Matthew 1

Ilokano (Ti Biblia (1973))

Jump to: Chapter 2 →

1Capoonan ni Jesu-Cristo, anac ni David, anac ni Abraham.

2Ni Abraham pinutotna ni Isaac; ket ni Isaac pinutotna ni Jacob; ket ni Jacob pinutotna ni Juda ken dagiti cacabsatna;

3Ket ni Juda pinutotna ken Tamar da Fares ken ni Zara; ket ni Fares pinutotna ni Esrom; ket ni Esrom pinutotna ni Aram;

4Ket ni Aram pinutotna ni Aminadab; ket ni Aminadab pinutotna ni Naason; ket ni Naason pinutotna ni Salmon;

5Ket ni Salmon pinutotna ken Rahab ni Booz; ket ni Booz pinutotna ken Rut ni Obed; ket ni Obed pinutotna ni Isai;

6Ket ni Isai pinutotna ni Ari David. Ket ni David pinutotna ni Salomon iti daydi babai, nga asawa idi ni Urias;

7Ket ni Salomon pinutotna ni Roboam; ket ni Roboam pinutotna ni Abias; ket ni Abias pinutotna ni Asa;

8Ket ni Asa pinutotna ni Josafat; ket ni Josafat pinutotna ni Joram; ket ni Joram pinutotna ni Ozias;

9Ket ni Ozias pinutotna ni Joatam; ket ni Joatam pinutotna ni Acaz; ket ni Acaz pinutotna ni Ezequias;

10Ket ni Ezequias pinutotna ni Manases; ket ni Manases pinutotna ni Amon; ket ni Amon pinutotna ni Josias;

11Ket ni Josias pinutotna ni Jeconias ken dagiti cacabsatna, idi pannacaipanda sadi Babilonia.

12Ket idi calpasan ti pannacaipanda sadi Babilonia, ni Jeconias pinutotna ni Salatiel; ket ni Salatiel pinutotna ni Zorobabel;

13Ket ni Zorobabel pinutotna ni Abiud; ket ni Abiud pinutotna ni Eliaquim; ket ni Eliaquim pinutotna ni Azor;

14Ket ni Azor pinutotna ni Sadoc; ket ni Sadoc pinutotna ni Aquim; ket ni Aquim pinutotna ni Eliud;

15Ket ni Eliud pinutotna ni Eleazar; ket ni Eleazar pinutotna ni Matan; ket ni Matan pinutotna ni Jacob;

16Ket ni Jacob pinutotna ni Jose, asawa ni Maria, a nacayanacan ni Jesus a managan ti Cristo.

17Iti casta amin dagiti caputotan a mangrugi ken Abraham agtungpal ken David, sangapuloda ket uppat a caputotan; ket mangrugi ken David agpapan idi pannacaipanda sadi Babilonia, sangapulo ket uppat a caputotan; ket nanipud idi pannacaipanda sadi Babilonia agtungpal ken Cristo, sangapulo ket uppat a caputotan.

18Ngem ti pannacayanac ni Jesu-Cristo castoy: Idi ta nakiasawa ni Maria nga inana ken Jose, ket idi dida pay nagdinna, nasaracan a nagsicug iti aramid ti Espiritu Santo.

19Ni Jose nga asawana, agsipud ta nasingpet ket dina cayat nga ibabain, insicatna a baybay-an iti nalimed.

20Ngem idi ta panpanunutenna daytoy, adtoy, maysa nga angel ti Apo nagparang kencuana iti maysa a tagtagainep, a nagcuna: Jose, anac ni David, dica aduadua nga umawat ken Maria nga asawam; ta ti nabukel kencuana, aramid ti Espiritu Santo.

21Ket aganacto iti maysa a lalaki; ket panaganamto iti Jesus; ta isu isalacannanto ti ilina cadagiti basbasolna.

22Ket amin daytoy, naaramid tapno matungpal ti sinao ti Apo, nga inaramatna di mammadto, a cuncunana:

23Adtoy ti maysa a virgen agsicugto ket aganacto iti maysa a lalaki, Ket panaganandanto iti Emmanuel; a no mayulog cayatna a saoen: Ti Dios adda cadatayo.

24Iti casta ni Jose, idi a nacariing iti turogna, inaramidna cas ti imbilin di angel ti Apo, ket inawatna ni asawana;

25Ket saana a tinignay aginga ti impasngayna ti umuna unay nga anacna a lalaki; ket pinanagananna ti Jesus.

Jump to: Chapter 2 →