Philippians 3

Mien Bible (Thai Script) © Thailand Bible Society, 2007

← Chapter 2 Jump to: Chapter 4 →

1เยีย เญย ก๋อ-โย์ว อ่า, เซ้ด เมว์ย เยีย หธ่อ ม่าย เต๋ย หว่า ก๊อง. เม่ย บัว เหธา เฒี้ยว เยซู จวั่ง แหม่ง เฒี่ยง ฯฒฯ อ๋อย หฒุ ออน-เหลาะ อ๊ะ. ฒิ่น ด่าง เยีย เฟี้ย เจี๋ย เญย หว่า เยีย แอ๋ง เฟี้ย หฑุ่น เซ ไม้ หละเญ้า เยีย, มป่า เซ เหว่ย เปว เจี๊ยน เม่ย บัว.

2เม่ย บัว อ๋อย หฒุ บู้ง เจี๊ยน วั้ว เต๋ย จู๊, ต้ง โหฒว เอ๊าะ วั้ว เต๋ย เมี่ยน. นิ่น บัว ขูง ก๊าด หว่าย ซิน ฮนั้ง.

3เจี๋ย เฒียน ก๊าด เญย เล์ย เซ ต้ง บัว เหว่ย หฒุ บัว เขา สีง ลี่ง หฒั่ง ทิน-ฮู่ง. บัว เหธา กีตู่ เยซู จวั่ง แหม่ง เฒี่ยง ฯฒฯ เฌียน-โย่ว ไห่. บัว หย่า ไม้ เขา กั้น ไฮ่ โหฒว เญย หาย หญู่ง.

4ไม้ กุ๊น เยีย ไฮ่ เขา กั้น โหฒว เญย, เยีย หย่า ไม้ เขา. หาย เต้า ฮนั้ม ต้าย ไฮ่ เขา กั้น โหฒว เญย, เยีย เก้า ไฮ่ เขา.

5เยีย ธ้วด เสย ต้าย ปวั๊ง เหฮยียด ฮนอย ฯฒฯ เจี๋ย ก๊าด เญย เล์ย. เยีย ธ้วด เสย เป๋น อิสะลาเอน เมี่ยน, เบนยามิน ฝีง, ม่าย ฮิบลู เมี่ยน เญย ฑย้าม-เฟย ฮนั้ง. เอย กัน ยิวไท เมี่ยน เญย เล์ย-หลัด เยีย เซ ต้ง ฟาลิสี วั้ว เจ๊า เมี่ยน.

6เยีย หย่า จอม เฮญี้ยว ไห่, ฒู้ง โหฒว โตะ ห่อย จิว-ปาง. ก๊อง เถา เอย เจี๊ยน เล์ย โหฒว, เยีย โหฒว หอบ เหฑ่ง, ไม้ ม่าย ต๋อง ต้าน.

7มป่า ฒิ่น ด่าง เยีย ฝุน หฒี่ ฒิ่น เญย, อี้ หฒั่น เยีย เหว่ย กีตู่ ฝุน ไม้ หฒี่ ฒิ่น อ๊ะ.

8ไม้ ตาน น้าย. เยีย ฝุน หญู่งๆ เซ ไม้ หฒี่ ฒิ่น เหว่ย ตุ๊ เหยียด หญู่ง เก้า จ๋าย เจี๋ย. จ๋าย เจี๋ย วั้ว หญู่ง เซ เยีย ไฮ่ ฮิ้ว ตุ๊ เยีย เญย เฒี้ยว กีตู่ เยซู. เยีย กวั่ง หญู่งๆ ฝุน เป๋น กะน้าย-กวั่ง เหว่ย ตุ๊ กีตู่,

9หย่า เหว่ย ตุ๊ เหธา นิ่น จวั่ง แหม่ง เฒี่ยง. เยีย กัน ยิวไท เมี่ยน เญย เล์ย-หลัด โหฒว มป่า ไม้ ตุ๊ เหธา ทิน-ฮู่ง หอบ เฮญี้ยว. เยีย ตุ๊ เหธา ทิน-ฮู่ง หอบ เฮญี้ยว เซ เหว่ย เยีย เสียน กีตู่. เซ ต้ง ทิน-ฮู่ง กั้น ปุน เยีย หอบ นิ่น เญย เฮญี้ยว เหว่ย หฒุ เยีย เสียน กีตู่.

10เยีย ขูง อ๋อย ฮิ้ว ตุ๊ กีตู่, หย่า ฮิ้ว ตุ๊ ปุน นิ่น นั่ง ต้าย เญย ต้ม ชะ, หย่า ม่าย ป่วน เหธา นิ่น เสี่ยว โค้ว, หย่า ฮนั้ง นิ่น นอ ไต่,

11เหว่ย หฒุ เยีย ม่าย ลั่ม ฮนั้ม เซ เยีย ไต่ มี่ง มป่า ทิน-ฮู่ง ฒู้ง อ๋อย ปุน เยีย นั่ง ต้าย.

12เยีย ไม้ เฒ์ย ก๊อง เยีย ตุ๊ ลิ์ว น้าย เต๋ย เหยียด ฒู้ง. หย่า ไม้ เฒ์ย ก๊อง เยีย ตุ้น ยุ่น เหฑ่ง. เยีย เหฌี่ย ชะ ถิว เจี๊ยน มี่ง เหว่ย อ๋อย เฒาะ ตุ๊ ฒี่ง เหญ่ย. เซ เหว่ย น้าย กีตู่ เยซู ฒู้ง เฒาะ เยีย ด่าง, เป๋น นิ่น เญย หมี่ อ๊ะ.

13ก๋อ-โย์ว อ่า, เยีย ไม้ เฒ์ย ฝุน เยีย เฒาะ ตุ๊ หมี่ อ๊ะ. เยีย ขูง โหฒว ดุ หญู่ง ฮนั้ง. เจี๋ย ต้าย เญย สี่ เยีย หละคุ เหฑ่ง หมี่ อ๊ะ, หล่ง ชะ หูง เจี๊ยน วั้ว ด่าง มี่ง,

14แปง หฒะ ถิว เถา เฒาะ ตุ๊ ฒี่ง เหญ่ย เญย ต๋อง, เซ ต้ง ทิน-ฮู่ง เห่ว เยีย เขา กีตู่ เยซู มี่ง เยียม กู้ หงว่าย ตุ๊ เญย ฒี่ง เหญ่ย.

15บัว หาย เต้า เอย ลี่ง ว่วน เญย เจ๊า เป๋น ต้ม เมี่ยน อ๋อย หฒุ ม่าย น้าย หญู่ง เฮญี้ยว. สี ก๊อง ม่าย เต๋ย กั้น หญู่ง ฮนั้ม, ทิน-ฮู่ง ฯฒฯ ปุน เม่ย บัว ฮิ้ว ตุ๊ เซ กั้น หญู่ง หมี่ อ๊ะ.

16มป่า บัว ยั่ง เยซู เญย เจ๊า เถา หาย, อ๋อย หฒุ เอย เจี๊ยน วั้ว ยั่ง.

17เยีย เญย ก๋อ-โย์ว อ่า, เม่ย บัว อ๋อย หฒุ ล่ม ฑ่อย หฒวด เยีย เญย หญู่ง โหฒว. หย่า อ๋อย หฒุ หลงๆ หมั่ง กัน เยีย บัว เญย หญู่ง โหฒว วั้ว เต๋ย เมี่ยน.

18เหว่ย หฒุ เยีย บั๋ว เหฒีย หฑุ่น เม่ย บัว, อี้ หฒั่น ววม-เหมว่ย เหลี่ยว เจี๊ยน แอ๋ง บั๋ว หฑุ่น, ม่าย เมี่ยน ธั้ม เญย หลาย นิ่น บัว โหฒว เญย สี่ เซ โหฒว กีตู่ เญย เหฒียบ หฑั่ง จ๋า เญย วิน-วั้ง.

19มป่า เซ้ด เมว์ย นิ่น บัว ฒู้ง หฒุ เหมียด เหว่ย หฒุ นิ่น บัว เญย เฒี่ยน เซ นิ่น บัว กั้น เญย กะเซีย. หอบ หฒุ ไญ้ เญย สี่ ต๋าว หฑวน นิ่น บัว ต้อ ต้าย โหฒว เม่ง เต้า. นิ่น บัว ขูง ฮนั้ม เถา ป้าม เกน เญย เจ๊า ฮนั้ง.

20มป่า บัว โหฒว ทิน-ต้อง เญย แปะ ฝีง หย่า ฒั้ว เจี๊ยน บัว เญย เหฌียว เฒี้ยว เยียม วั้ว ทิน-ต้อง ต้าย, เซ เฒี้ยว เยซู กีตู่.

21นิ่น อ๋อย หล่ง นิ่น เญย ต้ม ชะ, ต้ง นิ่น หล่ง ปุน หม่าน หมวด เยียม นิ่น เญย ปั์ว-เดี๊ย เญย ต้ม ชะ, เฒาะ บัว เมา ไห่, ไฮ่ ไต่ เญย ซิน ก๊อย เหยี่ยน ฯฒฯ ฮนั้ง นิ่น ฌัง-หล่าง เญย ซิน นอ.

← Chapter 2 Jump to: Chapter 4 →