1 Chronicles 12

Ilokano (Ti Baro a Naimbag a Damag Biblia) 1996

← Chapter 11 Jump to: Chapter 13 →

1Agnaed idi ni David idiay Siklag a nagkamanganna gapu iti panangisiksikat ni Ari Saul kenkuana. Sadiay, adu ti timmipon kenkuana a natenneb ken mapagtalkan a mannakigubat.

2Kamkamengda iti tribu ti Benjamin a nagtaudan ni Saul. Pumapanada. Kabaelanda ti agibiat iti pana ken agpallatibong iti kannawan wenno kannigid nga imada.

3Isuda dagitoy: ni Ahiezer a panguloda ken ni Joas nga annak ni Semaa a taga-Gabaa; Jeziel ken Pelet nga annak ni Asmabet; Beraca ken Jehu a taga-Anatot; Ismaias a taga-Gabaon, maysa a nalatak a mannakigubat ken maysa kadagiti pangulo “Dagiti Tallopulo”; Jeremias, Jaaziel, Johannan ken Jozabad a taga-Gedera; Eluzai, Jerimot, Bealias, Semarias ken Sefatias a taga-Harif; Elcana, Issias, Azarel, Joezer ken Jasobeam iti kapuonan ni Kora; Joela ken Zebadias nga annak ni Jeroham a taga-Gedor.

8Dagitoy dagiti nalatak ken nasanay a soldado iti tribu ti Gad a timmipon kadagiti buyot ni David idi adda iti sarikedkedna iti let-ang. Nalaingda nga agusar iti kalasag ken pika. Nakabutbuteng a kas iti leon ti langada ken nasiglatda a kas iti ugsa iti kabambantayan.

9Kastoy ti panagsasarunoda manipud iti kangatoan a saad: Ezer, Abdias, Eliab, Mismanna, Jeremias, Attai, Eliel, Johanan, Elzabad, Jeremias ken Macbannai.

14Sumagmamano kadagitoy ti nangato nga ofisial a mangipangulo iti 1,000 a mannakigubat. Nababbaba ti dadduma ket idauloanda ti 100 a mannakigubat.

15Iti umuna a bulan iti tawen, idi naglayus ti Karayan Jordan, bimmallasiwda ti karayan ket winarawarada dagiti agnaed kadagiti tantanap, iti daya ken laud ti karayan.

16Iti naminsan, adda bunggoy dagiti lallaki kadagiti tribu ti Benjamin ken Juda a napan ken ni David iti sarikedked.

17Sinabat ida ni David ket kinunana, “No immaykayo a kas gagayyem a tumulong kaniak, siraragsakkami nga umawat kadakayo ditoy. Tumiponkayo kadakami. Ngem no panggepdak a liputan ket yawatdak kadagiti kabusorko, uray no dikay rinanggasan, makitanto ti Dios dagiti kapuonantayo ket dusaennakayo.”

18Maysa kadakuada, ni Amasai, a nagbalin a pangulo “Dagiti Tallopulo,” ti inturayan ti espiritu ti Dios ket kinunana: “O David nga anak ni Jesse, kukuanakami! Agballigika koma ken dagiti tumultulong kenka! Adda ti Dios a katulongam!” Inawat ida ni David ket pinagbalinna ida nga ofisiales iti armadana.

19Adda sumagmamano a mannakigubat iti tribu ti Manases a timmipon ken ni David idi nakikadua kadagiti Filisteo a napan nanggubat ken ni Ari Saul. Kinaagpaysona, dina tinulongan dagiti Filisteo gapu ta nagbuteng dagiti arida amangan no liputanna ida ket parmeken ida ni Saul a sigud nga apona. Iti kasta, pinapanawda.

20Dagitoy dagiti mannakigubat a taga-Manases a timmipon ken ni David idi napan idiay Siklag: Adna, Jozabad, Jediael, Micael, Jozabad, Elihu ken Zilletai. Idiay Manases, impanguloanda dagiti bunggoy dagiti rinibu a soldado.

21Nagserbida ken ni David a kas ofisiales ti armadana gapu ta mamaingelda amin a mannakigubat. Kalpasanna, nagbalinda nga ofisialesna iti armada ti Israel.

22Nagistayan inaldaw nga adda tumipon iti bunggoy ni David ket immadu ti bilang dagiti mannakigubat iti bunggoyna.

23Idi adda ni David idiay Hebron, adu a nasanay a mannakigubat ti timmipon iti armadana tapno tumulongda iti pannakaisaadna nga ari a sukat ni Saul, kas inkari ni Yahweh. Daytoy ti bilangda: Juda: 6,800 a mannakigubat nga addaan kadagiti kalasag ken pika; Simeon: 7,100 a nasanay a mannakigubat; Levi: 4,600 a soldado; dagiti pasurot ni Jehoyada a kaputotan ni Aaron: 3,700 a mannakigubat; dagiti kakabagian ni Zadok, maysa nga agtutubo ken nalaing a makigubat: 22 a nalatak a mannakigubat; Benjamin (iti tribu ni Saul): 3,000 a mannakigubat (kaaduanna kadagiti tattao ti Benjamin ti nagtalinaed a napudno ken ni Saul); Efraim: 20,800 a mannakigubat a nalatak iti kapuonanda; Akinlaud a Manases: 18,000 a napili a lallaki a mangisaad ken ni David a kas ari; Issacar: 200 a papangulo, agraman dagiti tattao nga ipanguloanda (dagitoy a panglakayen ti makaammo iti rumbeng nga aramiden ti Israel ken ti maitutop a tiempo a pannakaaramidna); Zebulon: 50,000 a napudno ken mapagtalkan a tattao a sisasagana a makigubat. Nasanayda nga agusar iti amin a kita ti igam; Neftali: 1,000 a papangulo agraman 37,000 a mannakigubat a sikakalasag ken sipipika; Dan: 28,600 a nasanay a mannakigubat; Aser: 40,000 a mannakigubat a sisasagana a makigubat; Dagiti tribu iti daya ti Jordan—Ruben, Gad ken Akindaya a Manases; 120,000 a mannakigubat a nasanay nga agusar iti amin a kita ti igam.

24Napan amin dagitoy a mannakigubat idiay Hebron. Nakasaganada a makigubat ket sidadaanda a mangisaad ken ni David nga ari iti entero nga Israel. Maymaysa ti panggep dagiti amin nga Israelita a mangisaad kenkuana nga ari.

25Tallo nga aldawda sadiay a kadua ni David a nagkakaan ken nagiinum iti insagana dagiti kailianda.

26Uray dagiti kaadaywan a tribu iti amianan, dagiti tribu da Issacar, Zebulon, ken Neftali, nangyegda kadagiti asno, kamelio, mulo ken baka a nagkarga iti taraon—arina, igos, pasas, arak ken lana ti olibo. Nagitugotda met kadagiti baka ken karnero a partien ken sidaenda. Amin dagitoy ipakitana ti ragsak ti entero a pagilian.

← Chapter 11 Jump to: Chapter 13 →