1 Thessalonians 4

Институт перевода Библии, 2022

← Chapter 3 Jump to: Chapter 5 →

1Endi bolsa, tuwısqanlar, Qudayǵa unaw ushın qalay jasaw kerekligin sizler bizlerden úyrendińiz. Házir usılay jasap atırsız da. Bul iste jáne de alǵa ilgerilewińizdi Iyemiz Iysanıń atı menen sizlerden ótinish etip soraymız.

2Óytkeni Iyemiz Iysanıń biyligi menen sizlerge qanday jol-jorıqlardı bergenimizdi ózlerińiz bilesizler.

3Qudaydıń erki – sizlerdiń muxaddes bolıwıńızdan ibarat. Yaǵnıy, Ol sizlerdiń jınısıy buzıqshılıqtan awlaq júriwińizdi,

4hár birińizdiń óz denesin qádirlep, muxaddes qılıp saqlawın

5hám Qudaydı bilmeytuǵın butqa tabınıwshılar sıyaqlı buzıq qálewlerge berilmewin qáleydi.

6Hesh kim usınday iste tuwısqanına qıyanet etip, haramılıq islemesin. Burın sizlerge aytqanımız hám eskertkenimizdey, Iyemiz bunday barlıq isler ushın adamlardı jazalaydı.

7Sebebi Quday bizlerdi haram bolıp jasaw ushın emes, al muxaddes bolıp jasaw ushın shaqırdı.

8Solay etip, bul jol-jorıqtı qabıl almaǵan adam adamdı emes, al Muxaddes Ruwxın sizlerge bergen Qudaydı qabıl almaǵan boladı.

9Biraq tuwısqanlıq súyispenshilik haqqında birewdiń sizlerge bir nárse jazıwına hájet joq. Óytkeni bir-birińizdi súyiwdi sizler Qudaydan úyrendińler.

10Sizler haqıyqattan da pútkil Makedoniyadaǵı tuwısqanlardıń hámmesin súyesizler. Tuwısqanlar, bul iste jáne de alǵa ilgerilewińizdi sizlerden ótinish etemiz.

11Jáne de, sizlerge jol-jorıq bergenimizdey, tınısh ómir súriwdi, óz isińizge kewil bóliwdi hám qollarıńız benen miynet etiwdi maqset etip qoyıńlar.

12Solay etip, sizler jámáátten tıs adamlardıń aldında húrmet-izzetke erisesizler hám hesh kimnen ǵárezli bolmaysızlar.

13Tuwısqanlar! Úmitsiz jasaytuǵın basqa adamlar sıyaqlı qayǵırmawıńız ushın, bul dúnyadan kóz jumǵanlar haqqında sizlerdiń xabarsız qalıwıńızdı qálemeymiz.

14Sebebi bizler Iysanıń ólip, qayta tirilgenine isenemiz. Sol sıyaqlı, Iysaǵa isenip, bul dúnyadan kóz jumǵanlardı Quday Onıń menen birge qayta alıp keletuǵınına da isenemiz.

15Iyemizdiń sózine tiykarlanıp, sizlerge mınanı bildiremiz: házir tiri bolıp jasap atırǵan bizler, yaǵnıy Iyemiz kelemen degenshe tiri júretuǵınlar bul dúnyadan kóz jumǵanlardan hesh artıq emespiz.

16Óytkeni Iyemizdiń Ózi buyırǵan bálent dawıs astında, bas perishteniń sesti hám Qudaydıń kárnayınıń hawazı menen aspannan kelgende, dáslep Masiyxqa isengen óliler tiriledi.

17Onnan soń, jasap atırǵan bizler, yaǵnıy tiri qalǵanlar olar menen birge Iyemizdi hawada kútip alıw ushın, bultlar ishine alınıp kóterilemiz. Solay etip, hámme waqıt Iyemiz benen birge bolamız.

18Mine, usı sózler menen bir-birińizdi jubatıńlar.

← Chapter 3 Jump to: Chapter 5 →