Nahum 2

Javanese KJS17 (Kitab Jawa Suriname)

← Chapter 1 Jump to: Chapter 3 →

1Lah, ana tukang pengrusak sing nekani kowé, nganakna penjagan ing bèntèng ngungaka ing dalan, bangkèkanmu sabukana sing kentyeng, nglumpukna sak kabèhé kekuwatan!

2GUSTI mulihké menèh kaluhurané Yakub, kaya kaluhurané Israèl, awit wis dirusak karo tukang pengrusak pangé wis pada disempalké.

3Tamèngé para pahlawané rupané abang, para suradaduné pada nganggo abang-abang, krétané nggilap murup kaya geni ontyor ing dina enggoné dirakit, jaran-jarané pada kétok njingrak-jingkrak.

4Krétané mbalap ing dalan, susul-susulan ing lapangan, kétoké kaya ontyor, playuné kaya klélap.

5Penggedéné suradadu dibudalké, sikilé mèh kejengklok waktu ijik maju. Mblayoni bèntèngé kuta karo kesusu, lan piranti kanggo njebol wis didekké.

6Gapura-gapurané kali-kali wis pada mbukak, lan kratoné terus gempur.

7Ninewé kaya ratu wadon, digawa metu lan diblèjèti, lan para baturé wadon pada nangis kaya ndengkuré manuk dara, karo ngantem-ngantem dada.

8Ninewé déwé kuwi kaya blumbang sing banyuné mili metu. Ana wong sing mbengok: “Mandeka, mandeka!” Nanging ora ana sing nolèh.

9Pada ngrebuta slaka, ngrebuta emas, awit tanpa itungan simpenané banda, piranti-piranti sing apik okèhé ora karuan.

10Wis ludes, pandes, nandes! Ati nglokro, dengkul oklak-aklik, wetengé gemeter kabèh, praupané wong kabèh pada putyet tanpa getih.

11Ing ngendi ta pandelikané singa lan guwané singa-singa nom, panggonané singa lan singa wédok klinteran, panggoné anak singa, sing ora diganggu-gawé karo wong?

12Singa kuwi lumrahé ndekep kanggo nyukupi pangané anak-anaké, lan nekek memangsané kanggo sing wadon, lan ngebaki guwané karo pangan lan pandelikané karo dekepané.

13Tembungé GUSTI sing ngwasani langit lan bumi: “Aku bakal nglawan marang kowé, Ninewé, terus sak kabèhé krétamu bakal Tak obong nganti dadi kebul, lan singamu nom bakal pada dipangan karo pedang nganti entèk; lan memangsamu bakal Tak entèkké sangka bumi, swarané para kongkonanmu bakal ora krungu menèh.”

← Chapter 1 Jump to: Chapter 3 →