Ephesians 2

Mien Bible (Thai Script) © Thailand Bible Society, 2007

← Chapter 1 Jump to: Chapter 3 →

1ฒิ่น ด่าง หลาย เม่ย บัว ไม้ หมวัง ทิน-ฮู่ง เญย หว่า หย่า ป์าม ฒุ์ย, เม่ย บัว เซ ต๋อง ไต่ หมี่ อ๊ะ.

2วั้ว หฒั่น เม่ย บัว ขูง กัน ป้าม เกน เอ๊าะ ไห่ เญย หฒะเอ๋ย ฮนั้ง. เม่ย บัว หมวัง กุ๊น ด๊าม-ลู่ง วั้ว เต้า, ต้ง อี้ หฒั่น เยียม ไม้ หมวัง ทิน-ฮู่ง เญย หว่า วั้ว เต๋ย เมี่ยน เญย เฮญี้ยว โหฒว กง วั้ว เต้า เมี้ยน.

3ฒิ่น ด่าง บัว เหยียด ฒู้ง เยียม วั้ว เต๋ย เมี่ยน บุด๋ง ขูง เอย บัว เญย เฮญี้ยว หั่น โหฒว, เซว่ย กั้น เญย ซิน, กั้น เญย เฮญี้ยว อ๋อย โหฒว เญย ฯฒฯ โหฒว อ๊ะ. เหว่ย น้าย, หฒิว บัว เญย เฟียม-ฝีง บัว มต้าย ฮนั้ง วั้ว เต๋ย นอ, หฒุ ทิน-ฮู่ง โน์ว บัว.

4มป่า ทิน-ฮู่ง หฒะเก้ง ค้อ-เลี่ยน ไห่ เมี่ยน หย่า ด่ง หน่าย ฮนั้ม บัว,

5ไม้ กุ๊น บัว หลาย ไม้ หมวัง ทิน-ฮู่ง เญย หว่า ต๋อง ไต่ หมี่ อ๊ะ, นิ่น ปุน บัว เหธา กีตู่ นั่ง ต้าย เฒี่ยง เจี๊ยน. เม่ย บัว ตุ๊ เหฌียว เซ เหว่ย ทิน-ฮู่ง เญย เอน.

6ทิน-ฮู่ง ปุน บัว เหธา กีตู่ เยซู จวั่ง แหม่ง นั่ง ต้าย หย่า เหธา นิ่น เฒว์ย เจี๊ยน วั้ว ทิน-ต้อง.

7ทิน-ฮู่ง ฮนั้ง น้าย โหฒว เหว่ย ฆะฮ้า กิ๊ดๆ ลู่ง เดี๊ย นิ่น ไฮ่ ปิ๋ว เม่ง นิ่น โฮล! ไห่ เญย เอน, ต้ง นิ่น หล่ง กีตู่ เยซู ปิ๋ว เม่ง นิ่น ด่ง หาย ฮนั้ม บัว.

8เม่ย บัว ตุ๊ เหฌียว เซ เหว่ย ทิน-ฮู่ง เญย เอน, เหว่ย หฒุ เม่ย บัว เสียน เขา นิ่น. เซ ไม้ เฒ์ย เม่ย บัว กั้น โหฒว เญย, เซ ทิน-ฮู่ง เหธย ปุน เญย ฒี่ง เหญ่ย.

9เมี่ยน ตุ๊ เหฌียว เซ ไม้ เฒ์ย เขา กั้น โหฒว เญย สี่, เหว่ย ไม้ ปุน หาย เต้า ไฮ่ ปู๋ง หว่า-เหมา.

10เซ ทิน-ฮู่ง เญย ปั์ว-เต้า เหฒย บัว ต้าย, ปุน บัว เหธา กีตู่ เยซู จวั่ง แหม่ง เฒี่ยง, เหว่ย เยียม เสย หฒั่ง โหฒว คู้ สี่, ต้ง ทิน-ฮู่ง จา-ด่าง หลิ่ว เล์ย เหฒียง อ๋อย บัว โหฒว เญย คู้ สี่.

11เม่ย บัว อ๋อย หฒุ จั๋ง เจี๊ยน เม่ย บัว ฒิ่น ด่าง ฮนั้ง หาย นอ. เม่ย บัว ธ้วด เสย ต้าย มต้าย จั๋น, ต้ง ยิวไท เมี่ยน เห่ว “ไม้ เจี๋ย ก๊าด เญย เล์ย เญย เมี่ยน.” ยิวไท เมี่ยน เห่ว กั้น โหฒว “เจี๋ย ก๊าด เญย เล์ย เญย เมี่ยน.” (น้าย ก๊อง หฒุ เมี่ยน ฮนั้ง หาย นอ โหฒว ปุน กั้น เญย ซิน.)

12อ๋อย หฒุ จั๋ง เจี๊ยน, วั้ว หฒั่น เม่ย บัว ไม้ เหธา กีตู่ จิว ทง, ไม้ ตุ๊ โหฒว อิสะลาเอน แปะ ฝีง. ทิน-ฮู่ง เหลียบ แหง่ง หว่า ต้าย แล์ง ปุน เญย, ไม้ ม่าย เม่ย บัว เญย ป่วน. เม่ย บัว เยียม น้าย ป้าม เกน ไม้ ลั่ม ฮนั้ม ต๋อง หย่า ไม้ ม่าย ทิน-ฮู่ง.

13ฒิ่น ด่าง เม่ย บัว เล่ย ทิน-ฮู่ง โก มป่า อี้ หฒั่น เม่ย บัว เขา กีตู่ เยซู เญย ฑย้าม ตุ๊ นิด ฟัด ทิน-ฮู่ง.

14เหว่ย หฒุ กีตู่ กั้น ปุน อี ปูง หอบ เฮญี้ยว ต้าย, ปุน ยิวไท เมี่ยน เหธา จั๋น เป๋น เหยียด ฝีง. นิ่น หล่ง นิ่น กั้น เญย ซิน เหมียด เหฑ่ง เหฆน เจี๊ยน ปุน นิ่น บัว อี ปูง ม่าย วิน เญย หลาด.

15นิ่น หล่ง นิ่น กั้น เญย ซิน กวั่ง ยิวไท เมี่ยน เญย เล์ย-หลัด, ต้ง นิ่น บัว เญย หลี่ง เหธา เล์ย, เหว่ย ปุน อี ปูง เขา นิ่น กั๊บ เจี๊ยน เป๋น เหยียด เต้า เซียง-เมี่ยน หมี่ อ๊ะ. ฮนั้ง หน่าย ปุน อี ปูง หอบ เฮญี้ยว ต้าย.

16เยซู เยียม เหฒียบ หฑั่ง จ๋า ไต่ เหว่ย เหมียด เหฑ่ง นิ่น บัว อี ปูง เญย วิน, ปุน อี ปูง เหธา ทิน-ฮู่ง หอบ เฮญี้ยว ฯฒฯ เป๋น เหยียด ฝีง.

17กีตู่ ต้าย ฒุ่น แป้ง ออน เญย คู้ เฝียน บั๋ว เม่ย บัว, ต้ง เล่ย ทิน-ฮู่ง โก เญย จั๋น, หย่า ฒุ่น บั๋ว เยียม นิด ทิน-ฮู่ง ฟัด เญย ยิวไท เมี่ยน.

18เหว่ย หฒุ กีตู่ ปุน บัว เหยียด ฒู้ง, ยิวไท เมี่ยน เหธา จั๋น, ตุ๊ จวั่ง ดุ เต้า สีง ลี่ง มี่ง ตุ๊ เถา หฒั่ง เตี๋ย เญย หฑะเฮมียน.

19ฮนั้ง หน่าย, เม่ย บัว จั๋น อี้ หฒั่น ไม้ เฒ์ย โหฒว กั้น ฝีง ไฟ กั้น นอม เต่ย-ปูง ต้าย เญย แคะ. เม่ย บัว อี้ หฒั่น เหธา ทิน-ฮู่ง เญย เมี่ยน เป๋น เหยียด ฝีง หมี่ อ๊ะ, หย่า โหฒว ทิน-ฮู่ง เญย ฮมวั้ง ต่อย.

20ทิน-ฮู่ง ปุน เม่ย บัว ปั่ง หฒวัง กง-โฒ่ เหธา ทิน-ฮู่ง เญย หฒวัง โต่ว หว่า เมี่ยน เหลียบ ต้าย เญย กอน-โด๊ะ เหธย เจี์ย ต้าย. กีตู่ เยซู กั้น โหฒว เปย๊า-เก๊าะ เก้า หล่ง เจี๊ยน เจี๋ย วั้ว คว้าย หละเปย๊ย.

21กีตู่ ปุน วั้ว นอม เปย๊า เญย หญู่งๆ ปั่ง นิ่น ต๋าว เจี๊ยน, หย่า เหธย เจี์ย ต้าย เป๋น เฒี้ยว เญย สีง ติ่น.

22เม่ย บัว เขา นิ่น ฯฒฯ ตุ๊ เหธา เหยียด ฒู้ง เขา นิ่น เญย เมี่ยน เหธย เจี์ย เป๋น นอม ทิน-ฮู่ง เญย สีง ลี่ง เยียม เญย ต๋อง.

← Chapter 1 Jump to: Chapter 3 →