Nehemiah 5

Mien Bible (Thai Script) © Thailand Bible Society, 2007

← Chapter 4 Jump to: Chapter 6 →

1ม่าย แปะ ฝีง เหธา นิ่น บัว เญย เอ๊า ชะ! งบ นิ่น บัว เญย ก๋อ-โย์ว, ยิวไท เมี่ยน.

2ม่าย เต๋ย ก๊อง, “เยีย บัว เหธา เยีย บัว เญย ตอน-เจว๊ย น่าม โญ์ว ธั้ม ไห่. เยีย บัว เฉียม หฒุ ตุ๊ หฮนาง หญั่น เหว่ย ยู์ง เยีย บัว เญย แหม่ง.”

3ม่าย เต๋ย ก๊อง, “หลาย หง่อ หฮนาง, เยีย บัว อ๋อย หฒุ ต๋อง เจี๊ยน เยีย บัว เญย ลี่ง เต่ย, อะหงุ่น หฮวีง เหธา เยีย บัว เญย เปย๊า เหว่ย ตุ๊ หฮนาง หญั่น.”

4แอ๋ง ม่าย เต๋ย ก๊อง, “เยีย บัว อ๋อย หฒุ ก๊า ญ่าน ต้าย ธ้วด ลี่ง เต่ย เหธา อะหงุ่น หฮวีง เญย โฑว-ฒิ่น ปุน ฮู่ง เตี๋ย.

5เยีย บัว เหธา เยีย บัว เญย ก๋อ-โย์ว ต้ง ฝีง ยิวไท เมี่ยน. เยีย บัว เญย น่าม โญ์ว เหธา นิ่น บัว เญย น่าม โญ์ว หย่า ฟี่ ฮนั้ง เญย. มป่า เยีย บัว อ๋อย หฒุ ปุน เยีย บัว เญย ตอน, เยีย บัว เญย เซียะ, โหฒว เมี่ยน เญย โน่ว. ม่าย เต๋ย เยีย บัว เญย เซียะ ฒู้ง หฒุ โหฒว โน่ว หมี่ อ๊ะ. เยีย บัว หย่า ไม้ ไฮ่ เถง ไม้ ตุ๊ นิ่น บัว, เหว่ย หฒุ เยีย บัว เญย ลี่ง เต่ย เหธา อะหงุ่น หฮวีง หฒุ เมี่ยน เฒาะ หมี่ อ๊ะ.”

6เยีย ไฮ์ น้าย เต๋ย เมี่ยน ชะ ก๊อง เญย หว่า, เยีย เฉีย เจี์ย ไห่.

7เยีย หลงๆ เญย ฮนั้ม เถา น้าย เต๋ย สี่ ฯฒฯ โก๋ โหฒว โฮล โหฒว เจียน เญย เมี่ยน. เยีย ก๊อง, “เม่ย บัว เก๊าะ-เมี่ยน ปู๋ง แฒะ ปุน เม่ย บัว จวั่ง ฝีง เญย ก๋อ-โย์ว หย่า หล่ง เหล่ย.” เยีย ฯฒฯ เห่ว เมี่ยน ธั้ม กั๊บ ฒุ้น เหว่ย เบ่น ซูง น้าย ติ้ว เจ๊า.

8เยีย ก๊อง, “หฒิว เยีย บัว ไฮ่ โหฒว ตุ๊ เญย, เยีย บัว หฒัวะ บัว เญย ก๋อ-โย์ว หฑวน, ต้ง หฒุ หม่าย ปุน จั๋น เญย ยิวไท เมี่ยน. ต๋าว หฑวน เม่ย บัว อี้ หฒั่น หม่าย เม่ย บัว เญย ก๋อ-โย์ว เหว่ย ปุน เยีย บัว อ๋อย หฒุ หฒัวะ หฑวน ไม้ เฒ์ย!” นิ่น บัว ฯฒฯ เซ้กๆ เญย, ฒู้ง ล์อ ไม้ ตุ๊ หว่า เตา.

9เยีย แอ๋ง ก๊อง, “เม่ย บัว ฮนั้ง น้าย นอ โหฒว เซ ไม้ หอบ. เม่ย บัว โหฒว สี่ อ๋อย หฒุ กั้ม เหฑีย, ท่าย บัว เญย ทิน-ฮู่ง, เหว่ย เปว เจี๊ยน, ไม้ ปุน บัว เญย วิน-วั้ง ต้าน บัว ไม้ เฒ์ย?

10เยีย เหธา เยีย เญย ก๋อ-โย์ว เหธา เยีย เญย กง-เมี่ยน ฟี่ ฮนั้ง เญย ก๊า ญ่าน ก๊า เบย้า ปุน บัว เญย ก๋อ-โย์ว. มป่า อ๋อย หฒุ กวั่ง เหฌี่ย, ไม้ ตู๋ง หล่ง เหล่ย.

11อี้ หฒั่น อ๋อย หฒุ เฒาะ นิ่น บัว เญย ลี่ง เต่ย, อะหงุ่น หฮวีง, กะลั้น เปี๊ยว หฮวีง เหธา นิ่น บัว เญย เปย๊า ถุย หฑวน. เลี่ยม เม่ย บัว ตุ๊ นิ่น บัว เญย เหล่ย, เซ ตุ๊ ญ่าน, เบย้า, เซียง-อะหงุ่น ติ๊ว เหธา กะลั้น โย่ว เหยียด แป๊ะ โก๊ว เญย เหยียด โก๊ว หย่า อ๋อย หฒุ ถุย หฑวน.”

12โหฒว โฮล เญย เมี่ยน ก๊อง, “เยีย บัว ฒู้ง อ๋อย ถุย หฑวน หย่า ไม้ เห่ว นิ่น บัว แอ๋ง จา ทิบ หาย หญู่ง. เยีย บัว เก้ง ฮนั้ง เม่ย ก๊อง นอ โหฒว.” เยีย ฯฒฯ เห่ว ไซ เมี่ยน ต้าย หย่า ปุน โหฒว โฮล โหฒว เจียน เญย หฒวัง เมี่ยน โฮ้ว เจี๊ยน ก๊อง นิ่น บัว อ๋อย หฒิว นิ่น บัว แล์ง เญย หว่า โหฒว.

13เยีย หย่า โซว เยีย ไซ เจี๊ยน วั้ว คว้าย เดีย หย่า ก๊อง, “หาย เต้า ไม้ เอย เจี๊ยน น้าย เต๋ย แล์ง เญย หว่า โหฒว, ทิน-ฮู่ง อ๋อย ฮนั้ง น้าย นอ โซว วั้ว เต้า ธ้วด นิ่น เญย เปย๊า หย่า โซว ขูง เหฑ่ง นิ่น เญย จา-ตี้ง เญย กะน้าย. ปุน น้าย หญู่ง เมี่ยน หฒุ โซว เถา ขูง-ปั์ว แปะ เหฒา เญย มี่ง อ๊ะ.” กั๊บ ฒุ้น เญย หฒวัง เมี่ยน ก๊อง, “อาเมน,” หย่า เธง เฒี้ยว. โหฒว โฮล โหฒว เจียน เญย เมี่ยน ฯฒฯ เอย เจี๊ยน นิ่น บัว แล์ง เญย หว่า โหฒว.

14ธ้วด ลิ์ว น้าย, เยียม พ้าย เยีย โหฒว ยูดา เต่ย-ปูง เญย แซ้ง-เฒี้ยว วั้ว เต๋ย เหฒียบ เหญ่ย หฮญัง กะญั์ว, เซ เยียม อานทาเซซี้ด โหฒว ฮู่ง หญี่ เหฒียบ หฮญัง เถา ฟ่า เหฒียบ เหญ่ย หฮญัง วั้ว หฮญัง, เลี่ยม เยีย เลี่ยม เยีย เญย ก๋อ-โย์ว, ไม้ หญั่น โหฒว แซ้ง-เฒี้ยว หอบ หฒุ ตุ๊ เญย ป่วน หญั่น ฮบ.

15เยียม ด่าง เยีย วั้ว เต๋ย แซ้ง-เฒี้ยว ห่อย แปะ ฝีง ดาม เฮนี้ย. โม์ว ฮนอย อ๋อย หฒุ ปุน หญั่น ฮบ เหธา อะหงุ่น ติ๊ว เหธา เหฒียบ ลู์ง ญ่าน. เลี่ยม นิ่น บัว เญย ฟิ้ว-เจียน เหธา เจี๊ยน ห่อย แปะ ฝีง. มป่า เยีย ไม้ ฮนั้ง หน่าย โหฒว เหว่ย หฒุ เยีย ท่าย ทิน-ฮู่ง.

16ต๋าว หฑวน เยีย หล่ง ชะ หฒ่อ ฒี่ง หลาด, หย่า ไม้ ล์อ กั้น เญย เดา-ป่วน. เยีย เญย เมี่ยน หย่า กั๊บ ฒุ้น เยียม ฒี่ง หลาด โหฒว กง.

17ไม้ ตาน บัวะ น้าย. ม่าย ยิวไท เมี่ยน เหธา เจียน เหยียด แป๊ะ ฮม์ เหฒียบ เต้า เหธา เยีย จวั่ง เตี้ย หญั่น หฮนาง. หธ่อ แอ๋ง ม่าย เต๋ย เว่ย ก๋อม เยีย บัว วั้ว เต๋ย นอมๆ กั๊วะ เญย เมี่ยน ต้าย เยีย บัว น้าย.

18ฮนอยๆ เบ่น เญย หญั่น ฮบ อ๋อย หฒุ ม่าย เหยียด เต้า ง่ง, จุ๊ เต้า ปะกี ยู่ง จุ่น เหธา ไจ เหธา อ๊าบ ธั้ม เญย. โม์ว เหฒียบ ฮนอย อ๋อย หฒุ ม่าย เหฒีย ด๊บ-บัวะ หญู่งๆ อะหงุ่น ติ๊ว. ไม้ กุ๊น อ๋อย หฒุ เบ่น ด่ง หน่าย ธั้ม, เยีย หย่า ไม้ เห่ว นิ่น บัว ธ้วด เยีย โหฒว แซ้ง-เฒี้ยว หอบ หฒุ ตุ๊ เญย ป่วน, เหว่ย หฒุ แปะ ฝีง ฒู้ง ดาม เฮนี้ย ไห่ อ๊ะ.

19“โอ เยีย เญย ทิน-ฮู่ง อ่า, โท้ เม่ย จั๋ง เจี๊ยน เยีย เหว่ย น้าย เต๋ย เมี่ยน โหฒว เญย เหยียด ฒู้ง สี่, ปุน เยีย ตุ๊ หลง.”

← Chapter 4 Jump to: Chapter 6 →