Amos 1

Ilokano (Ti Baro a Naimbag a Damag Biblia) 1996

Jump to: Chapter 2 →

1Dagitoy dagiti sao ni Amos a maysa nga agpaspastor iti ili ti Tekoa. Impaltiing ti Dios kenkuana dagitoy a banag maipapan iti Israel dua a tawen sakbay daydi ginggined. Ni Uzzias idi ti ari ti Juda ket ni Jeroboam nga anak ni Joas ti ari ti Israel.

2Kinuna ni Amos, “Agungor ti Apo idiay Sion, ket gumluong ti timekna idiay Jerusalem. Gapu iti daytoy, agtikag dagiti pagpastoran ken aglaylay dagiti ruot ti Bantay Carmel.”

3Kuna ni Yahweh, “Kanayon nga agbasol dagiti taga-Damasco, isu nga awan duadua a dusaekto ida. Nakabutbuteng a kinaranggas ti impalak-amda kadagiti taga-Galaad.

4Ngarud, mangidissuorakto iti apuy iti palasio ti Siria ket puorakto agingga a dumapu dagiti sarikedked ni Ari Benhadad.

5Lasanglasangekto dagiti ruangan ti siudad ti Damasco. Pukawekto dagiti agnanaed iti Tanap ti Aven ken ti pangulo ti Beteden. Maitalawto dagiti tattao ti Siria ket maipanda a kas balud iti daga ti Kir.”

6Kuna ni Yahweh, “Kanayon nga agbasol dagiti taga-Gaza, isu nga awan duadua a dusaekto ida. Impanawda ti amin nga umili iti maysa a pagilian ket inlakoda ida a kas tagabu kadagiti taga-Edom.

7Ngarud, mangidissuorakto iti apuy kadagiti bakud ti Gaza tapno mapuoran agingga a dumapu dagiti sarikedked ti siudad.

8Italawkonto dagiti agtuturay iti siudad ti Asdod ken iti siudad ti Askelon. Dusaekto ti siudad ti Ekron, ket matayto dagiti amin a natda kadagiti Filisteo.”

9Kuna ni Yahweh, “Kanayon nga agbasol dagiti taga-Tiro, isu nga awan duadua a dusaekto ida. Impanawda ti amin nga umili iti maysa a pagilian ket inyawatda ida kadagiti taga-Edom. Sinalungasingda ti tulag ti pannakigayyem.

10Ngarud, mangidissuorak iti apuy kadagiti bakud ti Tiro tapno mapuoran agingga a dumapu dagiti sarikedkedna.”

11Kuna ni Yahweh, “Kanayon nga agbasol dagiti taga-Edom, isu nga awan duadua a dusaekto ida. Kinamatkamatda dagiti kakabsatda nga Israelita, ket pulos a dida nangngaasi. Awan patingga ti pungtotda ket pulos a dida pinagbaaw.

12Ngarud, mangidissuorak iti apuy iti siudad ti Teman tapno mapuoran agingga a dumapu dagiti sarikedked ti Bosra.”

13Kuna ni Yahweh, “Kanayon nga agbasol dagiti taga-Ammon, isu nga awan duadua a dusaekto ida. Iti pannakigubgubatda tapno makagun-odda iti nalawlawa a daga, binutiakanda dagiti masikog a babbai iti Galaad.

14Mangidissuorakto ngarud iti apuy kadagiti bakud ti Rabba tapno mapuoran agingga a dumapu dagiti sarikedkedna. Iti dayta nga aldaw, addanto ikkis iti paggugubatan. Nadawelto ti gubat a kas iti napigsa a bagio.

15Maitalawto ti ari ken dagiti ofisialesna ket maipanda iti sabali a daga.”

Jump to: Chapter 2 →