1 Peter 4

Институт перевода Библии, 2022

← Chapter 3 Jump to: Chapter 5 →

1Solay etip, Masiyx denesi menen azap shekti. Sizler de Masiyxta bolǵan oylar menen ózlerińizdi azap shegiwge tayarlańlar. Sebebi denesi azap shegip atırǵan adam gúna islewdi toqtatadı.

2Bunnan bılay, dúnyadaǵı ómirińizdiń qalǵan bóleginde adamnıń jaman qálewleri boyınsha emes, al Qudaydıń erki boyınsha jasańlar.

3Ótken ómirińizde isenbeytuǵın adamlarǵa jaǵatuǵın ádetlerdi islep jasaǵanıńız jeter! Sol waqıtları sizler buzıqshılıqqa, jaman qálewlerge, máskúnemlikke, ayshı-áshiretke, nápsiqawlıqqa hám jerkenishli butparazlıqqa berilip, ómir súrgen edińler.

4Endi bolsa, isenbeytuǵınlar sizlerdiń olar menen birlikte usınday nápsiqumarlıqta qatnaspaǵanıńız sebepli hayran bolıp, sizlerdi mazaq etip atır.

5Biraq olar bunıń ushın tiriler menen ólilerdi húkim etiwge tayar turǵan Quday aldında juwap beredi.

6Sol sebepli, ólilerdiń denesi basqalar qatarı ólip jazalansa da, ruwxı Quday sıyaqlı jasawı ushın, Xosh Xabar ólilerge de járiyalandı.

7Hámme nárseniń aqırı jaqın. Sonlıqtan duwa etiw ushın aqıl menen is tutıp, sergek bolıńlar!

8Eń baslısı, bir-birińizdi shın júrekten súyińler. Óytkeni súyispenshilik kóp gúnalardı juwadı.

9Narazılıq bildirmey, bir-birińizge miymandos bolıńlar.

10Hár birińiz jaqsı xızmetshi sıpatında Qudaydıń sizlerge miyrimlilik penen bergen hár túrli ruwxıy sıyların qollana otırıp, bir-birińizge xızmet etińler.

11Adamlar aldında sóylegen adam Qudaydıń sózine say sóylesin. Basqalarǵa xızmet etetuǵın adam Qudaydıń bergen kúshi menen xızmet etsin. Usılayınsha, Iysa Masiyx arqalı Quday hár bir iste alǵıslansın. Ullılıq hám qúdiret máńgi-baqıy Masiyxtiki. Awmiyin.

12Súyikli tuwısqanlarım, sizlerdi sınaw ushın keletuǵın awır azaptı tań qalarlıq nárse dep, hayran bolmańlar.

13Kerisinshe, Masiyxtıń azaplarına sherik bolǵanıńızǵa quwanıńlar. Solay etip, Masiyx saltanat penen kelgende, quwanıp shadlanasızlar.

14Masiyxtıń atı ushın masqaralanıp atırǵan bolsańız, sizler baxıtlısızlar! Sebebi Qudaydıń ullı Ruwxı ústińizde boladı.

15Jáne hesh birińiz adam óltiriwshi, urı, jamanlıq islewshi yamasa basqalardıń jumısına aralasıp, kesent beretuǵın bolıp, azap shekpesin.

16Biraq sizler masiyxıy bolǵanıńız ushın azap shegip atırǵan bolsańız, uyalmańlar. Al bul at penen atalatuǵınıńız ushın Qudaydı alǵıslańlar.

17Óytkeni húkim shıǵarılatuǵın waqıt jetip keldi. Húkim shıǵarıwdı Quday Óz shańaraǵınan baslaydı. Eger bul Qudaydıń shańaraǵı bolǵan bizlerden baslansa, Qudaydıń Xosh Xabarına qulaq aspaytuǵınlardıń aqırı qanday boladı?

18«Eger ádil adam zorǵa qutqarılsa, Qudaysız hám gúnakar adamǵa ne boladı?»

19Sonlıqtan Qudaydıń erki menen azap shekkenler janların isenimli Jaratqanǵa tapsırsın hám jaqsılıq islewin dawam etsin.

← Chapter 3 Jump to: Chapter 5 →