1 Chronicles 5

Ilokano (Ti Baro a Naimbag a Damag Biblia) 1996

← Chapter 4 Jump to: Chapter 6 →

1Dagitoy dagiti kaputotan ni Ruben, ti inauna kadagiti lallaki nga annak ni Jacob. (Gapu ta kinaiddana ti maysa kadagiti assawa ni amana, napukawna dagiti kalinteganna nga inauna, ket naited dagitoy a kalintegan ken ni Jose.

2Ngem ti tribu ti Juda ti nagbalin a kapigsaan, ket isu ti nagtaudan ti mangituray kadagiti amin a tribu.)

3Uppat dagiti lallaki nga annak ni Ruben nga inauna nga anak ni Jacob: Hanoc, Pallu, Hezron ken Carmi.

4Dagitoy dagiti agsasaruno a kaputotan manipud ken ni Joel: Semaias, Gog, Simei, Mica, Reayas, Baal ken Beera. Tiniliw ni Tiglat Pileser nga emperador ti Asiria ni Beera a pangulo ti tribu ket intugotna a kas balud.

7Iti libro a pakasaritaan ti familia, nailanad dagiti pangulo ti familia iti tribu ni Ruben: Jeyel, Zacarias;

8Bela, nga anak ni Azaz ken apoko ni Sema iti kapuonan ni Joel. Nagnaed daytoy a familia idiay Aroer ken iti masakupan manipud amianan agingga idiay Nebo ken Baal Meon.

9Adu ti arbanda a baka iti Galaad; iti kasta, sinakupda ti daga agingga iti let-ang iti daya a dumanon iti Karayan Eufrates.

10Idi tiempo ni Ari Saulo, rinaut ti tribu ti Ruben dagiti Hagarita; pinapatayda ida ket sinakupda ti dagada iti akindaya a paset ti Galaad.

11Nagnaed ti tribu ti Gad idiay Basan iti amianan ti pagnanaedan ti tribu ti Ruben agingga idiay Saleca iti daya.

12Idiay Basan, ni Joel ti nangipasdek iti kalatakan a familia ket ni Safam ti nangipasdek iti maikadua a kalatakan. Da Janai ken Safat ti nangipasdek kadagiti dadduma a familia.

13Kamkameng ti dadduma a miembro ti tribu dagitoy pito a familia: Micael, Mesullam, Seba, Jorai, Jacan, Zia ken Eber.

14Kaputotan ida ni Abihail nga anak ni Huri a nagtaud kadagitoy a kapuonan: Abihail, Huri, Jaroa, Galaad, Micael, Jesisai, Jado, Buz.

15Ni Ahi nga anak ni Abdiel ken apoko ni Guni ti pangulo dagitoy a familia.

16Nagnaedda iti sakup ti Basan ken Galaad, kadagiti il-ili sadiay, ken iti amin a daga a pagpastoran idiay Saron. (

17Naurnos dagitoy a pakasaritaan idi tiempo da Ari Jotam iti Juda ken Ari Jeroboam iti Israel.)

18Adda 44,760 a mannakigubat iti tribu ti Ruben, Gad ken ti Akindaya a Manases. Nasanayda nga agiggem iti kalasag, kampilan ken pana.

19Ginubatda dagiti tribu ti Hagar nga agnanaed idiay Jetur, Nafis ken Nodab.

20Nagtalekda iti Dios ket nagkararagda kenkuana tapno tulonganna ida. Impangag ti Dios ida ket pinagballigina ida kadagiti tribu ti Hagar ken dagiti kakaduada.

21Limapulo ribu a kamelio, 250,000 a karnero ken 2,000 nga asno ti sinamsamda kadagiti kabusorda. Intalawda a kas balud ti 100,000 a mannakigubat.

22Adu ti pinapatayda kadagiti kabusor agsipud ta pagayatan ti Dios ti pannakigubatda. Nagnaedda iti dayta a lugar agingga iti tiempo ti pannakapagtalaw.

23Immadu unay dagiti tattao iti Akindaya a Manases. Nagnaedda iti sakup ti Basan agingga iti Baal Hermon, Senir ken Bantay Hermon iti amianan.

24Dagitoy dagiti pangulo ti familia: Efer, Isi, Eliel, Azriel, Jeremias, Hodavia ken Jadiel. Maingelda amin a soldado, ket nalatakda a papangulo dagiti familiada.

25Ngem saan a napudno dagiti tattao iti Dios. Tinallikudanda ti Dios dagiti kapuonanda ket nagdaydayawda kadagiti didiosen dagiti tattao a pinapanaw ti Dios iti dayta a daga.

26Iti kasta, sinugsogan ti Dios ni Pul nga emperador ti Asiria (agnagan pay iti Tiglat Pileser) tapno rautenna ti dagada. Pinagtalawna dagiti tribu ti Ruben, Gad ken ti Akindaya a Manases—ket pinagnaedna ida nga agnanayon idiay Hala, Habor, Hara ken iti asideg ti Karayan Gozan.

← Chapter 4 Jump to: Chapter 6 →