Malachi 2

Mien Bible (Thai Script) © Thailand Bible Society, 2007

← Chapter 1 Jump to: Chapter 3 →

1“โอ หฒวัง ไซ เมี่ยน อ้า! เยีย อี้ หฒั่น ฮนั้ง น้าย นอ หัด เม่ย บัว.”

2เน่น เจี๋ย เญย เฒี้ยว ก๊อง, “สี ก๊อง เม่ย บัว ไม้ หมวัง, หย่า ไม้ หล่ง เฮญี้ยว ท่าย เยีย เญย บั๋ว นอ, เยีย อ๋อย ปุน เม่ย บัว หฒุ เหฒียว อ๊ะ. เยีย หย่า ปุน เม่ย บัว ตุ๊ ต้าย เญย ฟุ หฒุ เหฒียว. เยีย ฒู้ง ปุน เม่ย บัว เญย ฟุ หฒุ เหฒียว อ๊ะ, เหว่ย หฒุ เม่ย บัว ไม้ หล่ง เฮญี้ยว ท่าย เยีย.

3“หมั่ง ม่าะ! เยีย อ๋อย เหม เม่ย บัว เญย ฟุน-ฟะ, หย่า เฒาะ เม่ย บัว เหฒี่ย ปุน เยีย วั้ว เต๋ย แซง-คู้ เญย ไฆ้ ฑ้าด เม่ย บัว เญย เฮมียน, หฒุ่น เม่ย บัว เปย๋า ฆอย, ไม้ ปุน เยียม เยีย เญย หฑะเฮมียน.”

4เน่น เจี๋ย เญย เฒี้ยว แอ๋ง ก๊อง, “วั้ว หฒั่น เม่ย บัว ฯฒฯ ฮิ้ว ตุ๊ เยีย จิว น้าย เต๋ย หัด เญย หว่า ปุน เม่ย บัว เหว่ย ปุน เยีย เหธา เลวี ฝีง เหลียบ เญย แหง่ง หว่า เยียม เจี๊ยน.

5เยีย เหธา นิ่น บัว เหลียบ แหง่ง หว่า อ๋อย ปุน นิ่น บัว เสี่ยว ญ่วน ด๊าว, ม่าย แป้ง ออน. เยีย ปุน น้าย เต๋ย เอน นิ่น บัว, เหว่ย อ๋อย นิ่น บัว ท่าย เยีย. นิ่น บัว ฯฒฯ ท่าย เยีย, หย่า กั้ม เหฑีย เยีย เญย บั๋ว.

6“นิ่น บัว เญย ฑุ่ย ขูง หฌาว เฒียน เล์ย. นิ่น บัว เญย ฑุ่ย เหมย หย่า ไม้ ก๊อง หาย หญู่ง จ๊า. นิ่น บัว เหธา เยีย ม่าย จิว ทง หย่า เหฒียบ ฒัวะ เญย กัน หลง เยีย. นิ่น บัว หย่า ต้อ เมี่ยน ธั้ม ก๊อย เฮญี้ยว กวั่ง ฒุ์ย.

7“ไซ เมี่ยน อ๋อย หฒุ เปว เจี๊ยน ทิน-ฮู่ง เญย เฒียน เล์ย. ป้าม เมี่ยน อ๋อย หฒุ ล์อ นิ่น หฌาว เญย หว่า, เหว่ย หฒุ นิ่น โหฒว เน่น เจี๋ย เญย เฒี้ยว เญย โต่ว เฝียน เมี่ยน.

8มป่า ต๋าว หฑวน เม่ย บัว กวั่ง โหฒว หอบ เญย เจ๊า. เม่ย บัว หฌาว เญย หว่า หย่า ปุน เมี่ยน ธั้ม โหฒว ต่อง.” เน่น เจี๋ย เญย เฒี้ยว ก๊อง, “เม่ย บัว กวั่ง เหฑ่ง เลวี ฝีง แล์ง เญย แหง่ง หว่า หมี่ อ๊ะ.

9เยีย ฯฒฯ ปุน เม่ย บัว หฒุ หฒวัง เมี่ยน หมั่ง เผีย, หย่า ปุน เม่ย บัว หฒุ ป่าย เฮมียน, เหว่ย หฒุ เม่ย บัว ไม้ กัน เยีย เญย เจ๊า. หฌาว เญย เฒี่ยง โห่ เม่ย บัว หย่า ไม้ แป้ง ฟิม เญย ต้อ เมี่ยน.”

10“เยีย บัว เต้าๆ เมี่ยน ม่าย ดุ เต้า เตีย ไม้ เฒ์ย? ดุ เต้า ทิน-ฮู่ง เหฒย บัว ต้าย, ไม้ เฒ์ย ไฟ? วั้ว หญู่ง บัว เก๊าะ-เมี่ยน เหว่ย หาย ติ่ว ล่าน ไม้ เหฒียบ ฒัวะ เญย โหฒว ปุน ล่าน ฯฒฯ หมั่ง เผีย เยีย บัว เญย อง-ถาย-แงะ แล์ง เจี๋ย เญย แหง่ง หว่า?

11“ยูดา เมี่ยน ไม้ เหฒียบ ฒัวะ เญย กัน แล์ง เญย แหง่ง หว่า. เยียม อิสะลาเอน เต่ย-ปูง เหธา เยลูซาเลม ฒี่ง ม่าย หว่าย ไห่ เญย สี่ ธ้วด ต้าย เหว่ย หฒุ ยูดา เมี่ยน โหฒว ปุน เฒี้ยว ฮนั้ม เญย สีง ติ่น ม่าย หวุย. นิ่น บัว หล่ง ป๋าย กั้น ฝีง เมี่ยน เญย เฒี่ยน วั้ว เต๋ย เซียะ โหฒว เอ๊า.

12ตะฟ่าน โหฒว น้าย หญู่ง สี่ เญย เมี่ยน โท้ เฒี้ยว ไพ กวั่ง, ไม้ ปุน นิ่น บัว เยียม อิสะลาเอน เมี่ยน บุด๋ง, ไม้ กุ๊น นิ่น ต้อ กะน้าย ต้าย ฝ่ง ห่อ ปุน เน่น เจี๋ย เญย เฒี้ยว.

13“เม่ย บัว หย่า ฮนั้ง น้าย นอ โหฒว. เม่ย บัว ววม-เหมว่ย เหลี่ยว เหฌี่ย เหยียม เฒี้ยว เญย เหฒี่ย-ต้อง. เม่ย บัว เฑ่า ไห่, ชะ เญี้ยม, เหว่ย หฒุ นิ่น ไม้ หมั่ง หย่า ไม้ ปวั๊ง เฮญี้ยว ฒิบ เม่ย บัว เญย ปั์ว ฝ่ง ห่อ เญย กะน้าย.

14เม่ย บัว หน่าย ก๋า, ‘ เฒี้ยว เหว่ย หาย ติ่ว ไม้ ฒิบ?’ เซ เหว่ย หฒุ เฒี้ยว เยียม เม่ย เหธา เม่ย หฮญัง-เจ๊ย หลุน ตุ๊ ต้าย เญย เอ๊า บุด๋ง โหฒว ฒอง-เหฒง. นิ่น โหฒว เม่ย เญย ไธ-ต๋อย, เหธา เม่ย แล์ง เจี๋ย แหง่ง หว่า, เม่ย หธ่อ ไม้ เหฒียบ ฒัวะ เญย โหฒว ปุน นิ่น.

15“เซ ไม้ เฒ์ย วั้ว เต้า ดุ เต้า ทิน-ฮู่ง ปุน นิ่น บัว เป๋น เหยียด เต้า ไฟ? เลี่ยม ซิน เลี่ยม เฮญี้ยว หย่า นิ่น เญย ไม้ เฒ์ย? นิ่น เหว่ย หาย ติ่ว ปุน นิ่น บัว เป๋น เหยียด เต้า? เหว่ย หฒุ นิ่น อ๋อย นิ่น บัว ม่าย กัน หลง ทิน-ฮู่ง เญย น่าม โญ์ว. เหว่ย น้าย อ๋อย หฒุ ไฝ ฟิม กุ๊น เจี๊ยน เม่ย บัว เญย เฮญี้ยว. ไม้ ตู๋ง ปุน หาย เต้า ไม้ เหฒียบ ฒัวะ เญย โหฒว ปุน ต้ง หฮญัง-เจ๊ย หลุน เญย เฒี่ยง โห่ ตุ๊ ต้าย เญย เอ๊า.”

16เฒี้ยว, อิสะลาเอน เญย ทิน-ฮู่ง, ก๊อง, “เยีย ฑอง ไห่ เล่ย ไธ-ต๋อย เญย สี่, หย่า ฑอง เมี่ยน เหฒย กั้น เญย เอ๊า.” เน่น เจี๋ย เญย เฒี้ยว ฮนั้ง น้าย นอ ก๊อง. “เหว่ย น้าย เม่ย บัว อ๋อย หฒุ ไฝ ฟิม, กุ๊น เจี๊ยน เม่ย บัว เญย เฮญี้ยว. ไม้ ตู๋ง โหฒว ไม้ เหฒียบ ฒัวะ เญย สี่.

17“หลาย เม่ย บัว ก๊อง เญย หว่า, เม่ย บัว โหฒว ปุน เฒี้ยว โหยว ไห่. “เม่ย บัว หธ่อ ก๊อง, ‘เยีย บัว ฮนั้ง หาย นอ โหฒว ปุน เฒี้ยว โหยว แล่?’ “เม่ย บัว ก๊อง, ‘เอย เฒี้ยว หมั่ง, ตะฟ่าน โหฒว เอ๊าะ เญย เมี่ยน เซ คู้ เมี่ยน. เฒี้ยว หย่า อะเฮน้ย นิ่น บัว.’ ไฟ เม่ย บัว หน่าย, ‘แป้ง ฟิม เญย ทิน-ฮู่ง เยียม หาย?’”

← Chapter 1 Jump to: Chapter 3 →