2 Timothy 1

Mien Bible (Thai Script) © Thailand Bible Society, 2007

Jump to: Chapter 2 →

1เยีย, เปาโล, เอย ทิน-ฮู่ง เญย หฒะเอ๋ย โหฒว กีตู่ เยซู เญย กง-โฒ่ เหว่ย ฒุ่น ทิน-ฮู่ง แล์ง ปุน เญย แหม่ง, ต้ง เมี่ยน เขา กีตู่ เยซู ตุ๊ ต้าย เญย เฒี่ยง แหม่ง.

2เยีย เฟี้ย เฝียน ปุน เยีย ฮนั้ม ไห่ เญย ตอน, ทิโมไท. โท้ หฒั่ง เตี๋ย ทิน-ฮู่ง เหธา บัว เญย เฒี้ยว กีตู่ เยซู ค้อ-เลี่ยน เม่ย, เหธย เอน เหธย แป้ง ออน ปุน เม่ย.

3เยีย แล์ง ฒี่ง ทิน-ฮู่ง, ต้ง เยีย, ฮนั้ง เยีย เญย อง-ถาย บัว นอ, หล่ง ธีง-เหฑ่ง เฮญี้ยว ฟู-สู วั้ว เต้า. เยีย ฮนอยๆ ม์วนๆ เต๋า เก๋า เญย เฒี่ยง โห่ เยีย หฒั่นๆ จั๋ง หฒุ เม่ย.

4เยีย จั๋ง หฒุ เม่ย เญี้ยม เญย ววม-เหมว่ย ฯฒฯ หฒะเก้ง! อ๋อย ปวัด เม่ย ไห่. ตุ๊ ปวัด เม่ย นอ, เยีย ฯฒฯ เฌียน-โย่ว ออน-เหลาะ อ๊ะ.

5เยีย จั๋ง หฒุ เม่ย เฒียนๆ เญย เสียน, ฮนั้ง ฒิ่น ด่าง เม่ย เญย ตา กู๋, โลอิด, เหธา เม่ย เญย มา, ยูนิด, เฒียนๆ เสียน วั้ว นอ. เยีย เสียน ตี่ง เม่ย อี้ หฒั่น หย่า ฮนั้ง วั้ว นอ เสียน.

6เหว่ย น้าย เยีย เถง เม่ย จั๋ง เจี๊ยน เยีย มาน เจี๊ยน เม่ย วั้ว หฒั่น, ทิน-ฮู่ง เหธย ปุน เญย ฒี่ง เหญ่ย, เม่ย อ๋อย หฒุ ปุน ฮนั้ง โต์ว นอ หฮยาง ต้าย.

7ทิน-ฮู่ง เหธย ปุน บัว เซ ไม้ เฒ์ย กั้ม เหฑีย เญย เฮญี้ยว. นิ่น ปุน บัว เญย เฮญี้ยว ม่าย ชะ, ปุน บัว ฮนั้ม เมี่ยน, หย่า ไฮ่ กุ๊น ตุ๊ กั้น.

8ฮนั้ง หน่าย, ไม้ ตู๋ง ไญ้ เถง บัว เญย เฒี้ยว เยซู โหฒว ฒอง-เหฒง. เยีย เหว่ย กีตู่ หฒุ หววน เจี๊ยน โล่, เม่ย หย่า ไม้ ตู๋ง เหว่ย เยีย ไญ้. ต๋าว หฑวน เม่ย หย่า อ๋อย หฒุ เขา ทิน-ฮู่ง เญย ชะ เหว่ย คู้ เฝียน ม่าย ป่วน เสี่ยว โค้ว.

9ทิน-ฮู่ง เหฌียว บัว, หย่า เห่ว บัว ต้าย โหฒว นิ่น เญย ธีง-เหฑ่ง เมี่ยน, ไม้ เฒ์ย เหว่ย บัว โหฒว เญย หาย หญู่ง คู้ สี่, เซ เอย นิ่น กั้น เญย หฒะเอ๋ย เหธา นิ่น เญย เอน ฮนั้ง. น้าย หญู่ง เอน, เยียม ต้ง ธอ หม่าน โก๊ว หม่าน ต่อย วั้ว หฒั่น ทิน-ฮู่ง หล่ง กีตู่ เยซู เหธย ปุน บัว.

10มป่า อี้ หฒั่น บัว เญย เหฌียว เฒี้ยว กีตู่ เยซู เหฌี่ย ต้าย ปิ๋ว เม่ง น้าย หญู่ง เอน, เหว่ย หฒุ กีตู่ เหมียด เหฑ่ง ไต่ เญย ชะ, หย่า หล่ง คู้ เฝียน ปุน เมี่ยน ฮิ้ว ตุ๊ เหยียด ลิ์ว ไม้ ไฮ่ ไต่ เญย แหม่ง.

11ทิน-ฮู่ง พ้าย เยีย โหฒว ฒุ่น โต์ เมี่ยน, โหฒว กง-โฒ่ หย่า โหฒว ฟิน-แซง ฒุ่น น้าย คู้ เฝียน.

12เหว่ย น้าย คู้ เฝียน เยีย อี้ หฒั่น ฮนั้ง น้าย นอ เสี่ยว โค้ว. มป่า เยีย ไม้ ไญ้, เหว่ย หฒุ ฮิ้ว ตุ๊ เยีย เสียน เญย เซ หาย เต้า หย่า ฮิ้ว ตี่ง เยีย จิว ปุน นิ่น เญย, นิ่น ไฮ่ เปว เจี๊ยน เถา เซี้ยม ฒุ์ย วั้ว นอม ฮนอย.

13อ๋อย หฒุ หล่ง เม่ย ไฮ์ เยีย หฌาว เจี๋ย เญย เฒียน หว่า โหฒว หญู่ง เฒ้ย. หย่า อ๋อย หฒุ เขา กีตู่ เยซู ตุ๊ ต้าย เญย เสียน ฟิม เหธา ฮนั้ม เมี่ยน เญย เฮญี้ยว เอย เจี๊ยน โหฒว.

14สีง ลี่ง เยียม บัว กะญั์ว. อ๋อย หฒุ เขา สีง ลี่ง โก๋ว เจี๊ยน จิว ปุน เม่ย เญย เฒียน เล์ย.

15เม่ย ฮิ้ว ตุ๊ เอเซีย แซ้ง เญย เมี่ยน เหยียด ฒู้ง กวั่ง เยีย เหฑ่ง, เลี่ยม ฟีเจลัด เหธา เฮโมเกเน้ด กวั่ง เยีย.

16เยีย โท้ เฒี้ยว ค้อ-เลี่ยน โอเนสิโฟลัด วั้ว เปย๊า เมี่ยน เหว่ย หฒุ โอเนสิโฟลัด นุ์น เยีย เญย เฮญี้ยว เหฒีย หฑุ่น. เยีย หฒุ หลิ่ม โด้ เจี๊ยน, นิ่น หย่า ไม้ ไญ้.

17เยี้ยด เถา โลมา ฒี่ง นิ่น ฯฒฯ เหฌี่ย ชะ ฒิ่ม ล์อ เยีย, หย่า ล์อ เถา ปวัด.

18เม่ย หย่า ฮิ้ว ตุ๊ เยียม เอเฟโซ ฒี่ง วั้ว หฒั่น นิ่น เถง เยีย ด่ง หาย ธั้ม! เยีย ฯฒฯ โท้ เฒี้ยว, เถา เซี้ยม ฒุ์ย วั้ว ฮนอย, อ๋อย หฒุ ค้อ-เลี่ยน นิ่น.

Jump to: Chapter 2 →