1 Chronicles 29

Институт перевода Библии, 2022

← Chapter 28 Jump to:

1Dawıt patsha pútkil jámiyetke bılay dedi: – Quday tańlap alǵan ulım Sulayman jas hám tájiriybesiz. Al qılınatuǵın is júdá úlken. Sebebi bul imarat adam ushın emes, al Quday Iye ushın salınadı.

2Qudayımnıń Úyi ushın qolımnan kelgeninshe altın buyımlar ushın altın, gúmis buyımlar ushın gúmis, qola buyımlar ushın qola, temir buyımlar ushın temir, aǵash buyımlar ushın aǵash, jáne de, oniks, qasnaqqa qoyılatuǵın taslar, periwza, hár túrdegi reńli taslar, sonday-aq, qımbatbaha taslardıń hámme túrlerin hám kóp muǵdarda mramor jıynadım.

3Bulardan tısqarı, Qudayımnıń Úyine bolǵan ıqlasım sebepli, ózimniń jeke qaznamdaǵı altın menen gúmisti de Qudayımnıń Úyine beremen. Olardı bul muxaddes Úy ushın ózim tayarladım.

4Men berip atırǵan úsh mıń talant Ofir altını menen jeti mıń talant sap gúmis Úydiń diywalların qaplaw,

5barlıq altın hám gúmis buyımlardı islew ushın hám ónermentlerdiń barlıq islerinde qollanılsın. Jáne de, kim búgin ózin Jaratqan Iyege baǵıshlap, Oǵan óz ıqtıyarı menen sadaqa beriwdi qáleydi?

6Sonda áwlad basshıları, Izraildıń urıw basshıları, mıńbasılar, júzbasılar hám patshanıń islerin basqaratuǵın xızmetkerler ıqtıyarlı sadaqalar berdi.

7Olar Qudaydıń Úyiniń qurılısı ushın bes mıń talant altın menen on mıń darik altın, on mıń talant gúmis, on segiz mıń talant qola hám júz mıń talant temir sawǵa qıldı.

8Bahalı tasları bar adamlar olardı Jaratqan Iyeniń Úyiniń qaznasına, Gershonnıń urpaǵınan bolǵan Exieldiń qolına tapsırdı.

9Xalıq óz basshılarınıń ıqtıyarlı túrde bergen sıyları ushın quwandı. Óytkeni olar Jaratqan Iyege shın júrekten ıqtıyarlı túrde sadaqalar berip atırǵan edi. Dawıt patsha da qattı quwandı.

10Dawıt pútkil jámiyettiń kóz aldında Jaratqan Iyeni alǵıslap, bılay dedi: «Babamız Izraildıń Qudayı Jaratqan Iye, Máńgige Saǵan alǵıslar bolsın!

11Jaratqan Iye, ullılıq, qúdiret, dańq, Jeńis hám saltanat Seniki. Aspanda hám jerde bolǵan hár bir nárse Seniki. Patshalıq ta Seniki, Jaratqan Iye! Sen hár bir nárseden joqarısań.

12Baylıq hám húrmet Sennen keler. Hámme nársege húkimdarsań. Kúsh hám qúdiret Seniń qolıńda. Birewdi joqarılatıw hám kúshli qılıw, Seniń qolıńda.

13Endi, Qudayımız, Seni táriyiplep, Ájayıp atıńa alǵıs-maqtawlar aytamız.

14Biraq Saǵan ıqtıyarlı sadaqalar bere alatuǵınday, men kimmen, xalqım kim bolıptı? Hár bir nárse Sennen shıǵadı, bizler tek Seniń qolıńnan alǵanlarımızdı ǵana Saǵan berip atırmız.

15Seniń aldıńda bizler ata-babalarımız sıyaqlı, jat jerli kelgindimiz. Jer júzindegi ómirimiz kóleńke sıyaqlı ótkinshi hám úmitsiz.

16Qudayımız Jaratqan Iye, muxaddes atıńa arnap Úy qurıw ushın bizler tayarlaǵan mına aǵıl-tegil baylıqtı Seniń qolıńnan alǵanbız, hámmesi Seniki.

17Qudayım, men Seniń júrekti sınaytuǵınıńdı hám hadallıqtı unatatuǵınıńdı bilemen. Mına nárselerdiń hámmesin men shın júrekten ıqtıyarlı túrde berdim. Házir usı jerde turǵan xalqıńnıń da Saǵan ıqtıyarlı sadaqalar berip atırǵanın quwanısh penen kórip turman.

18Jaratqan Iye, babalarımız Ibrayımnıń, Ísaqtıń hám Izraildıń Qudayı! Xalqıńnıń bul qálewin máńgige olardıń júreginde saqlap, júreklerin Ózińe sadıq qálpinde saqlap qala gór!

19Ulım Sulaymanǵa da Seniń buyrıqlarıńa, qararlarıńa hám qaǵıydalarıńa boysınıwı ushın, jáne de men kerekli zatlardı tayarlap qoyǵan Úydi qurıwı ushın sadıq júrek bere gór!»

20Sońınan Dawıt pútkil jámiyetke: – Qudayıńız Jaratqan Iyeni alǵıslańlar! – dedi. Solay etip, hámmesi ata-babalarınıń Qudayı Jaratqan Iyeni alǵısladı, Qudaydıń hám patshanıń aldında basların iyip, tájim etti.

21Kelesi kúni xalıq Jaratqan Iyege arnap, mıń bas buǵa, mıń bas qoshqar, mıń toqlı shalıp, jandırılatuǵın qurbanlıqlar berdi. Bularǵa qosa, ishimlik sadaqaların da usındı. Pútkil izraillılar ushın basqa da kóp qurbanlıqlar berildi.

22Sol kúni izraillılar úlken quwanısh penen Jaratqan Iyeniń aldında iship-jedi. Keyin, Dawıttıń ulı Sulaymandı ekinshi márte patsha dep tastıyıqladı. Sulaymandı Jaratqan Iyeniń aldında maylap, húkimdar, al Sadoqtı maylap, ruwxaniy etip qoydı.

23Solay etip, Sulayman ákesi Dawıttıń ornına patsha bolıp, Jaratqan Iyeniń bergen taxtına otırdı. Ol tabıslı bolıp, pútkil Izrail oǵan boysındı.

24Barlıq basshılar, batırlar hám Dawıttıń ulları patsha Sulaymanǵa baǵındı.

25Jaratqan Iye pútkil Izraildıń kóz aldında Sulaymandı ullı mártebeli qıldı hám onı burınǵı Izraildaǵı patshalardıń hesh biri erise almaǵan saltanatqa bóledi.

26Ishay ulı Dawıt pútkil Izrail ústinen patshalıq etti.

27Dawıt Izrailda qırıq jıl patshalıq etip, onıń jeti jılın Xebronda, otız úsh jılın Erusalimde ótkizdi.

28Dawıt ǵarrılıq dáwranın súrip, baylıqqa hám izzet-húrmetke tolı kúnlerdi bastan keshirdi hám mazmunlı uzaq ómir súrip, bul dúnyadan kóz jumdı. Onıń ornına ulı Sulayman patsha boldı.

29Dawıt patshanıń patshalıq qurǵan dáwirindegi islegen isleri basınan ayaǵına shekem kózi ashıq Samueldiń, payǵambar Natannıń, wáliy Gadtıń qoljazbalarında jazılǵan.

30Bul jazbalar Dawıttıń patshalıǵı dáwirindegi isler, onıń qaharmanlıqları, onıń basınan keshirgen waqıyaları, Izrailda hám dógerektegi barlıq ellerde bolǵan waqıyalar tuwralı bayan etedi.

← Chapter 28 Jump to: