Micah 1

Ilokano (Ti Biblia (1973))

Jump to: Chapter 2 →

1Ti sao ni Jehova a dimteng ken ni Mikias a Morasti cadagidi al-aldaw da Jotam, Acaz, ken Ezekias, nga ar-ari ti Juda, isu a nakitana a maipapan iti Samaria ken Jerusalem.

2Dumngegcayo, dacayo il-ili, dacayo amin; ipangagmo, O daga, ken amin ti naglas-ud kencuana: ket ni Apo Jehova coma ti sacsi a maibusor cadacayo, ti Apo manipud iti nasantoan a templona.

3Ta, adtoy, ni Jehova agparang manipud iti yanna, ket bumabanto, ket agpayatto cadagiti nangato a disso ti daga.

4Ket dagiti banbantay malunagdanto iti babaenna, ket dagiti lobong marengngatdanto, a cas iti allid iti sango ti apuy, cas dandanum a maibuyat iti maysa a derraas.

5Ta ti salungasing ni Jacob isu ti puon amin daytoy, ken gapu cadagiti basbasol ti balay ti Israel. Ania ti salungasing ni Jacob? saan nga iti Samaria? ket ania dagiti nangato a disdisso ti Juda? saanda aya a ti Jerusalem?

6Gapuna aramidecto ti Samaria a cas maysa a bonton iti talon, ken cas disdisso a pagmulaan cadagiti uvas; ket ibuyatconto dagiti batbatona iti lobong, ket pagparangecto dagiti pamuonna.

7Ket amin dagiti kinitikitan a ladawan kencuana malasanglasangdanto, ket amin dagiti abangna mauramto iti apuy, ket amin dagiti didiosenna racrakecto; ta iti abang ti balangcantis inurnongna ida, ket iti abang ti balangcantis agsublidanto.

8Daytoy ti gapuna nga agunnoyacto ken agdung-awacto; magmagnaac a sioucsub ken silamolamo; aramidecto ti panagdung-aw a cas cadagiti chacal, ken panagunnoy a cas cadagiti avestruz.

9Ta dagiti sugsugatna saanda a maagasan; ta isu dimteng agingga met laeng iti Juda; isu dumanon agingga iti ruangan ti ilic, iti Jerusalem met laeng.

10Dicayo ibaga idiay Gat, saancayo nga agsangit a pulos: idiay Beth-leafra gimmamerac iti tapuc.

11Agpucawca, O agnaed iti Safir, iti kinalamolamo ken bain: ti agnaed iti Saanan saan a rimmuar; ti panagdung-aw ti Beth-esel alaennanto cadacayo ti pagsadaganna.

12Ta ti agnaed ti Marot urayenna a sigagagar unay ti imbag, ta ti dakes bumaba manipud ken Jehova agingga iti ruangan ti Jerusalem.

13Ipacom ti lugan iti napartac a cabayo, O agnaed iti Lakis: isu ti nangrugianan ti basol iti anac a babai ti Sion; ta dagiti salungasing ti Israel nasaracda kenca.

14Gapuna sica ipaaymonto ti maysa a pacalaglagipan a sagut ken Mareset-gat: dagiti balbalay ni Aczib isudanto ti banag a mangallilaw cadagiti ar-ari ti Israel.

15Yegconto pay laeng kenca, O agnaed iti Maresa, daydiay nga agtagicuanto kenca: ti dayag ti Israel dumtengto agingga met laeng iti Adullam.

16Agcalvoca, ken agpukisca a maipuon cadagiti annac ti ragsacmo: palawaem ti calvom a cas iti aguila; ta pinanawandaca ket napanda iti pannacacayaw.

Jump to: Chapter 2 →