Hosea 13

Ilokano (Ti Baro a Naimbag a Damag Biblia) 1996

← Chapter 12 Jump to: Chapter 14 →

1Iti napalabas, no agsao idi ti tribu ti Efraim, agpigerger dagiti dadduma a tribu ti Israel. Ngem nagbasol dagiti tattao gapu iti panagdaydayawda ken ni didiosen a Baal ket daytoy ti gapuna a mataydanto.

2Ita, ad-adda manen ti panagbasolda babaen iti panagaramidda kadagiti imahen a pagdaydayawanda—dagiti didiosen a pirak, a partuat ti isip ken aramid ti tao. Ket kunada, “Dagitoy ti pagidatonanyo!” Agkan dagiti tattao dagitoy a didiosen a sinan-urbon a baka.

3Ngarud, mayarigdanto iti angep iti bigat, kas iti linnaaw a mabiit nga agpukaw. Arigdanto iti taep a maipalais iti pagirikan, kas asuk a rummuar iti simborio.

4Kuna ni Yahweh, “Siak, ni Yahweh a Diosyo, a nangiruar kadakayo idiay Egipto. Awan ti Diosyo no di la siak. Siak laeng ti mangisalakan kadakayo.

5Inaywanankayo idi addakayo iti namaga ken natikag a daga.

6Ngem idi simrekkayo iti nasayaat a daga, timmangsitkayo ket nalipatandakon.

7Ngarud, darupenkayo a kas iti leon. Arigko ti leopardo nga agur-uray kadakayo iti igid ti dalan.

8Darupenkayto a kas iti ina nga oso a naitalaw dagiti urbonna, ket burayrayankayto. Kaslaakto la leon a mangalun-on kadakayo iti ayanyo. Wen, kaslaakto la atap nga ayup a mangrangrangkay kadakayo.

9“Tattao ti Israel, no dadaelenkayo, siasinonto ti umay tumulong kadakayo?

10Nagkiddawkayo a maikkankayo iti ari ken papangulo, ngem kasano a maisalakanda ti pagilian?

11Iti pungtotko, inikkankayo kadagiti ari, ket iti ungetko, innalak met laeng ida.

12“Nailista ti basol ken kinadakes ti Israel ket naidulin dagiti listaan nga awan pakaan-anoanda.

13Adda gundaway ti Israel nga agbiag ngem saanna nga alaen ti gundaway gapu iti nakaro a kinamaagna. Arigna iti ubing a dumtengen ti pannakaipasngayna, ngem dina kayat ti rummuar iti aanakan.

14Diak ispalen dagitoy a tattao manipud iti lubong dagiti natay wenno isalakan ida manipud iti bileg ni Patay? O Patay, yegmo dagiti angolmo! Lubong dagiti natay, yegmo ti panniludmo! Saankon a kaasian dagitoy a tattao.

15Uray no lumangto ti Israel a kas iti ruot, yegkonto ti angin nga aggapu iti daya iti let-ang tapno pagmagaenna dagiti ubbog ken dagiti burayokna. Italawnanto amin a napateg a gamengna.

16Masapul a madusa ti Israel gapu iti panangsukirna kaniak. Mapapatayto dagiti tattaona iti gubat. Marumrumekto dagiti maladaga, ket maburayrayanto dagiti babbai a masikog.”

← Chapter 12 Jump to: Chapter 14 →