Philippians 4

Mien Bible (Thai Script) © Thailand Bible Society, 2007

← Chapter 3 Jump to:

1เยีย เญย ก๋อ-โย์ว อ่า, เยีย หฒะเก้ง ฮนั้ม ไห่, จั๋ง ไห่ เม่ย บัว. เม่ย บัว ปุน เยีย อะเฮน้ย, ปุน เยีย ออน-เหลาะ ไห่. เธียน ฮนั้ม เญย ก๋อ-โย์ว อ่า, ฮนั้ง หน่าย เม่ย บัว อ๋อย หฒุ เขา ว้วน เฒี้ยว.

2เยีย โท้! ยูโอเดีย เหธา สินทิเค, เม่ย บัว อี เต้า อ๋อย หฒุ เขา เฒี้ยว หอบ ฟิม ต้ง เอ๋ย.

3เหฒียบ ฒัวะ จวั่ง กง โหฒว เญย ต่อย อ้า! เยีย หย่า โท้ เม่ย เถง น้าย เต๋ย อี เต้า มเซียะ ตอน, เหว่ย หฒุ นิ่น บัว เหธา เยีย ชะ โหฒว คู้ เฝียน เญย กง, แอ๋ง ม่าย เคนเมน เหธา เหฒ่ง เหฌี่ย เญย จวั่ง กง โหฒว เญย เมี่ยน, ต้ง ม่าย บั๋ว ฝาว เจี๊ยน เฒี่ยง แหม่ง ตาน.

4เม่ย บัว อ๋อย หฒุ เขา เฒี้ยว เยซู หฒั่นๆ ม่าย ออน-เหลาะ. เยีย แอ๋ง ก๊อง หฑุ่น, อ๋อย หฒุ ออน-เหลาะ ม่าะ!

5อ๋อย หฒุ ปุน เมี่ยน เฒียะ ตุ๊ เม่ย บัว โหฒว เฮญี้ยว ส่วน เญย เมี่ยน. เฒี้ยว เยียม ฟัด อ๊ะ.

6ไม้ ตู๋ง เหว่ย หาย หญู่ง กว๋า เฮญี้ยว. อ๋อย หฒุ เหว่ย หญู่งๆ สี่ เต๋า เก๋า โจ้ว ทิน-ฮู่ง, แล์ง ฒี่ง ทิน-ฮู่ง, เอย เม่ย บัว เฉียม หล่ง เญย โท้ นิ่น เถง.

7ทิน-ฮู่ง เญย แป้ง ออน, ต้ง ป้าม เมี่ยน ฒู้ง ฮนั้ม ไม้ หฒ่าย เญย แป้ง ออน, ฯฒฯ เปว เจี๊ยน เม่ย บัว เญย เฮญี้ยว เหธา ฮนั้ม เญย เจ๊า, เหว่ย หฒุ เม่ย บัว เหธา กีตู่ เยซู จวั่ง แหม่ง เฒี่ยง.

8เยีย เญย ก๋อ-โย์ว อ่า, เยีย แอ๋ง ก๊อง เต๋ย เซ้ด เมว์ย หว่า. หาย หญู่ง เฒียน เญย, หอบ หฒุ ท่าย เญย, แป้ง ฟิม เญย, ธีง-เหฑ่ง เญย, หอบ หฒุ ฮนั้ม เญย, เม่ง เต้า หลง เญย, น้าย เต๋ย หลง ไห่, หอบ หฒุ เธง เญย เหยียด ฒู้ง อ๋อย หฒุ หฒัน เจี๊ยน เฮญี้ยว.

9เยีย หฌาว เม่ย บัว โหะ ลิ์ว หย่า ปุน เม่ย บัว ตุ๊ ฒิบ เญย, ต้ง เม่ย บัว ไฮ์ เยีย ก๊อง, หย่า ปวัด เยีย โหฒว เญย หญู่งๆ, เม่ย บัว อ๋อย หฒุ เอย เจี๊ยน โหฒว. ฮนั้ง หน่าย, เหธย แป้ง ออน เญย ทิน-ฮู่ง ฯฒฯ เหธา เม่ย บัว เยียม อ๊ะ.

10เฒี้ยว ปุน เยีย หฒะเก้ง ออน-เหลาะ ไห่ เหว่ย หฒุ แฆะ เล่า เต๋ย มป่า อี้ หฒั่น เม่ย บัว แอ๋ง จั๋ง เถา เยีย. เยีย ไม้ เฒ์ย ก๊อง เม่ย บัว ไม้ จั๋ง, เซ เม่ย บัว ไม้ ม่าย ฉัง ปุน เยีย ฮิ้ว ฮนั้ง.

11เยีย หย่า ไม้ เฒ์ย ฮนั้ง น้าย นอ ก๊อง เหว่ย หฒุ เยีย เฉียม หฒุ หาย หญู่ง. เยีย โหะ ลิ์ว ฯฒฯ ฮิ้ว ตุ๊ ไม้ กุ๊น ม่าย ธั้ม ไฟ โหฒะ เยีย ปวั๊ง เฮญี้ยว อ๊ะ.

12เยีย ฮิ้ว ตุ๊ ปวั้ง ตั๋ง-โต้ว เญย เฒี่ยง โห่, หย่า ฮิ้ว ตุ๊ ปวั้ง ม่าย เบี่ยน เญย เฒี่ยง โห่. เยีย โหะ ลิ์ว ฯฒฯ ฮิ้ว ตุ๊ หาย หฒั่น, เยียม หาย เดา, ตุ๊ หญั่น เป๊ว ไฟ เฮญี้ยว เซีย เจี๊ยน เยียม, ม่าย เหฒ่ง ไฟ ไม้ เก๋า หล่ง, เยีย ปวั๊ง เฮญี้ยว อ๊ะ.

13กีตู่ ปุน เยีย ม่าย ชะ, หญู่งๆ เยีย ฯฒฯ โหฒว ตุ๊ อ๊ะ.

14มป่า เยีย ม่าย ขวน น่าน เญย เฒี่ยง โห่ เม่ย บัว เถง เยีย, น้าย เซ หลง ไห่ อ๊ะ.

15เม่ย บัว ฟีลิบพอย เมี่ยน ฮิ้ว ตุ๊ เยีย เจี์ย กอน ฒุ่น คู้ เฝียน, ธ้วด มาซีโดเนีย วั้ว หฒั่น ไม้ ม่าย กั้น นอม จิว-ปาง ฝูง เยีย หล่ง เปียะ หล่ง ธ้วด เญย ญ่าน, ขูง เม่ย บัว กั้น เญย ฮนั้ง.

16เยีย เยียม เทสะโลนิกา วั้ว หฒั่น เยีย เฉียม หฒุ เญย เม่ย บัว จุ๋ย ต้าย ไม้ เฒ้ย เหยียด หฑุ่น.

17เยีย หย่า ไม้ เฒ์ย ขูง อ๋อย ฒิบ เม่ย บัว เญย ฒี่ง เหญ่ย. เยีย อ๋อย เม่ย บัว เญย แฒะ-ตาน ตุ๊ เหล่ย ฒิ่น ธั้ม เจี๊ยน ฝาว.

18เม่ย บัว ฝูง ต้าย เญย กะน้าย เยีย ตุ๊ ฒิบ ฑ่อย หมี่ อ๊ะ, ฒู้ง เก้า ธั้ม. เอปาโฟดิทัด ต้อ เม่ย บัว จุ๋ย เญย ฒี่ง เหญ่ย เถา, เยีย เฉียม หล่ง เญย ฯฒฯ เก๋า เหฑ่ง อ๊ะ. เม่ย บัว เญย กะน้าย เซ ฮนั้ง เหฒี่ย เญย กะน้าย นอ, ทิน-ฮู่ง ไฮ์ ดาง เญย ฯฒฯ อะเฮน้ย ฒิบ.

19เยีย เญย ทิน-ฮู่ง ม่าย ฑ่อย หญู่งๆ. เม่ย บัว เฉียม หฒุ เญย เหยียด ฒู้ง, หฒิว นิ่น ม่าย เญย นิ่น ฯฒฯ หล่ง กีตู่ เยซู เหธย ปุน เม่ย บัว.

20บัว อ๋อย หฒุ เหยียด ลิ์ว เธง บัว เญย หฒั่ง เตี๋ย ทิน-ฮู่ง เถา หม่าน โก๊ว หม่าน ต่อย. อาเมน.

21โท้ บั๋ว เสียน กีตู่ เยซู เญย หฒวัง เมี่ยน เยีย จั๋ง เถา นิ่น บัว. เหธา เยีย เยียม น้าย เญย หฒวัง ก๋อ-โย์ว หย่า จั๋ง เถา นิ่น บัว.

22เหยียด หฒวัง เสียน กีตู่ เญย เมี่ยน, เหล่ง เจ๊ย โลมา ฮู่ง เญย เปย๊า ฒง วั้ว เต๋ย, หย่า จั๋ง เถา เม่ย บัว.

23โท้ เฒี้ยว เยซู กีตู่ เหธย เอน ปุน เม่ย บัว.

← Chapter 3 Jump to: