Colossians 3

Mien Bible (Thai Script) © Thailand Bible Society, 2007

← Chapter 2 Jump to: Chapter 4 →

1เม่ย บัว ฒู้ง ตุ๊ เหธา กีตู่ นั่ง ต้าย, เม่ย บัว ฯฒฯ อ๋อย หฒุ ล์อ เยียม กู้ หงว่าย เญย สี่, ต้ง กีตู่ เฒว์ย เจี๊ยน นิ่น เญย เตีย เญย บย่าว แหมง ปูง วั้ว นอม ต๋อง.

2เม่ย บัว อ๋อย หฒุ ฒุ้น เฮญี้ยว ฮนั้ม กู้ หงว่าย เญย สี่, ไม้ เฒ์ย เยียม น้าย ป้าม เกน เญย สี่.

3เหว่ย หฒุ เม่ย บัว เซ ต๋อง ไต่ หมี่ อ๊ะ. เม่ย บัว เญย เฒี่ยง แหม่ง เหธา กีตู่ ปี๋ง เจี๊ยน เยียม ทิน-ฮู่ง กะญั์ว.

4กีตู่ ต้ง บัว เญย เฒียน เฒี่ยง แหม่ง. นิ่น หิ่น ธ้วด เญย เฒี่ยง โห่, บัว หย่า อ๋อย เหธา เจี๊ยน นิ่น หิ่น ธ้วด หย่า จวั่ง นิ่น เญย ฌัง-หล่าง.

5เหว่ย น้าย อ๋อย หฒุ เหมียด เหฑ่ง เม่ย บัว เญย ซิน หฒั่ง หั่น อ๋อย โหฒว เญย หญู่งๆ หว่าย สี่. อ๋อย หฒุ กวั่ง ปวั้ง เลี่ยว เญย สี่, ไม้ ธีง-เหฑ่ง เญย, เฮญี้ยว หั่น เซียะ หั่น ตอน เญย, เฮญี้ยว อ๋อย โหฒว เญย เอ๊าะ สี่, เหธา เม้า กะน้าย เญย, (เม้า กะน้าย เซ ฮนั้ง ป๋าย หมิ่ว-ฝัง นอ.)

6หลาย น้าย เต๋ย สี่ ทิน-ฮู่ง อ๋อย ปุน ไม้ หมวัง นิ่น เญย หว่า วั้ว เต๋ย หฒุ นิ่น โน์ว เจี๊ยน.

7ฒิ่น ด่าง เม่ย บัว หย่า ฮนั้ง น้าย นอ โหฒว, ต้ง เม่ย บัว ปุน น้าย หญู่ง สี่ กุ๊น เม่ย บัว วั้ว หฒั่น.

8มป่า อี้ หฒั่น เม่ย บัว อ๋อย หฒุ กวั่ง น้าย เต๋ย เหยียด ฒู้ง สี่. ไม้ ตู๋ง โน์ว เมี่ยน, เฉีย เจี์ย, ฑอง เมี่ยน. ไม้ ตู๋ง ก๊อง โตะ เมี่ยน ไฟ หล่ง เม่ย บัว เญย ฑุ่ย ก๊อง หาย หญู่ง หว่า-โธว.

9ล่าน ไม้ ตู๋ง ก๊อง-แปะ ดั๊ว ล่าน, เหว่ย หฒุ เม่ย บัว กวั่ง เม่ย บัว เญย โล์-แหม่ง เหธา โล์-แหม่ง โหฒว เญย สี่,

10แอ๋ง ตุ๊ เซียง-แหม่ง. น้าย หญู่ง เซียง-แหม่ง, เหฒย หม่าน หมวด เญย ทิน-ฮู่ง หฒั่นๆ เหฒย ต้าย เซียง เญย, กุ๊น โหฒว กุ๊น ฒวั้ง นิ่น เญย ฝัง เฒ้ย, เหว่ย ปุน เม่ย บัว ไฮ่ ฮิ้ว เหฑ่ง นิ่น กั้น.

11ฮนั้ง หน่าย, จั๋น เหธา ยิวไท เมี่ยน ฟี่ ฮนั้ง เญย, ไม้ กั้น หญู่ง, เจี๋ย ก๊าด เญย เล์ย ไฟ ไม้ เจี๋ย ก๊าด เญย, ไม้ กัน จั๋น-กีก เญย เล์ย ไฟ เยียม หล่ม เญย เมี่ยน, โหฒว โน่ว เญย ไฟ ไม้ โหฒว โน่ว เญย, เหยียด ฒู้ง ไม้ กั้น หญู่ง, มป่า กีตู่ เซ เหยียด ฒู้ง, หย่า เยียม เหยียด ฒู้ง.

12ทิน-ฮู่ง ฮนั้ม เม่ย บัว หย่า กิ๊น เม่ย บัว ต้าย เป๋น นิ่น กั้น เญย ธีง-เหฑ่ง เมี่ยน. เหว่ย น้าย เม่ย บัว อ๋อย หฒุ ม่าย เฮญี้ยว ค้อ-เลี่ยน เมี่ยน, โหฒว หลง ปุน เมี่ยน, เหญี่ยม กั้น โหฒว ไฝ, ส่วน ฒี่ง ส่วน เอ๋ย หย่า ม่าย หน่อย เตี๊ย.

13อ๋อย หฒุ โหฒว เฮญี้ยว ด๊าว, ล่าน หญ่าง ล่าน. สี ก๊อง เม่ย บัว หาย เต้า ล่าน เหธา ล่าน ม่าย สี่, ล่าน อ๋อย หฒุ กวั่ง ปุน ล่าน. เฒี้ยว เยซู ฮนั้ง หาย นอ กวั่ง เม่ย บัว โหฒว ต่อง เญย สี่, เม่ย บัว หย่า อ๋อย หฒุ ฮนั้ง วั้ว นอ ล่าน กวั่ง ปุน ล่าน.

14ไม้ ตาน บัวะ น้าย, หย่า อ๋อย หฒุ จา ทิบ ฮนั้ม เมี่ยน เญย เฮญี้ยว เหว่ย หฒุ ฮนั้ม เมี่ยน เญย เฮญี้ยว ปุน น้าย เต๋ย เหยียด ฒู้ง สี่ ตุ้น ยุ่น เหฑ่ง.

15อ๋อย หฒุ หล่ง กีตู่ ปุน ต้าย เญย แป้ง ออน กุ๊น เม่ย บัว เญย เฮญี้ยว. เซ เหว่ย ปุน เม่ย บัว ม่าย น้าย หญู่ง แป้ง ออน ทิน- ฮู่ง กิ๊น เม่ย บัว ต้าย เป๋น เหยียด นอม ซิน. หย่า อ๋อย หฒุ แล์ง ฒี่ง ทิน-ฮู่ง.

16อ๋อย หฒุ ฒ่าง กีตู่ เญย โต์ ปวั๊ง เม่ย บัว เญย เฮญี้ยว ฯฒฯ หล่ง หญู่งๆ ธง-เม่ง ล่าน หฌาว ล่าน, ล่าน ขวิน ล่าน. หย่า อ๋อย หฒุ ป๋าว สีง ฑูง, เหธา เธง ทิน-ฮู่ง เญย ฑูง, เหธา สีง ลี่ง ปุน เมี่ยน เป๋น ธ้วด เญย ฑูง, หล่ง เฮญี้ยว แล์ง ฒี่ง ทิน-ฮู่ง.

17ไม้ กุ๊น เม่ย บัว โหฒว หาย หญู่ง, ไฟ ก๊อง หาย หญู่ง, อ๋อย หฒุ เต๊ง เฒี้ยว เยซู เญย บั๋ว โหฒว. หย่า อ๋อย หฒุ เต๊ง นิ่น เญย บั๋ว แล์ง ฒี่ง หฒั่ง เตี๋ย ทิน-ฮู่ง.

18โหฒว เอ๊า เญย เมี่ยน อ้า! อ๋อย หฒุ บัวะ กั้น เญย โหฆ. ฮนั้ง น้าย โหฒว เซ ผุย เสียน เฒี้ยว เญย เมี่ยน.

19โหฒว โหฆ เญย เมี่ยน อ้า! อ๋อย หฒุ ฮนั้ม กั้น เญย เอ๊า, หย่า ไม้ ตู๋ง โหฒว โตะ นิ่น.

20ฝุเจว๊ย อ้า! เยียม หม่าน สี่ อ๋อย หฒุ หมวัง เตี๋ย หม่า เหว่ย หฒุ น้าย เซ โหฒว หอบ เฒี้ยว เญย เฮญี้ยว.

21โหฒว เตีย เญย เมี่ยน อ้า! ไม้ ตู๋ง ธัวะ เม่ย บัว เญย ฝุเจว๊ย. เฑ่า เหย นิ่น บัว เฮญี้ยว หนัม.

22โหฒว โน่ว เญย เมี่ยน อ้า! อ๋อย หฒุ เยียม หม่าน สี่ หมวัง เม่ย บัว ป้าม เกน เญย เฒี้ยว. ไม้ ตู๋ง ขูง ตอง เฒี้ยว เยียม เญย เฒี่ยง โห่ โหฒว หลง เหว่ย ปุน นิ่น อะเฮน้ย ฮนั้ง. อ๋อย หฒุ เฮญี้ยว หฒีง เญย โหฒว เหว่ย หฒุ เม่ย บัว ท่าย ทิน-ฮู่ง.

23ไม้ กุ๊น โหฒว หาย หญู่ง, อ๋อย หฒุ ปวั๊ง เฮญี้ยว โหฒว ฮนั้ง โหฒว เหว่ย ทิน-ฮู่ง, ไม้ เฒ์ย โหฒว เหว่ย เมี่ยน.

24เม่ย บัว ฮิ้ว ตุ๊ เม่ย บัว อ๋อย หฑิบ เฒี้ยว เหว่ย นิ่น เญย เมี่ยน เซียว เญย จา-ตี้ง โหฒว ฒี่ง เหญ่ย, เหว่ย หฒุ เม่ย บัว ฟู-สู วั้ว เต้า เฒี้ยว เซ กีตู่.

25หาย เต้า โหฒว หว่าย สี่ ฯฒฯ หฒุ เอย นิ่น โหฒว เญย วิ่น ปุน นิ่น. ทิน-ฮู่ง หย่า ไม้ หมั่ง หาย เต้า เญย เฮมียน.

← Chapter 2 Jump to: Chapter 4 →