Hosea 11

Ilokano (Ti Baro a Naimbag a Damag Biblia) 1996

← Chapter 10 Jump to: Chapter 12 →

1Kuna ti Apo, “Inayatko ti Israel idi ubing pay. Inayabak ti anakko manipud Egipto.

2No tunggal ayabak ida, umadayoda kaniak. Nagidatagda kadagiti daton. Datonda kadagiti didiosen a Baal. Nagpupuorda iti insenso para kadagiti imahen.

3Siak ti nangisuro iti Israel a magna; inub-ubbak dagiti tattaok kadagiti takkiagko. Ngem dida bigbigen a siak ti nangtaripato kadakuada.

4Indalanko ida babaen iti panangipateg ken panagayat. Inubbak ida nga inyasideg iti pingpingko. Nagrukobak a mangpakan kadakuada.

5“Dida kayat ti agsubli kaniak, isu a masapul nga agsublida iti Egipto ket iturayanto ida ti Asiria.

6Addanto gubat nga agdakiwas kadagiti siudadda, ket marpuogto dagiti sarikedkedda. Madadaelto dagiti tattaok gapu ta sinurotda ti ammoda a nasayaat.

7Ipapilitda ti panangtallikudda kaniak. Umasugdanto gapu iti sangol nga awitda, ngem awanto ti makaisalakan kadakuada.

8“Israel, kasano nga isinaka? Kasano a baybay-anka? Kasano a dadaelenka a kas iti Adma? Kasano a pagbalinenka a kas iti Zeboim? Diak maaramid daytoy, ta timmaud ti panangngaasik.

9Dikanto dusaen gapu iti pungtotko. Diakton dadaelen ti Israel. Diosak ngamin, ket saanak a tao. Siak ti Nasantoan nga adda kadakayo. Saanak nga umay a sipupungtot kadakayo.

10“Surotendakto dagiti tattaok inton ngerngerak a kas iti leon dagiti kabusorda. Agdardarasto nga umay kaniak dagiti tattaok manipud laud.

11Manipud Egipto, kasdanto la tumatayab nga agpigpigerger nga umay. Manipud Asiria, kasdanto la kalapati a sumangpet. Agnaeddanto manen kadagiti balbalayda. Siak, ni Yahweh, ti nangibaga iti daytoy.”

12Kuna ti Apo, “Linawlawnak ti Israel iti kinaulbod ken kinamanangallilaw. Suksukirendak pay laeng dagiti tattao ti Juda, siak a Dios a napudno ken nasantoan.

← Chapter 10 Jump to: Chapter 12 →