2 Kings 15

Ilokano (Ti Baro a Naimbag a Damag Biblia) 1996

← Chapter 14 Jump to: Chapter 16 →

1Iti maika-27 a tawen a panagturay ni Jeroboam II nga ari ti Israel, naisaad ni Uzzias nga anak ni Amazias a kas ari ti Juda.

2Sangapulo ket innem ti tawen ni Uzzias idi maisaad nga ari ket nagturay idiay Jerusalem iti 52 a tawen. Ni Jecolias a taga-Jerusalem ti inana.

3Nalinteg ti inaramid ni Uzzias iti imatang ni Yahweh a kas iti daydi Amazias nga amana.

4Ngem saan a nadadael dagiti lugar a pagdaydayawan dagiti pagano. Intultuloy dagiti tattao ti nagidatag kadagiti daton ken nagpuor kadagiti insenso kadagita a lugar.

5Dinusa ni Yahweh ni Uzzias. Nagkukutel ti ari ket saan a naimbagan agingga iti ipapatayna. Nagnaed nga is-isuna iti naiputputong a balay. Naikkat kenkuana ti pagrebbenganna a kas ari ket ni Jotam nga anakna ti nangituray iti pagilian.

6Nailanad iti Pakasaritaan dagiti Ari ti Juda ti dadduma a pasamak iti panagturay ni Uzzias.

7Idi natay, naitabon iti pagitantaneman kadagiti ari idiay Siudad ni David. Ni Jotam nga anakna ti simmukat kenkuana nga ari.

8Iti maika-38 a tawen a panagturay ni Uzzias nga ari ti Juda, naisaad ni Zacarias nga anak ni Jeroboam II a kas ari ti Israel. Innem a bulan a nagturay idiay Samaria.

9Kas kadagiti sinarunona, nagbasol met ken ni Yahweh. Tinuladna dagiti dakes nga aramid ni Ari Jeroboam nga anak ni Nebat a nangisungsong kadagiti Israelita nga agbasol.

10Insikat ni Sallum nga anak ni Jabes ni Ari Zacarias, ket pinatayna ti ari idiay Ibleam. Isu ti simmukat kenkuana a kas ari.

11Nailanad iti Pakasaritaan dagiti Ari ti Israel ti dadduma a pasamak iti panagturay ni Zacarias.

12Natungpal ngarud ti kari ni Yahweh ken ni Ari Jehu: “Agarinto iti Israel dagiti kaputotam agingga iti maikapat a kaputotan.”

13Iti maika-39 a tawen a panagturay ni Uzzias nga ari ti Juda, naisaad ni Sallum nga anak ni Jabes a kas ari ti Israel. Makabulan a nagturay idiay Samaria.

14Manipud Tirza, napan idiay Samaria ni Menahem nga anak ni Gadi. Pinapatayna ni Sallum, ket isu ti simmukat kenkuana nga ari.

15Nailanad iti Pakasaritaan dagiti Ari ti Israel ti dadduma a pasamak iti panagturay ni Sallum, agraman ti pakasaritaan ti panangisikatna iti ari.

16Idi aggapu ni Menahem idiay Tirza, dinadaelna a namimpinsan ti siudad ti Tappua ken ti kabangibangna. Pinapatayna dagiti agnanaed sadiay agsipud ta dida inlukat ti ruangan ti siudad kenkuana. Binutiakanna pay dagiti amin a masikog a babbai.

17Iti maika-39 a tawen a panagturay ni Uzzias nga ari ti Juda, naisaad ni Menahem nga anak ni Gadi a kas ari ti Israel ket 10 a tawen a nagturay idiay Samaria.

18Nagbasol ken ni Yahweh, ta agingga iti ipapatayna, tinuladna dagiti dakes nga aramid ni Ari Jeroboam nga anak ni Nebat a nangisungsong kadagiti Israelita nga agbasol.

19Iti dayta a tiempo, rinaut ni Tiglat Pileser nga emperador ti Asiria ti Israel. Inikkan ni Menahem iti 38 a tonelada a pirak tapno tumulong ni Tiglat Pileser kenkuana iti pannakapabileg ti panangiturayna iti pagarian.

20Innala ni Menahem ti kuarta kadagiti babaknang iti Israel babaen iti panangpilitna a mangted ti tunggal maysa kadakuada iti 50 a bagi ti pirak. Iti kasta, nagsubli ni Tiglat Pileser iti pagilianna.

21Nailanad iti Pakasaritaan dagiti Ari ti Israel ti amin nga inaramid ni Menahem.

22Natay ket naitabon. Ni anakna a Pekaias ti simmukat kenkuana nga ari.

23Iti maika-50 a tawen a panagturay ni Uzzias nga ari ti Juda, naisaad ni Pekaias nga anak ni Menahem a kas ari ti Israel. Nagturay ni Pekaias idiay Samaria iti dua a tawen.

24Nagbasol ken ni Yahweh. Tinuladna dagiti dakes nga aramid ni Ari Jeroboam nga anak ni Nebat a nangisungsong iti Israel nga agbasol.

25Maysa nga ofisial ti armada ni Pekaias agraman 50 a lallaki a taga-Galaad ti nangisikat iti ari. Isu ni Peka nga anak ni Remalias. Pinapatayda ni Pekaias iti akin-uneg a sarikedked iti palasio ket ni Peka ti simmukat kenkuana nga ari.

26Nailanad iti Pakasaritaan dagiti Ari ti Israel ti dadduma a pasamak iti panagturay ni Pekaias.

27Iti maika-52 a tawen a panagturay ni Uzzias nga ari ti Juda, naisaad ni Peka nga anak ni Remalias a kas ari iti Israel ket nagturay idiay Samaria iti 20 a tawen.

28Nagbasol ken ni Yahweh. Tinuladna dagiti dakes nga aramid ni Ari Jeroboam nga anak ni Nebat a nangisungsong iti Israel nga agbasol.

29Bayat ti panagturay ni Peka, sinakup ni Tiglat Pileser nga emperador ti Asiria dagiti siudad ti Aion, Abel Bet Maaka, Janoa, Kedes, Hasor, ken dagiti daga ti Galaad, Galilea ken Neftali. Innalana dagiti tattao ket impanna ida a kas balud idiay Asiria.

30Iti maika-20 a tawen a panagturay ni Jotam nga anak ni Uzzias a kas ari ti Juda, insikat ni Oseas nga anak ni Ela ni Ari Peka. Pinapatayna ni Peka ket isu ti simmukat kenkuana nga ari.

31Nailanad iti Pakasaritaan dagiti Ari ti Israel ti dadduma a pasamak iti panagturay ni Peka.

32Iti maikadua a tawen a panagturay ni Peka nga anak ni Remalias a kas ari ti Israel, naisaad ni Jotam nga anak ni Uzzias a kas ari ti Juda.

33Duapulo ket lima ti tawen ni Jotam idi agari ket nagturay idiay Jerusalem iti 16 a tawen. Ni Jerusa nga anak ni Zadok ti inana.

34Naragsakan ni Yahweh iti inar-aramid ni Jotam. Tinuladna ngamin ni Uzzias nga amana.

35Ngem saan a nadadael dagiti lugar a pagdaydayawan dagiti pagano. Intultuloy dagiti tattao ti nagidatag kadagiti sakrifisio ken nagpuor iti insenso kadagita a lugar. Ni Jotam ti nangbangon iti Akin-amianan a Ruangan ti Templo.

36Nailanad iti Pakasaritaan dagiti Ari ti Juda ti dadduma a pasamak iti panagturay ni Jotam.

37Kadagidi nga aldaw a panagturay ni Jotam, imbaon ni Yahweh ni Resin nga ari ti Siria ken ni Peka nga ari ti Israel a mangraut iti Juda.

38Idi natay, naitabon kadagiti pagitaneman kadagiti ari iti Siudad ni David. Ni Ahaz nga anakna ti simmukat kenkuana nga ari.

← Chapter 14 Jump to: Chapter 16 →