Ezekiel 46

Ilokano (Ti Baro a Naimbag a Damag Biblia) 1996

← Chapter 45 Jump to: Chapter 47 →

1Kuna ti Apo a Dios, “Bayat ti innem nga aldaw a panagtrabaho, agtalinaed a siririkep ti akindaya a ruangan nga agturong iti akin-uneg a paraangan, ngem maluktan iti Aldaw a Panaginana ken iti Fiesta ti Lutuad.

2Magna ti agturay iti akinruar a paraangan ket sumrek iti dakkel a kuarto iti pagserkan ket agtakder iti abay ti adigi ti ruangan bayat ti panangpuor dagiti papadi kadagiti datonna a mapuoran a sibubukel ken dagiti datonna a pakikappia. Agdaydayaw sadiay ruangan sa met la rummuar. Masapul nga agtalinaed a silulukat ti ruangan agingga iti sumipnget.

3Iti tunggal Aldaw a Panaginana ken iti tunggal Fiesta ti Lutuad, masapul nga agrukbab met dagiti amin a tattao ken ni Yahweh iti sango ti ruangan.

4Iti Aldaw a Panaginana, masapul a mangidatag ti prinsipe iti innem nga urbon ti karnero ken maysa a kalakian a karnero a pasig nga awan pakapilawanna a mapuoran a maidaton ken ni Yahweh.

5Pakuyoganna ti tunggal kalakian a karnero iti kagudua salup a daton a makan, ket iti tunggal urbon ti karnero, yegna ti aniaman a kayatna nga ited. Iti tunggal kagudua a salup a daton a makan, pakuyoganna iti tallo nga apagkapat ti galon a lana ti olibo.

6Iti Fiesta ti Lutuad, mangidatag iti bumaro a baka, innem nga urbon ti karnero ken maysa a kalakian a karnero a pasig nga awan ti pakapilawanda.

7Pakuyoganna iti kagudua ti salup a daton a makan ti tunggal toro a baka ken tunggal kalakian a karnero ket iti tunggal urbon ti karnero, aniaman a kayat nga ited ti prinsipe. Tallo nga apagkapat a galon ti lana ti olibo ti maipakuyog iti tunggal kagudua ti salup a daton a makan.

8Masapul a rummuar ti agturay iti dakkel a kuarto iti pagserkan ket rummuar iti dalan a sinerkanna.

9“No umay agdaydayaw dagiti tattao ken ni Yahweh iti uray ania a fiesta a sumrek iti akin-amianan a ruangan masapul a rummuarda iti akin-abagatan kalpasan ti panagdaydayawda. Dagiti sumrek iti akin-abagatan a ruangan masapul a rummuarda iti akin-amianan. Awan ti rummuar iti simrekanna no di ket rummuar iti bangir a ruangan.

10Sumrek ti prinsipe no sumrek dagiti tattao ket rummuar met no rummuarda.

11Kadagiti aldaw ti fiesta ken kadagiti naituding a fiesta, mapakuyogan ti tunggal toro a baka wenno kalakian a karnero iti kagudua a salup a daton a makan. Ipakuyog ti siasinoman nga agdaydayaw ti kayatna nga ited iti tunggal urbon ti karnero. Tallo nga apagkapat ti galon a lana ti olibo ti maipakuyog iti kagudua ti salup a daton a makan.

12“No tarigagayan ti prinsipe ti mangidatag ken ni Yahweh iti daton nga agtaud iti bukodna a nakem, daton man a mapuoran a sibubukel wenno daton a pakikappia, maluktanto kenkuana ti akindaya a ruangan nga agturong iti akin-uneg a paraangan. Idatagna ti daton a kas iti panagidatagna iti Aldaw a Panaginana ket masapul a marikpan ti ruangan kalpasan ti ipapanawna.”

13Kuna ti Apo, “Tunggal bigat, maisagana ti maysa a karnero nga agtawen iti maysa nga awan depektona tapno mapuoran a sibubukel a kas daton ken ni Yahweh. Inaldaw a maidatag daytoy a daton.

14Binigat met a maidatag ti lima a libra nga arina. Mapakuyogan daytoy iti apagkapat ti galon a lana ti olibo a maigamay iti arina. Maannurot iti agnanayon daytoy nga alagaden iti panagidatag iti daton ken ni Yahweh.

15Binigat a maidatag ken ni Yahweh ti urbon a karnero, arina ken lana ti olibo iti agnanayon.”

16Ibilin ti Apo a Dios, “No isagut ti prinsipe a madama nga agturay ti paset ti dagana iti maysa kadagiti annakna, kukuanto ti anakna a kas paset ti sanikua ti familiana.

17Ngem no ited ti agturay ti aniaman a dagana iti maysa kadagiti agserserbi kenkuana, kukuanto manen ti agturay inton dumteng ti tawen ti pannakawayawaya. Kukuana ti daga ket isu ken dagiti annakna laeng ti mangtagikua iti agnanayon.

18Saan a maipalubos nga alaen ti agturay ti aniaman a sanikua dagiti tattao. Ti laeng bukodna a daga ti mabalinna nga ited kadagiti annakna tapno maliklikan ti pannakaagaw ti daga ti siasinoman kadagiti tattaok.”

19Impannak ti lalaki iti pagserkan dagiti kuarto iti asideg ti ruangan iti akin-abagatan a paset ti akin-uneg a paraangan. Dagitoy dagiti nasagradoan a kuarto dagiti papadi. Intudona ti maysa a lugar iti akinlaud a paset dagiti kuarto,

20ket kinunana, “Daytoy ti lugar a pagangeran dagiti papadi iti karne a daton a pakapakawanan ti basol wenno iti daton gapu iti basol ken ti pakalutoan ti daton a makan. Maaramid daytoy tapno awan ti nasantoan a mairuar iti akinruar a paraangan a pakaigapuan ti pannakaakar dagiti tattao.”

21Kalpasanna, inturongnak ti lalaki iti akinruar a paraangan ket impakitana nga adda babbabassit a paraangan iti tunggal lugar kadagiti uppat a suli. Innem a pulo ket uppat a kadapan ti kaatiddog ken 50 a kadapan ti kaakabana.

23Nakabite ti aglikmut iti tunggal paraangan. Adda paginudoan a naikamang kadagiti bakud ti tunggal paraangan.

24Kinunana kaniak, “Dagitoy dagiti kosina a pagpuoran dagiti katulongan nga agserserbi iti Templo kadagiti daton dagiti tattao.”

← Chapter 45 Jump to: Chapter 47 →