Matthew 3

Ilokano (Ti Biblia (1973))

← Chapter 2 Jump to: Chapter 4 →

1Ket cadagiti nga aldaw immay ni Juan a Bautista a nangascasaba iti let-ang ti Judea, a cuncunana:

2Agbabawicayo; ta ti pagarian ti langit asidegen,

3Ta daytoy isu daydi sinao ni mammadto nga Isaias a cuncunana: Timec ti maysa nga agao-awag iti let-ang: Isaganayo ti dalan ti Apo, Palintegenyo dagiti danana.

4Ket ni Juan met laeng adda pagananayna idi a dutdot ti camello, ken maysa a barikes a lalat a nailicmut iti siketna ket ti taraonna idi dagiti dudon ken diro.

5Idin rimmuar a napan kencuana ti taga Jerusalem ken amin a taga Judea ken amin a taga arubayan ti Jordan;

6Ket nabautizaranda kencuana idiay carayan Jordan nga ipudpudnoda dagiti basbasolda.

7Ngem idi nakitana dagiti adu cadagidi Fariseo ken Saduceo nga um-umay iti pammautizarna, kinunana cadacuada: Dacayo caputotan dagiti carasaen. Asino ti namalacad cadacayo a pumanaw iti pungtot nga umayto?

8Agaramidcay ngarud cadagiti bunga a maicari iti panagbabawi;

9Ket dicay panunuten iti unegyo met laeng a cunayo; Adda ni Abraham a pannaca-amami: ta cunac cadacayo a ti Dios mabalinna ti mamangon cadagiti annac ken Abraham uray pay cadagitoy bato.

10Ket itan ti wasay naicabilen iti ramut dagiti caycayo tunggal cayo ngarud a di mangted ti nasayaat a bunga, mapucan ket maisungrod iti apuy.

11Siac kinapudnona, bautizarancayo iti danum a maipaay iti panagbabawi; ngem dayta umay sumaruno caniac adadda ti pannacabalinna ngem siac; dagiti zapatos daytoy saanac a maicari nga agiggem; isu bautizarannacayto iti Espiritu Santo ken apuy.

12Ti paidna adda iti imana ket sapridannanto a nalaing ti pagbayoanna; ket urnungennanto ti trigona iti camaligna, ket puurannanto ti garami iti apuy a di maiddep.

13Idin ni Jesus nanipud Galilea aginga ti Jordan napan ken Juan tapno pabautizaran kencuana.

14Ngem ni Juan cayatna coma idi a tipden a cuncunana: Siac masapulco ti pabautizaran kenca. Ket sica umayca caniac?

15Ngem idi simmungbat ni Jesus, kinunana kencuana: Anamungam ita; ta casta ti maipaay cadatayo a panangtungpal ti amin a kinalinteg. Idin inanamunganna.

16Ket ni Jesus, idi nalpas a nabautizaran, dagus a simmang-at nanipud iti danum; ket adtoy; dagiti langlangit nalucatanda kencuana, ket nakitana ti Espiritu ti Dios a bumabbaba a cas la calapati ket umumay kencuana.

17Ket adtoy ti maysa a timec a nanipud cadagiti langlangit a cuncunana: Daytoy ti Anacco a dungdungngoec, Isu a pacapnecac unay kencuana.

← Chapter 2 Jump to: Chapter 4 →