2 Kings 20

Ilokano (Ti Baro a Naimbag a Damag Biblia) 1996

← Chapter 19 Jump to: Chapter 21 →

1Kadagita a tiempo, nagsakit ni Ari Hezekias ket nagistayan natay. Napan sinarungkaran ni profeta Isaias nga anak ni Amoz ket imbagana kenkuana, “Kuna ti Apo a bilinemon dagiti mapanawam ta saanka a maimbaganen. Agsaganaka a matay.”

2Simmango ni Hezekias iti diding ket inkararagna:

3“Laglagipem, O Apo, a nagserbiak kenka a sipupudno ken iti amin a pusok ket kanayon nga ikagumaak nga aramiden ti pagayatam.” Nagsangit ni Hezekias iti nasaem.

4Pimmanaw ni Isaias ngem dina pay nalasat ti akintengnga a paraangan ti palasio idi ibaga kenkuana ni Yahweh

5nga agsubli iti ari a mangituray kadagiti tattao ni Yahweh, ket ibagana kenkuana, “Siak, ni Yahweh a Dios ni David a kapuonam, nangngegko ti kararagmo ket nakitak dagiti luam. Paimbagenka ket tallo nga aldaw manipud ita, inka iti Templo.

6Agpaut pay ti biagmo iti 15 a tawen. Isalakanka ken daytoy a siudad a Jerusalem iti pannakabalin ti emperador ti Asiria. Salaknibak daytoy a siudad gapu iti dayawko ken gapu iti inkarik iti daydi David nga adipenko.”

7Nagpaala ni Isaias iti namekmek nga igos a maitapal iti letteg ti ari tapno umimbag.

8Sinaludsod ni Ari Hezekias, “Ania ti pakakitaan a paimbagennak ti Apo ket makapanak iti Templo kalpasan ti tallo nga aldaw?”

9Insungbat ni Isaias, “Ikkannaka ti Apo iti pagilasinan. Ania ti kaykayatmo, bumaba ti anniniwan iti agdan iti sangapulo a tukad wenno ngumato iti sangapulo a tukad?”

10Kinuna ni Hezekias, “Nalaka a bumaba ti anniniwan iti sangapulo a tukad! Pagpangatoem iti sangapulo a tukad.”

11Nagkararag ni Isaias ken ni Yahweh ket ngimmato iti sangapulo a tukad ti anniniwan iti agdan nga inaramid ni Ari Ahaz.

12Iti dayta a tiempo, nadamag ni Merodak Baladan nga ari ti Babilonia ken anak ni Baladan a nagsakit ni Ari Hezekias. Nangibaon ngarud kadagiti pannakabagina a sumarungkar kenkuana. Pinakuyoganna ida iti surat ken sagut.

13Siaayat ni Hezekias a nangawat kadagiti naibaon. Impakitana kadakuada ti kinabaknangna—ti pirak ken balitokna, dagiti rekado ken bangbanglo ken amin nga armasna a pakigubat. Impakitana amin a linaon dagiti pagiduldulinanna. Awan met lugar iti pagarianna a dina impakita kadakuada.

14Napan ni profeta Isaias ken ni Ari Hezekias ket sinaludsodna, “Naggapuan dagitoy a lallaki ken ania ti imbagada kenka?” “Naggapuda iti adayo a pagilian, idiay Babilonia,” insungbat ni Hezekias.

15“Ania ti nakitada iti palasio?” “Nakitada amin. Awan ti saanko nga impakita kadakuada nga adda kadagiti pagiduldulinan.”

16Ket imbaga ni Isaias iti ari, “Kuna ti Apo a Mannakabalin-amin

17nga addanto tiempo a maipan idiay Babilonia ti amin nga adda iti palasiom, amin nga indulin dagidi kapuonam agpapan ita. Awanto a pulos ti mabati.

18Maitalawto met ti sumagmamano kadagiti annakmo; agbalindanto nga eunoko nga agserbi iti palasio ti ari ti Babilonia.”

19Impagarup ni Ari Hezekias a kaipapanan daytoy ti kaadda ti kappia ken talged bayat ti panagbiagna ket insungbatna, “Nasayaat ti imbagam a mensahe ti Apo.”

20Nailanad iti Pakasaritaan dagiti Ari ti Juda ti dadduma a pasamak iti panagturay ni Ari Hezekias, dagiti aramid a mangipakita iti kinamaingelna ken ti pakasaritaan ti panangaramidna iti maysa a tangke ti danum ken ti panangkalina iti maysa nga usok a pagayusan iti danum a mapan iti siudad.

21Natay ni Hezekias ket ni Manases nga anakna ti simmukat kenkuana nga ari.

← Chapter 19 Jump to: Chapter 21 →