1 John 2

Mien Bible (Thai Script) © Thailand Bible Society, 2007

← Chapter 1 Jump to: Chapter 3 →

1เยีย เญย ฝุเจว๊ย อ้า! เยีย ฮนั้ง น้าย นอ เฟี้ย ปุน เม่ย บัว เหว่ย ปุน เม่ย บัว ไม้ ป์าม ฒุ์ย. สี ก๊อง หาย เต้า ป์าม ฒุ์ย นอ, บัว ม่าย เต้า เถง บัว โท้ หฒั่ง เตี๋ย, เซ แป้ง ฟิม เญย วั้ว เต้า, เยซู กีตู่.

2กีตู่ เซี้ย นิ่น กั้น เญย แหม่ง ไต่ เหว่ย ฟิ บัว เญย ฒุ์ย. หย่า ไม้ ตาน บัว เญย ฒุ์ย ฮนั้ง, หย่า เหว่ย ลู่ง เดี๊ย เมี่ยน เญย ฒุ์ย.

3สี ก๊อง บัว เอย เจี๊ยน ทิน-ฮู่ง เญย หลี่ง โหฒว, บัว ฯฒฯ ฮิ้ว ตุ๊ ตี่ง บัว หฒะเก้ง ฮิ้ว ทิน-ฮู่ง.

4หาย เต้า ก๊อง นิ่น ฮิ้ว ตุ๊ ทิน-ฮู่ง หย่า ไม้ เอย เจี๊ยน ทิน-ฮู่ง เญย หลี่ง โหฒว, วั้ว เต้า ขูง ก๊อง-แปะ ฮนั้ง. เฒียน เล์ย ไม้ เยียม นิ่น เญย เฮญี้ยว อ๊ะ.

5หาย เต้า เอย เจี๊ยน ทิน-ฮู่ง เญย หว่า โหฒว, วั้ว เต้า หฒะเก้ง ฮนั้ม ทิน-ฮู่ง เถา ต้าว อ๊ะ. ฮนั้ง หน่าย, บัว ฯฒฯ ฮิ้ว ตุ๊ บัว เหธา ทิน-ฮู่ง จวั่ง แหม่ง เฒี่ยง.

6หาย เต้า ก๊อง นิ่น เหธา ทิน-ฮู่ง จวั่ง แหม่ง เฒี่ยง, เยซู ฮนั้ง หาย นอ โหฒว, วั้ว เต้า หย่า อ๋อย หฒุ ฮนั้ง วั้ว นอ โหฒว.

7ฮนั้ม เญย ก๋อ-โย์ว อ้า! เยีย ไม้ เฒ์ย เฟี้ย ติ้ว เซียง-หลี่ง บั๋ว เม่ย บัว. เยีย เฟี้ย เญย เซ โล์-หลี่ง, ต้ง ฒิ่น ด่าง เยียม กอน วั้ว เม่ย บัว มต้าย ม่าย เญย. น้าย ติ้ว โล์-หลี่ง เซ เม่ย บัว ไฮ์ เจี๋ย เญย หว่า.

8มป่า เยีย เฟี้ย ติ้ว เซียง-หลี่ง ปุน เม่ย บัว. น้าย ติ้ว เซียง-หลี่ง เยียม กีตู่ หย่า เยียม เม่ย บัว ปิ๋ว เม่ง เซ เฒียน เญย, เหว่ย หฒุ หฮมวัง เจี๋ย เจี๊ยน มี่ง, เฒียน ฌัง ธ้วด ต้าย ฒู้ง หฒิว เจี๊ยน อ๊ะ.

9หาย เต้า ก๊อง นิ่น เยียม ฌัง มป่า ฑอง นิ่น เญย ก๋อ-โย์ว, วั้ว เต้า หธ่อ เยียม หฮมวัง กะญั์ว.

10หาย เต้า ฮนั้ม นิ่น เญย ก๋อ-โย์ว ฯฒฯ เยียม ฌัง กะญั์ว. นิ่น หย่า ไม้ ม่าย หาย หญู่ง ดั๊ว หาย เต้า ป์าม ฒุ์ย.

11หาย เต้า ไม้ ฮนั้ม นิ่น เญย ก๋อ-โย์ว, วั้ว เต้า เยียม หฮมวัง กะญั์ว. นิ่น เซ ฮนั้ง ยั่ง หฮมวัง เญย ต๋อง นอ, ไม้ ฮิ้ว ตุ๊ นิ่น มี่ง หาย, เหว่ย หฒุ หฮมวัง ปุน นิ่น เญย มฒีง ฮนั้ง แม่ง นอ.

12ฝุเจว๊ย อ้า! เยีย เฟี้ย เฝียน ปุน เม่ย บัว เหว่ย หฒุ เม่ย บัว เหว่ย กีตู่ ตุ๊ กวั่ง ลิ์ว เม่ย บัว เญย ฒุ์ย.

13โหฒว เตีย เญย หฒวัง เมี่ยน อ้า! เยีย เฟี้ย เฝียน ปุน เม่ย บัว เหว่ย หฒุ เม่ย บัว ฮิ้ว ตุ๊ ไม้ แก้ง เหฒย ลู่ง เหฒย เดา เยียม เญย วั้ว เต้า. เม่ย บัว เมี่ยน หลุน เมี่ยน อ้า! เยีย เฟี้ย เฝียน ปุน เม่ย บัว เหว่ย หฒุ เม่ย บัว ฮี่ง เจี๋ย ฮยวัง เอ๊าะ วั้ว เต้า หมี่ อ๊ะ. ฝุเจว๊ย อ้า! เยีย เฟี้ย เฝียน ปุน เม่ย บัว เหว่ย หฒุ เม่ย บัว ฮิ้ว ตุ๊ หฒั่ง เตี๋ย.

14โหฒว เตีย เญย หฒวัง เมี่ยน อ้า! เยีย เฟี้ย เฝียน ปุน เม่ย บัว เหว่ย หฒุ เม่ย บัว ฮิ้ว ตุ๊ ไม้ แก้ง เหฒย ลู่ง เหฒย เดา ฒู้ง เยียม เญย วั้ว เต้า. เมี่ยน หลุน เมี่ยน อ้า! เยีย เฟี้ย เฝียน ปุน เม่ย บัว เหว่ย หฒุ เม่ย บัว เฮ้น. ทิน-ฮู่ง เญย หว่า หย่า เยียม เม่ย บัว เญย เฮญี้ยว. เม่ย บัว หย่า ฮี่ง เจี๋ย ฮยวัง เอ๊าะ วั้ว เต้า หมี่ อ๊ะ.

15ไม้ ตู๋ง ฮนั้ม ป้าม เกน ไฟ ฮนั้ม ป้าม เกน เญย กะน้าย. หาย เต้า ฮนั้ม ป้าม เกน, วั้ว เต้า ไม้ ม่าย เฮญี้ยว ฮนั้ม หฒั่ง เตี๋ย.

16เหว่ย หฒุ เหยียด ฒู้ง เยียม ป้าม เกน เญย กะน้าย เซ ป้าม เมี่ยน หั่น เญย, มฒีง ปวัด ฯฒฯ เหมว่ย เจี๊ยะ เญย, เหธา เมี่ยน เธง-โฮล, โหฒว เหมา เญย สี่. น้าย เต๋ย เหยียด ฒู้ง เซ เยียม ป้าม เกน ธ้วด ต้าย เญย, ไม้ เฒ์ย เยียม หฒั่ง เตี๋ย ต้าย.

17ป้าม เกน เหธา เยียม ป้าม เกน หยัวะ เมี่ยน เญย กะน้าย เจี๋ย เจี๊ยน มี่ง อ๊ะ. มป่า หาย เต้า เอย เจี๊ยน ทิน-ฮู่ง เญย เอ๋ย โหฒว, วั้ว เต้า ฯฒฯ ตุ๊ เหยียด ลิ์ว เฒี่ยง เจี๊ยน.

18ฝุเจว๊ย อ้า! ฆะฮ้า ลาย เญย เฒี่ยง โห่ เถา อ๊ะ. เม่ย บัว ไฮ์ ก๊อง เจี๋ย, ต้ง เหธา กีตู่ โหฒว วิน-วั้ง วั้ว เต้า อ๋อย ต้าย. อี้ หฒั่น ม่าย กีตู่ เญย วิน-วั้ง ต้าย ธั้ม ไห่. บัว ฯฒฯ ฮิ้ว ตุ๊ ฆะฮ้า ลาย เญย เฒี่ยง โห่ เถา อ๊ะ.

19น้าย เต๋ย วิน-วั้ง เยียม บัว ธ้วด มี่ง มป่า นิ่น บัว ไม้ หฒะเก้ง เป๋น บัว เญย เมี่ยน. สี ก๊อง นิ่น บัว หฒะเก้ง บัว เญย เมี่ยน, นิ่น บัว หธ่อ เหธา บัว เยียม. มป่า นิ่น บัว ธ้วด มี่ง ฯฒฯ ปุน ธีง นิ่น บัว ไม้ ม่าย เหยียด เต้า เฒ์ย บัว เญย เมี่ยน.

20มป่า กีตู่ เหธย สีง ลี่ง ปุน เม่ย บัว, เม่ย บัว เหยียด ฒู้ง ฯฒฯ ฮิ้ว ตุ๊ เฒียน เล์ย อ๊ะ.

21เยีย เฟี้ย เฝียน ปุน เม่ย บัว ไม้ เฒ์ย เหว่ย เม่ย บัว ไม้ ฮิ้ว ตุ๊ เฒียน เล์ย. เยีย เฟี้ย เญย เซ เหว่ย เม่ย บัว ฮิ้ว ตุ๊ เฒียน เล์ย เญย. หย่า ฮิ้ว ตุ๊ ก๊อง-แปะ เญย สี่ ไม้ ไฮ่ เยียม เฒียน เล์ย ธ้วด ต้าย.

22วั้ว หญู่ง, หาย เต้า ก๊อง-แปะ? เซ ต้ง ไม้ เหญี่ยม เยซู โหฒว กีตู่ วั้ว เต้า. วั้ว เต้า โหฒว กีตู่ เญย วิน-วั้ง, หลาย นิ่น ไม้ เหญี่ยม หฒั่ง เตี๋ย หย่า ไม้ เหญี่ยม หฒั่ง เตี๋ย เญย ตอน.

23หาย เต้า ไม้ เหญี่ยม ตอน, วั้ว เต้า หย่า ไม้ ม่าย หฒั่ง เตี๋ย. หาย เต้า เหญี่ยม ตอน, วั้ว เต้า หย่า ม่าย หฒั่ง เตี๋ย.

24เม่ย บัว เยียม กอน ไฮ์ เจี๋ย เญย หว่า อ๋อย หฒุ ฒ่าง เจี๊ยน เฮญี้ยว. ฮนั้ง หน่าย, เม่ย บัว ฯฒฯ ตุ๊ เหยียด ลิ์ว เหธา หฒั่ง เตี๋ย หย่า เหธา นิ่น เญย ตอน จวั่ง แหม่ง เฒี่ยง.

25น้าย เซ กีตู่ กั้น แล์ง เญย แหง่ง หว่า. นิ่น แล์ง ปุน บัว ตุ๊ เหยียด ลิ์ว เญย แหม่ง.

26เยีย เฟี้ย น้าย เต๋ย หว่า ปุน เม่ย บัว ฮิ้ว ตุ๊ ดั๊ว เม่ย บัว วั้ว เต๋ย เมี่ยน.

27มป่า กีตู่ เหธย สีง ลี่ง ปุน เม่ย บัว. สีง ลี่ง หย่า เยียม เจี๊ยน เม่ย บัว เญย เฮญี้ยว, เม่ย บัว ฯฒฯ ไม้ เฉียม หฒุ หาย เต้า หฌาว อ๊ะ. เหว่ย หฒุ เม่ย บัว ตุ๊ ลิ์ว สีง ลี่ง, สีง ลี่ง ฯฒฯ หฌาว หญู่งๆ เม่ย บัว. นิ่น เญย หว่า หย่า เฒียน เญย, ไม้ จ๊า. สีง ลี่ง หฌาว เม่ย บัว ฮนั้ง หาย นอ เหธา กีตู่ จวั่ง แหม่ง เฒี่ยง, เม่ย บัว ฯฒฯ อ๋อย หฒุ ฮนั้ง วั้ว นอ โหฒว.

28ฝุเจว๊ย อ้า! อ๋อย หฒุ หฒั่นๆ เหธา นิ่น จวั่ง แหม่ง เฒี่ยง. ฮนั้ง หน่าย, นิ่น แอ๋ง ต้าย วั้ว ฮนอย, บัว ไฮ่ ปู๋ง หล่าง เญย เยียม นิ่น เญย หฑะเฮมียน, ไม้ หฒุ ไญ้, ไม้ หฒุ ปี๋ง.

29เม่ย บัว ฮิ้ว ตุ๊ กีตู่ เซ แป้ง ฟิม เญย. ฮนั้ง หน่าย, เม่ย บัว ฮิ้ว ตุ๊ หาย เต้า โหฒว แป้ง ฟิม, วั้ว เต้า เซ โหฒว ทิน-ฮู่ง เญย น่าม โญ์ว.

← Chapter 1 Jump to: Chapter 3 →