2 Timothy 3

Mien Bible (Thai Script) © Thailand Bible Society, 2007

← Chapter 2 Jump to: Chapter 4 →

1เม่ย อ๋อย หฒุ ฮิ้ว ตุ๊ เถา เซ้ด เมว์ย เญย ฮนอย-เหญียะ ม่าย โค้ว ไห่ เญย สี่.

2ป้าม เมี่ยน ขูง อ๋อย ฮนั้ม กั้น ฮนั้ง, ฮนั้ม ญ่าน, เธง ฮ่า ป้า ปวัง, โหฒว เหมา, คี เมี่ยน, ไม้ หมวัง เตี๋ย หม่า, ไม้ ม่าย เอน-ฒี่ง, ไม้ ธีง-เหฑ่ง.

3นิ่น บัว ไม้ ฮนั้ม เมี่ยน, หนิบ วิน, ก๊อง โตะ เมี่ยน, ไม้ ไฮ่ ฒั้น กั้น, โหฒว เธี้ยว, ฑอง โหฒว หลง เญย สี่,

4หม่าย กั๊วะ หม่าย ก๋อ-โย์ว, ไม้ ฮนั้ม ฒิ่น โฮ์, เฒาะ หล่าง, ฮนั้ม กั้น อ๋อย ตุ๊ เฌียน-โย่ว เก้า ธั้ม ฮนั้ม ทิน-ฮู่ง,

5เป้ย หฒั่ง โหฒว ฮนั้ง เสียน ทิน-ฮู่ง, มป่า เฮญี้ยว ไม้ เหญี่ยม นิ่น บัว เสียน เญย เจ๊า ม่าย ชะ. น้าย หญู่ง เมี่ยน เม่ย อ๋อย หฒุ ซิ้ม ฆอย.

6ม่าย เต๋ย น้าย หญู่ง เมี่ยน ป์อง เปียะ เมี่ยน เญย เปย๊า กุ๊น เฮญี้ยว หฮงง เญย มเซียะ ตอน, เหว่ย หฒุ น้าย เต๋ย มเซียะ ตอน เอย กั้น เญย เฮญี้ยว หั่น โหฒว หญู่งๆ ฯฒฯ หฒุ ดาม เจี๊ยน ฒุ์ย เฮนี้ย ไห่.

7น้าย เต๋ย มเซียะ ตอน ไม้ กุ๊น หฒั่นๆ โหะ มป่า โหะ เถา หาย หฒั่น ไม้ ไฮ่ ฮิ้ว เฒียน เล์ย.

8ฒิ่น ด่าง ยันเน้ด เหธา ยัมเบ ฮนั้ง หาย นอ แหง่ง โมเซ, อี้ หฒั่น โหฒว หว่าย วั้ว เต๋ย เมี่ยน หย่า ฮนั้ง วั้ว นอ แหง่ง เฒียน เล์ย. นิ่น บัว เญย เฮญี้ยว หว่าย เหฑ่ง. เอย นิ่น บัว เสียน เญย เจ๊า นิ่น บัว หย่า ด๊อด เหฑ่ง หมี่ อ๊ะ.

9นิ่น บัว ฮนั้ง น้าย นอ โหฒว มป่า โหฒว ไม้ ตุ๊ ด่ง หาย เล่า เหว่ย หฒุ หฒวัง เมี่ยน ฯฒฯ ปวัด นิ่น บัว ด่ง หาย หฮงง, ฮนั้ง ยันเน้ด เหธา ยัมเบ วั้ว นอ.

10มป่า เม่ย ฮิ้ว ตุ๊ เยีย หฌาว เญย โต์-เล์ย, เยีย โหฒว เญย สี่, เยีย เฮญี้ยว เญย เอ๋ย. เม่ย หย่า ปวัด เยีย เญย เสียน ฟิม, เยีย เญย หน่อย, เยีย ฮนั้ง หาย นอ ฮนั้ม เมี่ยน, ปวัด เยีย เตี๊ย ตุ๊,

11ปวัด เยีย หฒุ เมี่ยน โหฒว โตะ หย่า หฒุ เสี่ยว โค้ว. เม่ย หย่า ฮิ้ว ตุ๊ เยียม อันทีโอก มู้ง, อีโคนียูม มู้ง, ลิสะตา มู้ง เยีย หฒุ เมี่ยน โหฒว โตะ, เตี๊ย โค้ว ไห่. มป่า เฒี้ยว เหฌียว เยีย เล่ย ดุ๊ด น้าย เต๋ย เหยียด ฒู้ง สี่.

12หาย เต้า อ๋อย เหธา กีตู่ เยซู จวั่ง แหม่ง เฒี่ยง, กัน หลง ทิน-ฮู่ง, วั้ว เต้า ฯฒฯ หฒุ เมี่ยน โหฒว โตะ.

13เอ๊าะ เญย เมี่ยน เหธา ดั๊ว เมี่ยน เญย เมี่ยน เหยียด ฮนอย เป๊ย เหยียด ฮนอย หว่าย, ขูง ดั๊ว เมี่ยน หย่า หฒุ เมี่ยน ดั๊ว นิ่น บัว ฮนั้ง.

14มป่า เม่ย กั้น โหะ ลิ์ว, เสียน ว้วน เญย เฒียน เล์ย, อ๋อย หฒุ หฒั่นๆ เอย เจี๊ยน โหฒว, เหว่ย หฒุ เม่ย ฮิ้ว ตุ๊ หาย เต้า เถง เม่ย โหะ ต้าย.

15เยียม เม่ย โหฒว ฝุเจว๊ย เญย เฒี่ยง โห่ เม่ย ฒู้ง ฮิ้ว ตุ๊ กีง-โซว. กีง-โซว ไฮ่ ปุน เม่ย ม่าย ธง-เม่ง ฮิ้ว ตุ๊ อ๋อย หฒุ เสียน เขา กีตู่ เยซู หธีง ตุ๊ เหฌียว.

16โต่วๆ กีง-โซว, ทิน-ฮู่ง ต้อ เมี่ยน เฟี้ย หย่า ม่าย ลั่ม หล่ง เหว่ย หฌาว เมี่ยน, เหว่ย ก๊อง-เหม เมี่ยน, เหว่ย หฒ่อ เมี่ยน โหฒว ต่อง เญย ต๋อง, เหว่ย หฌาว เมี่ยน โหฒว หอบ เญย เจ๊า.

17ฮนั้ง หน่าย ฯฒฯ ปุน ทิน-ฮู่ง เญย เมี่ยน ตุ๊ ตุ้น ยุ่น ฑ่อย เหว่ย โหฒว หญู่งๆ คู้ สี่.

← Chapter 2 Jump to: Chapter 4 →