Joel 3

Ilokano (Ti Biblia (1973))

← Chapter 2 Jump to:

1Ta, adtoy, cadagita nga al-aldaw, ken iti dayta a pannawen a panangbaliwco iti pannacacayaw ti Juda ken ti Jerusalem.

2Tiptiponecto dagiti amin a nacion, ket pasalugecto ida idiay lobong a Josafat; ket idiay aramidecto ti panangocom cadacuada a maipaay iti ilic ken iti pagtawidec nga Israel, isuda a winarawarada cadagiti nasnacion: ket biningbingayda ti dagac,

3Ket naggiginnasangasatanda ti ilic, ket insucatda ti maysa nga ubing a lalaki iti maysa a balangcantis, ket inlacoda ti maysa nga ubing a babai, iti arac, tapno mabalinda ti uminum.

4Wen, ket dacayo aniacayo caniac, O Tiro, ken Sidon, ken amin a beddeng ti Filistia? Supapacandacto aya? Ket no supapacandac, sidadaras ken sipapartacac a mangisubli iti supapacyo iti rabaw dagiti oloyo met laeng.

5Gapu ta innalayo ti piracco ken ti balitocco, ket impanyo cadagiti temployo dagiti napintas ken napateg a gamengco.

6Ket inlacoyo dagiti annac ti Juda ken dagiti annac ti Jerusalem a maipaay cadagiti annac dagiti Griego, tapno mayadayuyo ida iti beddengda;

7Adtoy, itacderconto ida a paruaren iti disso a nangilacoanyo cadacuada, ket isublicto ti supapacyo iti rabaw dagiti oloyo met laeng;

8Ket ilacocto dagiti annacyo a lallaki ken babbai iti ima dagiti annac ni Juda, ket isuda ilacodanto ida cadagiti lallaki a taga Saba, iti maysa a nacion nga adayu; ta sinao ni Jehova.

9Iwarragawagyo daytoy cadagiti nacion; isaganayo ti gubat; riingenyo dagiti maingel a lallaki; amin coma dagiti lallaki ti gubat umasidegda, umayda coma.

10Pitpitenyo dagiti tadem dagiti aradoyo nga aramiden a camcampilan, ken dagiti cumpay a pagputed a gaygayang: dagiti nacapsot cunaenda coma, napigsaac.

11Agdarascayo, ket umaycayo, dacayo amin a nacion iti aglicmut, ket aguurnongcayo: idiay paulogem dagiti mamaingelmo, O Jehova.

12Dagiti nacion agriingda coma, ket sumang-atda idiay lobong a Josafat: ta idiay agtugawacto a mangocom cadagiti amin a nacion iti aglicmut.

13Icabilyo ti cumpay; ta ti apiten natangkenanen: Umaycayo, agpayatpayatcayo; ta iti pagpespesan ti arac napno, dagiti tangke agliplippiasda; ta ti kinadakesda dackel.

14Umariwecwec, umariwecwec a tattao idiay lobong a pangocoman! ta asidegen ti aldaw ni Jehova idiay lobong ti pangocoman.

15Ti init ken ti bulan agcudrepda, ket dagiti bitbitwen ipaidamda ti silengda.

16Ket ni Jehova, agungorto manipud Sion, ket yebcasnanto ti timecna manipud Jerusalem; ket dagiti langlangit ken ti daga agkintayegdanto: ngem ni Jehova isu ti pagcamanganto ti ilina, ken sarikedked cadagiti annac ti Israel.

17Iti casta mabigbigyonto a siac ni Jehova a Diosyo a sitataeng idiay Sion a nasantoan a bantayco: calpasanna ti Jerusalem nasantoanton ket awanton dagiti gangannaet a lumasat kencuana.

18Ket maaramidto iti dayta nga aldaw, a dagiti banbantay pagtedtedendanto ti nasam-it nga arac, ket dagiti turturod pagayusendanto ti gatas, ket amin dagiti wawaig ti Juda agayusdanto cadagiti dandanum; ket rumuarto ti maysa a burayoc iti balay ni Jehova, ken sibugannanto ti lobong ti Sittim.

19Ti Egipto maysanto a langalang, ket ti Edom maysanto a nalangalang a let-ang, maipuon iti ranggas a naaramid cadagiti annac ni Juda, ta imbucbocda ti awan basolna a dara iti dagada.

20Ngem ti Juda agnaedto iti agnanayon, ken ti Jerusalem manipud caputotan agingga iti caputotan.

21Ket dalusacto ti darada, a saanco a dinalusan: ta ni Jehova agnaed idiay Sion.

← Chapter 2 Jump to: