Colossians 2

Mien Bible (Thai Script) © Thailand Bible Society, 2007

← Chapter 1 Jump to: Chapter 3 →

1เยีย อ๋อย เม่ย บัว ฮิ้ว ตุ๊ เยีย เหว่ย เม่ย บัว เหธา เลาดีเซีย เมี่ยน เหธา เหยียด ฒู้ง ไม้ ปวัด เจี๋ย เยีย เญย เฮมียน เญย เมี่ยน โหฒว กง ด่ง หาย โค้ว.

2เยีย ฮนั้ง น้าย นอ โหฒว เหว่ย เถง นิ่น บัว หฒูง ชะ, หอบ ฟิม ต้ง เอ๋ย เญย ล่าน ฮนั้ม ล่าน, ฯฒฯ ปุน นิ่น บัว ไฮ่ เสียน ตี่ง, หฒะเก้ง เปียะ เฮญี้ยว เหฑ่ง, ฮิ้ว ตุ๊ ทิน-ฮู่ง ปุน บย๋าง ย่าง ธ้วด ต้าย เญย สี่, เซ กีตู่ กั้น.

3ทิน-ฮู่ง จ๋าย เญย ธง-เม่ง เหธา เฮญี้ยว-ฒ่อย หย่า เกม เจี๊ยน เยียม กีตู่ กะญั์ว.

4เยีย ฮนั้ง น้าย นอ ก๊อง เหว่ย ไม้ ปุน ฑุ่ย บย่าง เญย เมี่ยน ก๊อง คู่ หมวัง เญย หว่า ดั๊ว เม่ย บัว.

5เหว่ย หฒุ ไม้ กุ๊น เยีย เญย ซิน ไม้ เหธา เม่ย บัว เยียม, เยีย เญย เฮญี้ยว เหธา เม่ย บัว เยียม เญย. ปวัด เม่ย บัว เยียม ตุ๊ ซูง-ซ้าง เญย หย่า เสียน ว้วน กีตู่, เยีย ฯฒฯ อะเฮน้ย เญย.

6เหว่ย น้าย, เม่ย บัว ฮนั้ง หาย นอ ฒิบ ลิ์ว กีตู่ เยซู โหฒว เฒี้ยว, ฯฒฯ อ๋อย หฒุ ฮนั้ง วั้ว นอ เหธา นิ่น จวั่ง แหม่ง เฒี่ยง เจี๊ยน.

7อ๋อย หฒุ เยียม นิ่น กะญั์ว ฮนั้ง เหฌี่ย ฑู่ง นอ, เหธย เจี์ย ต้าย เสียน ตุ๊ ว้วน, ฮนั้ง เมี่ยน หฌาว เจี๋ย เม่ย บัว นอ. หย่า อ๋อย หฒุ หฒั่นๆ แล์ง ฒี่ง ทิน-ฮู่ง.

8อ๋อย หฒุ ไฝ ฟิม, ไม้ ตู๋ง ปุน หาย เต้า หล่ง ป้าม เมี่ยน เญย ธง-เม่ง ฮนั้ม ธ้วด ต้าย เญย เล์ย ไฟ ขูง-หว่า หวัก เม่ย บัว. เซ ดั๊ว เม่ย บัว กัน ป้าม เมี่ยน เญย เอ้ย โต้ว เหธา เยียม กุ๊น ด๊าม-ลู่ง เญย เมี้ยน ต้าย เญย เล์ย, ไม้ เฒ์ย เยียม กีตู่ ต้าย.

9เหว่ย หฒุ ทิน-ฮู่ง เญย เฟียม-ฝีง เยียม กีตู่ เญย ซิน ฑ่อย เหฑ่ง,

10เม่ย บัว เหธา กีตู่ จวั่ง แหม่ง เฒี่ยง ฯฒฯ หญู่งๆ ม่าย ฑ่อย. กีตู่ หย่า กุ๊น เหยียด ฒู้ง เยียม ด๊าม-ลู่ง ม่าย หลี่ง ม่าย ชะ กุ๊น สี่ วั้ว เต๋ย.

11เม่ย บัว เหธา กีตู่ จวั่ง แหม่ง เฒี่ยง ฯฒฯ เจี๋ย ลิ์ว ก๊าด เญย เล์ย อ๊ะ. ไม้ เฒ์ย เมี่ยน เญย ปั์ว ก๊าด, เซ กีตู่ กั้น เถง เม่ย บัว ก๊าด เหว่ย ปุน เม่ย บัว ไจ๊ ดุ๊ด เม่ย บัว ป์าม ฒุ์ย เญย ซิน.

12เม่ย บัว เจี๋ย ววม เญย เล์ย วั้ว หฒั่น, เม่ย บัว เซ เหธา กีตู่ จวั่ง ปย๊บ, แอ๋ง เหธา นิ่น นั่ง ต้าย, เหว่ย หฒุ เม่ย บัว เสียน เขา ทิน-ฮู่ง เญย ชะ, ต้ง เยซู ไต่ มี่ง มป่า ปุน นิ่น นั่ง ต้าย วั้ว เต้า เญย ชะ.

13ฒิ่น ด่าง หลาย เม่ย บัว ป์าม ฒุ์ย, หย่า หลาย เม่ย บัว ไม้ เจี๋ย ก๊าด เญย เล์ย กวั่ง ป์าม ฒุ์ย เญย เฟียม-ฝีง, เม่ย บัว เซ ต๋อง ไต่ หมี่ อ๊ะ. มป่า อี้ หฒั่น ทิน-ฮู่ง ปุน เม่ย บัว เหธา กีตู่ นั่ง ต้าย หย่า กวั่ง บัว เญย เหยียด ฒู้ง ฒุ์ย.

14นิ่น เป๊ด กวั่ง ตี่ง บัว เญย ฒุ์ย เญย แฒะ-ตาน, ต้ง เฟี้ย เจี๊ยน เหธา บัว ต๋อย-เตก เญย เล์ย-หลัด. นิ่น เฒาะ มี่ง ตีง เจี๊ยน เหฒียบ หฑั่ง จ๋า หมี่ อ๊ะ.

15เยียม เหฒียบ หฑั่ง จ๋า กีตู่ ฮี่ง เจี๋ย เยียม ด๊าม-ลู่ง ม่าย หลี่ง ม่าย ชะ กุ๊น สี่ วั้ว เต๋ย, แอ๋ง ตอง หฒวัง ต้อ นิ่น บัว มี่ง ฮนั้ง หฒุ ธ้าง เญย เมี่ยน นอ, ปุน ธีง กีตู่ ฮี่ง หมี่ อ๊ะ.

16เหว่ย น้าย ไม้ ตู๋ง ปุน หาย เต้า เหว่ย เม่ย บัว หญั่น เญย ฮบ เญย, ไฟ เจี๋ย ฒิบ เญย เล์ย, ไฟ เปียะ เซียง-หฮลา เญย เล์ย, ไฟ ตี้ง กง ฮนอย เญย เล์ย, ต้าน เม่ย บัว.

17น้าย เต๋ย สี่ ขูง โหฒว ต้ง ลิ่น ปิ๋ว เม่ง ฆะฮ้า อ๋อย ต้าย เญย สี่ ฮนั้ง. มป่า เฒียน เญย เซ กีตู่.

18ม่าย เต๋ย เมี่ยน โหฒว เอ๋ย เล์ย ฮนั้ง เหญี่ยม กั้น โหฒว ไฝ, ป๋าย ฟิน-เมี่ยน. ขูง หฑั่ม นิ่น บัว ปวัด หิ่น ย่าง เญย สี่ ฮนั้ง, หย่า เอย ป้าม เมี่ยน เญย เอ๋ย เธง กั้น โฮล. ไม้ ตู๋ง ปุน น้าย หญู่ง เมี่ยน ดั๊ว เม่ย บัว, ปุน เม่ย บัว เญย ฒี่ง เหญ่ย ด๊อด.

19วั้ว หญู่ง เมี่ยน หย่า ไม้ เขา กีตู่ โหฒว มฆ้อง. มฆ้อง โหฒว กอน ยู์ง ซิน ปุน ซิน ต๋าว ตุ๊ หอบ, ญัด ต๋าว ญัด, จาน ต๋าว จาน, เฒี่ยง ซิน ฯฒฯ เอย ทิน-ฮู่ง เญย หฒะเอ๋ย โฮล ต้าย.

20เม่ย บัว เหธา กีตู่ ไต่, เล่ย ดุ๊ด กุ๊น ด๊าม-ลู่ง เญย เมี้ยน หมี่ อ๊ะ. วั้ว หญู่ง, เม่ย บัว เหว่ย หาย ติ่ว หธ่อ ฮนั้ง เกวย ป้าม เกน เญย เมี่ยน เยียม? เม่ย บัว เหว่ย หาย ติ่ว กัน ป้าม เมี่ยน เหลียบ ต้าย เญย เล์ย?

21นิ่น บัว ก๊อง, “ไม้ ตู๋ง มัวะ, ไม้ ตู๋ง เดี๊ยม เหมวย, ไม้ ตู๋ง ฮลัว.”

22มป่า น้าย เต๋ย เหยียด ฒู้ง กะน้าย เซ หล่ง ลิ์ว ฯฒฯ ป่า หมี่ อ๊ะ. น้าย เต๋ย เล์ย ขูง เป๋น ป้าม เมี่ยน เหลียบ ต้าย เญย เล์ย เหธา หฌาว เญย หว่า ฮนั้ง.

23เมี่ยน ปวัด ฮนั้ง ม่าย ธง-เม่ง เหว่ย หฒุ ปุน เมี่ยน เอย กัน ฮนั้ม ธ้วด เญย หฒะเอ๋ย ป๋าย, หย่า โหฒว ฮนั้ง เหญี่ยม กั้น โหฒว ไฝ, หย่า โหฒว ห่อย กั้น เญย ซิน. มป่า น้าย เต๋ย เล์ย เหยียด ฒู้ง ไม้ ลั่ม หล่ง. ไม้ เถง เมี่ยน กุ๊น ตุ๊ ซิน หฒั่ง หั่น อ๋อย โหฒว เญย.

← Chapter 1 Jump to: Chapter 3 →