Ezekiel 37

Ilokano (Ti Baro a Naimbag a Damag Biblia) 1996

← Chapter 36 Jump to: Chapter 38 →

1Nariknak ti pannakabalin ti Apo, ket impannak ti espirituna iti maysa a tanap a nasaknapan kadagiti tulang.

2Insursornak iti tanap ket naimatangak ti nakaad-adu a nagango a tulang.

3Kinunana kaniak, “Anak ti tao, agbiag kadi manen dagitoy a tulang?” “Apo a Dios, sika laeng ti makaammo iti dayta,” insungbatko.

4Kinunana, “Agipadtoka kadagitoy a tulang. Ibagam kadagitoy nagango a tulang a denggenda ti sao ni Yahweh.

5Ibagam kadakuada a siak nga Apo a Dios, kastoy ti kunak, ‘Ikkankayo iti anges ket agbiagkayo manen.

6Ikkankayo iti pennet ken piskel ket bungonenkayo iti kudil. Ikkankayo iti anges ket pagbiagenkayo. Iti kasta, maammoanyo a siak ni Yahweh.’”

7Isut' gapuna a nagipadtoak kas naibilin kaniak. Bayat ti panagsaok, nakangngegak iti karatakat, ket nagsusuop dagiti tulang.

8Nakitak a timmaud dagiti pennet ken piskel ket nabungonda iti kudil, ngem awan anges dagiti bagida.

9Kinuna ti Dios kaniak, “Anak ti tao, agipadtoka iti angin. Ibagam iti angin a siak nga Apo a Dios ibilinko kenkuana nga umay manipud iti nadumaduma a suli ket angsanna dagitoy a bangkay tapno agbiagda manen.”

10Nagipadtoak ngarud a kas naibilin kaniak. Naikkan dagiti bangkay iti anges, nagbiagda ket timmakderda. Maysa nga armada ti kaaduda.

11Kinuna ti Dios kaniak, “Anak ti tao, mayarig dagiti Israelita kadagitoy a tulang. Kunada a namagaanda, awan ti namnamada ket awan ti naraniag a masakbayanda.

12Agipadtoka ngarud kadagiti tattaok nga Israelita; ibagam kadakuada a siak nga Apo a Dios, luktakto dagiti nakaitanemanda. Iruarkonto ida ket isublikto ida iti daga ti Israel.

13Inton luktak dagiti tanem dagiti tattaok ket iruarko ida, maammoandanto a siak ni Yahweh.

14Angsakto ida ket agbiagdanto. Palubosakto ida nga agnaed iti bukodda a daga. Iti kasta, maammoandanto a siak ni Yahweh. Inkarik nga aramidek daytoy ket tungpalek. Siak, ni Yahweh, ti nangibaga iti daytoy.”

15Nagsao manen ti Apo kaniak.

16Kinunana, “Anak ti tao, mangalaka iti kayo samo isurat: ‘Ti pagarian ti Juda.’ Mangalaka pay iti maysa a kayo samo suratan iti kastoy: ‘Ti pagarian ti Israel.’

17Pagtiponem nga iggaman ida tapno agparangda a kasla maymaysa a kayo.

18Saludsodento kenka dagiti kailiam ti kaipapanan daytoy.

19Ibagam kadakuada a siak nga Apo a Dios, alaekto ti kayo a mangibagi iti Israel, ket itiponkonto iti kayo a mangibagi iti Juda. Pagmaymaysaekto ida nga iggaman.

20“Iggamam dagiti dua a kayo, ket ipakitam ida kadagiti tattao.

21Kalpasanna, ibagam kadakuada, a siak nga Apo a Dios, iruarkonto dagiti tattaok kadagiti nasion a napananda; ummongekto ida ket isublik ida iti bukodda a daga.

22Pagmaymaysaekto ida a kas maysa a nasion iti daga, kadagiti bantay ti Israel. Maymaysanton ti ari a mangituray kadakuada ta didanton mabingay iti dua a pagarian.

23Didanton tulawan dagiti bagida babaen kadagiti makarimon a didiosen wenno mulitan dagiti bagida iti basol. Ispalekto ida iti amin a kita ti panagbasol ken panangliputda kaniak. Dalusakto ida; isudanto dagiti tattaok ket siakto ti Diosda.

24Ninto adipenko a David ti arida. Agmaymaysadanto iti babaen ti maysa a mangituray ket tungpalendanto a sipapasnek dagiti lintegko.

25Agnaeddanto iti daga nga intedko ken ni adipenko a Jacob, iti daga a nagnaedan dagiti kapuonanda. Agnaeddanto sadiay iti agnanayon, kasta met dagiti annakda ken dagiti kaputotanda. Ninto David nga adipenko ti mangituray kadakuada iti agnanayon.

26Mangaramidak iti tulag a mangted iti talged ti panagbiagda iti agnanayon. Paaduekto ti bilang dagiti tattao ket bangonekto ti templok iti dagada a pagyananna iti agnanayon.

27Sadiay, makipagnaedakto kadakuada. Siakto ti Diosda ket isudanto dagiti tattaok.

28Inton bangonek ti templok sadiay tapno addaak kadakuada iti agnanayon, maammoanto dagiti nasion, a siak, ni Yahweh, ti namagbalin kadagiti Israelita a kukuak.”

← Chapter 36 Jump to: Chapter 38 →