Ephesians 5

Mien Bible (Thai Script) © Thailand Bible Society, 2007

← Chapter 4 Jump to: Chapter 6 →

1เหว่ย หฒุ เม่ย บัว โหฒว ทิน-ฮู่ง ฮนั้ม ไห่ เญย น่าม โญ์ว อ๋อย หฒุ หฒวด นิ่น เญย หญู่ง โหฒว.

2เม่ย บัว โหฒว หญู่งๆ สี่ อ๋อย หฒุ ฮนั้ม เมี่ยน ฮนั้ง กีตู่ ฮนั้ม บัว, เหว่ย บัว เซี้ย แหม่ง, ฮนั้ง เฒาะ ดาง เญย กะน้าย ฝ่ง ห่อ เหฒี่ย ปุน ทิน-ฮู่ง นอ.

3เม่ย บัว โหฒว ทิน-ฮู่ง เญย เมี่ยน ฯฒฯ เยียม เม่ย บัว บุด๋ง ไม้ ตู๋ง โหฒว, เลี่ยม ไม้ ตู๋ง ก๊อง เถา ปวั้ง เลี่ยว เญย สี่, ไฟ ไม้ ธีง-เหฑ่ง เญย สี่, ไฟ เม้า กะน้าย เญย สี่.

4เม่ย บัว หย่า ไม้ หอบ หฒุ ควั้น เทียน ก๊อง หว่า-หฒ่าน, ไฟ หว่า-โธว ไฟ หาย หญู่ง พะลี พะหลาย เญย หว่า. หอบ หฒุ ก๊อง หว่า แล์ง ฒี่ง ทิน-ฮู่ง เก้า หลง.

5เม่ย บัว อ๋อย หฒุ ฮิ้ว ตี่ง, หาย เต้า โหฒว ปวั้ง เลี่ยว เญย สี่, ไฟ โหฒว ไม้ ธีง-เหฑ่ง เญย สี่, ไฟ เม้า กะน้าย, (เหว่ย หฒุ เม้า กะน้าย เซ ต๋อง ป๋าย หมิ่ว-ฝัง,) วั้ว เต้า ฒู้ง ไม้ ม่าย ป่วน เยียม กีตู่ เหธา ทิน-ฮู่ง เญย กั๊วะ.

6ไม้ ตู๋ง ปุน หาย เต้า หล่ง ขูง-หว่า ดั๊ว เม่ย บัว. เซ หลาย น้าย หญู่ง สี่ ทิน-ฮู่ง โน์ว ไห่, ไม้ หมวัง นิ่น เญย หว่า วั้ว เต๋ย เมี่ยน.

7เหว่ย น้าย, ไม้ ตู๋ง เหธา น้าย หญู่ง เมี่ยน โหฒว ต่อย.

8ฒิ่น ด่าง เม่ย บัว เยียม หฮมวัง มป่า อี้ หฒั่น เม่ย บัว เสียน เฒี้ยว เม่ย บัว ฯฒฯ เยียม ฌัง กะญั์ว. ฮนั้ง หน่าย, เม่ย บัว อ๋อย หฒุ โหฒว ผุย เยียม ฌัง เญย เมี่ยน,

9เหว่ย หฒุ เยียม ฌัง ธ้วด เญย เซ หญู่งๆ หลง เญย, หอบ เญย, เหธา เฒียน เญย สี่ ฮนั้ง.

10เม่ย บัว อ๋อย หฒุ สัม หมั่ง ก๋า ไฮ่ โหฒว หาย หญู่ง เหว่ย ปุน เฒี้ยว อะเฮน้ย.

11ไม้ ตู๋ง เหธา เยียม หฮมวัง เญย เมี่ยน โหฒว นิ่น บัว ไม้ ลั่ม หล่ง เญย สี่. ต๋าว หฑวน อ๋อย หฒุ ปุน น้าย เต๋ย สี่ ธ้วด ย่าง ต้าย,

12เหว่ย หฒุ เลี่ยม ก๊อง เถา นิ่น บัว ปี๋ง เจี๊ยน โหฒว เญย สี่ ฒู้ง ไญ้ ไห่ อ๊ะ.

13ฌัง หฒิว เจี๊ยน หาย หญู่ง, วั้ว หญู่ง ฯฒฯ ปวัด ตุ๊ เฒียน,

14เหว่ย หฒุ ฌัง หฒิว หาย หญู่ง, วั้ว หญู่ง ฯฒฯ ฌัง อ๊ะ. เหว่ย น้าย ม่าย โจ๋ว หว่า ก๊อง, “มฌ่อม เญย เมี่ยน อ้า! เญีย ต้าย ม่าะ! ไต่ มี่ง เญย เมี่ยน นั่ง ต้าย ม่าะ! กีตู่ ฯฒฯ หฒิว เจี๊ยน ฌัง เม่ย.”

15ฮนั้ง หน่าย, เม่ย บัว เยียม เสย หฒั่ง อ๋อย หฒุ ไฝ ฟิม เม่ย บัว ฮนั้ง หาย นอ เยียม. ไม้ ตู๋ง ฮนั้ง เมี่ยน หฮงง เมี่ยน, อ๋อย หฒุ ฮนั้ง ธง-เม่ง เญย เมี่ยน วั้ว นอ.

16อ๋อย หฒุ หล่ง ตุ๊ หอบ เฒี่ยง โห่, เหว่ย หฒุ อี้ หฒั่น เญย หญุด เฒ้ย เซ เอ๊าะ ไห่.

17ไม้ ตู๋ง โหฒว เมี่ยน หฮงง เมี่ยน. อ๋อย หฒุ เม่ง แปะ เฒี้ยว เญย หฒะเอ๋ย ฮนั้ง หาย นอ.

18ไม้ ตู๋ง ฮบ ติ๊ว ฆวิน. ติ๊ว เซ ปุน เมี่ยน โหฒว หว่าย สี่. ต๋าว หฑวน อ๋อย หฒุ ปุน สีง ลี่ง เยียม ปวั๊ง เฮญี้ยว.

19อ๋อย หฒุ หล่ง สีง ฑูง, เธง ทิน-ฮู่ง เญย ฑูง, เหธา สีง ลี่ง ปุน เมี่ยน เป๋น ธ้วด เญย ฑูง, ล่าน เหธา ล่าน ก๊อง. หย่า อ๋อย หฒุ หล่ง เฮญี้ยว ป๋าว ฑูง เธง เฒี้ยว.

20หย่า อ๋อย หฒุ เต๊ง บัว เฒี้ยว เยซู กีตู่ เญย บั๋ว หฒั่นๆ เหว่ย หม่าน สี่ แล์ง ฒี่ง หฒั่ง เตี๋ย ทิน-ฮู่ง.

21เม่ย บัว อ๋อย หฒุ ล่าน บัวะ ล่าน เหว่ย หฒุ เม่ย บัว ล่ม ฑ่อย ท่าย กีตู่.

22เม่ย บัว โหฒว เอ๊า เญย เมี่ยน อ้า! เม่ย บัว อ๋อย หฒุ บัวะ กั้น เญย โหฆ ฮนั้ง เม่ย บัว บัวะ เฒี้ยว เยซู วั้ว นอ.

23เหว่ย หฒุ โหฆ โหฒว เอ๊า เญย มฆ้อง ฮนั้ง กีตู่ โหฒว จิว-ปาง เญย มฆ้อง วั้ว นอ. จิว-ปาง โหฒว กีตู่ เญย ซิน, กีตู่ หย่า โหฒว จิว-ปาง เญย เหฌียว เฒี้ยว.

24จิว-ปาง ฮนั้ง หาย นอ บัวะ กีตู่, เอ๊า หย่า อ๋อย หฒุ ฮนั้ง วั้ว นอ เยียม หม่าน สี่ บัวะ นิ่น เญย โหฆ.

25โหฒว โหฆ เญย เมี่ยน อ้า! อ๋อย หฒุ ฮนั้ม กั้น เญย เอ๊า ฮนั้ง กีตู่ ฮนั้ม จิว-ปาง, หย่า เหว่ย จิว-ปาง เซี้ย นิ่น เญย แหม่ง

26เหว่ย ปุน จิว-ปาง ธีง-เหฑ่ง ต้าย. นิ่น หล่ง ววม หย่า หล่ง นิ่น เญย โต์ หฑาว จิว-ปาง

27เหว่ย เฒาะ จิว-ปาง ฝูง ปุน นิ่น กั้น, เป๋น ฌัง-หล่าง เญย จิว-ปาง, ไม้ ไล่ ฮลบ, ไม้ เหญ่า, ไม้ หว่าย ฝัง, มป่า ธีง-เหฑ่ง เญย, ไม้ ลั่ม ต้าน ต๋อง เญย จิว-ปาง.

28ฟี่ ฮนั้ง เญย, โหฆ อ๋อย หฒุ ฮนั้ม กั้น เญย เอ๊า ฮนั้ง ฮนั้ม กั้น เญย ซิน นอ. หาย เต้า ฮนั้ม กั้น เญย เอ๊า ฯฒฯ ฮนั้ม นิ่น กั้น อ๊ะ.

29ไม้ ม่าย หาย เต้า ฑอง กั้น เญย ซิน, ฒู้ง หวุย หลง หย่า โก๋ว เจี๊ยน ฮนั้ง กีตู่ โก๋ว จิว-ปาง วั้ว นอ.

30เหว่ย หฒุ บัว เต้าๆ โหฒว กีตู่ เญย ซิน เญย เหยียด หญู่ง.

31ฮนั้ง กีง-โซว เฟี้ย เจี๊ยน ก๊อง น้าย โจ๋ว หว่า, “เหว่ย น้าย มจั่ง ตอน ตอง จา, เล่ย นิ่น เญย เตี๋ย หม่า, เหธา เจี๊ยน นิ่น เญย เอ๊า เป๋น เหยียด เต้า หมี่ อ๊ะ.”

32เยียม น้าย เต๋ย หว่า กะญั์ว ม่าย ติ้ว โฮล ไห่ เญย เฒียน เล์ย อี้ หฒั่น บย๋าง ย่าง ธ้วด ต้าย อ๊ะ. เอย เยีย กั้น เม่ง แปะ นอ, น้าย เต๋ย หว่า ก๊อง หฒุ กีตู่ เหธา จิว-ปาง.

33มป่า น้าย เต๋ย หว่า หย่า ก๊อง หฒุ เม่ย บัว. เม่ย บัว เต้าๆ โหฒว โหฆ เญย เมี่ยน อ๋อย หฒุ ฮนั้ม กั้น เญย เอ๊า ฮนั้ง ฮนั้ม กั้น นอ. เอ๊า หย่า อ๋อย หฒุ ท่าย กั้น เญย โหฆ.

← Chapter 4 Jump to: Chapter 6 →