Micah 2

Ilokano (Ti Biblia (1973))

← Chapter 1 Jump to: Chapter 3 →

1Asi pay dagiti aggandat iti kinadangkes, ken agaramid iti dakes cadagiti iddada! No iti bigat aglawag, isu ti aramidenda, ta adda iti pannacabalin ti imada.

2Ket agumanda dagiti taltalon, ket agawenda ida; ken dagiti balbalay, ket iccatenda ida: ket irurumenda ti tao ken ti balayna, ti tao met laeng ken ti tawidna.

3Gapuna, castoy ti cuna ni Jehova: Adtoy, gandatec ti maysa a dakes a maibusor ti daytoy a familia, isu a dicayto pacailisian cadagiti teltelyo, ken dicayto met macapagna a sicucuspag; ta pannawen a dakes.

4Iti dayta nga aldaw aramatendanto ti maysa a pangngarig a maibusor cadacayo, ket agsangitda iti nasaem a panagunnoy, ket cunaenda, Nadadaeltayo a naikisap: isu baliwanna ti bingay ti ilic: anian ti panangisinana caniac! cadagiti nasukir bingayenna dagiti taltalonmi.

5Gapuna awanto ti siasinoman a mangipurruac kenca iti singdan iti panaggiginnasat iti gimong ni Jehova.

6Dicayo agipadto, castoy ti panangibagada. Saandanto nga agipadto cadagitoy: pannacaibabain saandanto a pumanaw.

7O sica a managanan balay ni Jacob, bimmassit aya ti Espiritu ni Jehova? isuda dagitoy dagiti ar-aramidna? Saan aya a dagiti sasaoc agaramidda iti imbag iti daydiay magna a sililinteg?

8Ngem itay nabiit ti ilic timmacder a cas maysa a cabusor: dacayo ucsubenyo ti cagay iti pagan-anay cadagiti aglabas a natalged cas cadagiti tattao a madi iti gubat.

9Dagiti babbai ti ilic paruarenyo cadagiti nacaayayo a balbalayda; cadagiti annacda a babassit iccatenyo ti dayagco iti agnanayon.

10Tumacdercayo, ket pumanawcayo; ta daytoy saan nga isu ti paginanaanyo; agsipud iti kinarugit a mangdadael, agraman maysa met laeng a nasaem a pannacarba.

11No ti tao a magmagna iti espiritu ti ulbod agtiri, a cunana, Siac agipadlesacto kenca maipapan iti arac ken naingel nga inumen; isunto met laeng ti mammadto iti daytoy nga ili.

12Di bumurong, O Jacob, a siac urnongencanto amin; di bumurong nga urnongecto ti tidda ti Israel; icabilconto ida a natiptipon a cas la carcarnero ti Bosra, cas maysa a pangen iti nagtengngaan ti pagarabanda; mangaramiddanto iti dackel nga anabaab a gapu iti caadu dagiti tao.

13Napanen ti manglucat iti sangoananda; linucatanda ket nagnada agingga iti ruangan, ket rimmuarda kencuana ket ti arida limmabas iti sangoananda, ket ni Jehova iti unada.

← Chapter 1 Jump to: Chapter 3 →