1 Peter 1

Институт перевода Библии, 2022

Jump to: Chapter 2 →

1Iysa Masiyxtıń elshisi Petrden, Pontus, Galatiya, Kappadokiya, Aziya hám Bitiniya úlkelerine tarqalıp ketken, sol úlkelerde jat jerli bolıp jasap atırǵan, Quday tárepinen tańlap alınǵanlarǵa sálem!

2Iysa Masiyxqa boysınıp, Onıń qanı ústilerińizge sebilip tazalanıwıńız ushın, Quday Áke sizlerdi ázelden-aq tańlap aldı hám Muxaddes Ruwx sizlerdi muxaddes qıldı. Sizlerge miyrim hám tınıshlıq mol-mol etip berilsin!

3Iyemiz Iysa Masiyxtıń Ákesi – Qudayǵa alǵıslar bolsın! Sebebi Ol Óziniń sheksiz miyrim-shápááti menen bizlerdi jańadan tuwıldırdı. Sonlıqtan Iysa Masiyxtıń ólimnen tiriliwi arqalı bizlerge sónbeytuǵın úmit berdi.

4Ol bizlerdi shirimeytuǵın, pák hám eskirmeytuǵın bir miyrasqa eristirdi. Usı miyras sizler ushın aspanda saqlawlı tur.

5Zamannıń aqırında ayan bolıwǵa tayar turǵan qutqarılıwǵa erisiwińiz ushın, sizler isenimińiz arqalı Qudaydıń qúdireti menen qorǵalmaqtasız.

6Usı sebepli quwanıp, shadlanıńlar. Házir qısqa bir waqıt hár túrli sınawlarǵa ushıraǵanıńızda azap shegiwge tuwra kelse de,

7bul isenimińizdiń taza bolıwı ushın paydalı. Hátte, joq bolıp ketetuǵın altın da otta taplanıp, sınaladı. Al sizlerdiń isenimińiz altınnan qımbatlıraq. Sınalǵan isenimińiz, Iysa Masiyx kelgende sizlerdi maqtaw, dańq hám húrmetke sazıwar qıladı.

8Sizler Masiyxtı kórmegen bolsańız da, Onı súyesizler. Házir Onı kóre almasańız da, Oǵan isenip, sóz benen aytıp jetkiziwge qıyın bolǵan bir ájayıp hám ullı quwanısh penen shadlanbaqtasızlar.

9Sebebi isenimińizdiń nátiyjesine, yaǵnıy janlarıńızdıń qutqarılıwına erisesizler.

10Sizlerge beriletuǵın miyrim haqqında payǵambarshılıq etip aytqan payǵambarlar bul qutqarılıw tuwralı muqıyatlap izlenip izertledi.

11Olardıń ishinde bolǵan Masiyxtıń Ruwxı Masiyxtıń shegetuǵın azapları hám sol azaplardan soń keletuǵın ullılıq haqqında aldın ala bildirgende, olar bulardıń qay waqıtta hám qalay bolatuǵının izertledi.

12Olardıń izertlep aytqanlarınıń ózleriniń zamanında emes, al sizlerdiń zamanıńızda bolatuǵının Quday olarǵa ashıq bildirdi. Bulardı, yaǵnıy Xosh Xabardı aspannan jiberilgen Muxaddes Ruwxtıń qúdireti menen járiyalawshılar sizlerge házir járiyaladı. Hátte, perishteler de bulardı biliwdi qattı qáleydi.

13Solay etip, aqıl-oyıńızdı is-háreketke tayarlap, sergek bolıńlar. Iysa Masiyx kelgende sizlerge beriletuǵın miyrimnen tolıq úmit etińler.

14Til alǵısh balalar sıyaqlı bolıp, Qudaydı bilmegen ótken ómirińizdegi jaman qálewlerińiz boyınsha jasamańlar.

15Kerisinshe, sizlerdi shaqırǵan Quday muxaddes bolǵanı sıyaqlı, sizler de hár bir is-háreketińizde muxaddes bolıńlar.

16Óytkeni bılay dep jazılǵan: «Muxaddes bolıń, óytkeni Men muxaddespen».

17Hesh kimniń bet-júzine qaramay, hár bir adamdı islerine qaray húkim etetuǵın Qudaydı «Áke» dep shaqıratuǵın bolsańız, jat jerli bolıp jasaytuǵın bul dúnyadaǵı ómirińizde Qudaydan qorqıp jasańlar.

18Xabarıńız bar, ata-babalarıńızdan qalǵan paydasız ómir tárizinen gúmis yamasa altın sıyaqlı ótkinshi nárseler menen satıp alınbadıńlar.

19Al Qudaydıń minsiz hám kemshiliksiz Qozısı bolǵan Masiyxtıń biybaha qanı menen satıp alınıp qutqarıldıńlar.

20Quday dúnyanı jaratpastan burın usı maqset penen Masiyxtı tańlap alıp, Onı bul aqırǵı kúnlerde sizler ushın jiberdi.

21Onı ólimnen tiriltip, dańqqa eristirgen Qudayǵa Ol arqalı isenesiz. Sol sebepli isenimińiz hám úmitińiz Qudayǵa qaratılǵan.

22Haqıyqatqa boysınıw arqalı óz janlarıńızdı gúnadan tazalaǵanlıqtan, tuwısqanlarıńızdı tuwısqanlıq súyispenshilik penen súyesizler. Solay etip, bir-birińizdi shın júrekten súyińler.

23Sizler óletuǵın násil arqalı emes, al ólmeytuǵın násil arqalı, yaǵnıy Qudaydıń tiri hám máńgilik sózi arqalı jańadan tuwıldıńız.

24Óytkeni: «Pútkil adamzat shópke, Onıń pútkil sán-saltanatı da daladaǵı gúlge uqsaydı, Shóp quwrap qalar, gúller tógiler.

25Biraq, Iyemizdiń sózi máńgi saqlanar». Usı sóz – sizlerge járiyalanǵan Xosh Xabar.

Jump to: Chapter 2 →