminsan, ket naramananda ti sagut a nailangitan, ket naaramidda a mairaman iti Espiritu Santo,

5Ket naramananda ti naimbag a sao ti Dios ken dagiti pannacabalin ti biag a mapasungad.

6Ket calpasanna simminada, saan a mabalinen a pabaroen ida iti panagbabawi, idinto nga inlansada manen a maipaay cadacuada ti Anac ti Dios, ket isu imbabainda iti sangoanan dagiti amin a tattao.

7Ta ti daga a nangsagepsep iti tudo a naminadu nga umay kencuana, ket pataudenna dagiti roroot a macaited gungguna cadagidiay pacaigapuan ti pannacamulana awatenna ti bendicion ti Dios:

8Ngem ti mangpataud cadagiti root a nasiit ken calcalunay maumsi ket adda nga asideg iti pannacailunod; ket ti tungpalna isu ti pannacaipuur.

9Ngem, ay-ayatec, namnamaenmi a sitatalged dagiti banbanag a nasaysayaat iti biangyo, ken dagiti banbanag a bumuyog iti pannacaisalacan, uray castoy ti panagsaomi:

10Ta saan a nakil-lo ti Dios, tapno lipatenna ti aramidyo, ken ti ayat nga impakitayo iti naganna, gapu iti panangtulongyo cadagiti sasanto cadagiti pacasapsapulanda, ken iti panangtultulongyo pay ita cadacuada.

11Ket tarigagayanmi a tunggal maysa cadacayo ipakitana coma ti casdi a regta a maipaay iti naan-anay nga inanama agingga iti panungpalan:

12A saancay a nasadut, no di ket tumutulad cadagidiay a gapu iti pammati ken ti kinaanus, tawidenda dagiti carcari.

13Ta idi nagcari ti Dios ken Abraham, gapu ta dina nabalin ti agsapata iti sabali a dacdackel, nagsapata babaen ti kinaisuna met laeng.

14A kinunana: Pudno a bendicionancanto a bendicionan, ket paaduencanto a paaduen.

15Ket iti casta, calpasan ti nabayag a panagananusna, nagunodanna ti cari.

16Ta dagiti tattao agsapatada babaen ti dacdackel; ket no adda panagsusupiat ti sapata isu ti pamanecnec a mangibanag cadacuada.

17Gapuna, idinto a cayat ti Dios nga ipakita a nalawlawag pay cadagiti agtawid iti cari, ti kinatibker ti panggepna imbal-laetna ti maysa a sapata;

18Tapno gapu cadagiti dua a banag a di agbalbaliw, isu a saan a nabalin a pagulbodan ti Dios, adda maysa a napigsa a pagbilgantayo, datayo a nagtalaw tapno agcamangtayo, babaen ti panginanamaan a naicabil iti sangoanantayo:

19Isu nga icutantayo a cas la maysa a sinipete ti cararua, inanama a napaypayso ken natibker, ket sumrec nga agingga iti uneg ti abbong;

20Isu a sinerrecan ni Jesus a cas la umun-una cadatayo gapu cadatayo isu a nagbalin a cangatoan a padi iti agnanayon, cas iti kinapadi ni Melquisedec.

← Chapter 5 Jump to: Chapter 7 →