1 Thessalonians 5

Институт перевода Библии, 2022

← Chapter 4 Jump to:

1Tuwısqanlar! Bul waqıyalardıń waqıt hám máwsimleri haqqında sizlerge jazıwdıń keregi joq.

2Sebebi Iyemizdiń kúni túnde urınıń keliwi sıyaqlı keletuǵının sizler anıq bilesizler.

3Adamlar: «Hámmesi tınısh hám qáwipsiz», – degende, júkli hayaldı birden tolǵaq tutqanday, olar tosattan apatqa ushırap, qashıp qutıla almaydı.

4Biraq tuwısqanlar, sizler qarańǵılıqta bolmaǵanlıqtan, sol kún sizlerdi urı túskendey ǵapılda qaldırmaydı.

5Sizlerdiń hámmeńiz nurdıń hám kúndizdiń balalarısız. Bizler túnge yamasa qarańǵılıqqa tiyisli emespiz.

6Sonlıqtan basqalar sıyaqlı uyıqlamayıq, al oyaw hám sergek bolayıq.

7Óytkeni uyıqlaytuǵınlar túnde uyıqlaydı, más bolatuǵınlar da túnde más boladı.

8Al kúndizge tiyisli bolǵan bizler sergek bolayıq, isenim hám súyispenshilikti sawıt qılıp, qutqarılıwǵa degen úmitti basımızǵa duwlıǵa qılıp kiyeyik.

9Sebebi Quday bizlerdi Óziniń ǵázebine ushırawımız ushın emes, al Iyemiz Iysa Masiyx arqalı qutqarılıwımız ushın tayınladı.

10Tiri bolsaq ta, óli bolsaq ta, bizlerdi Ózi menen birge jasasın dep, Iysa Masiyx bizler ushın óldi.

11Sonlıqtan házir islep atırǵanıńızday, bir-birińizdi jigerlendirip, bir-birińizdiń isenimińizdi bekkemley berińler.

12Tuwısqanlar! Arańızda miynet etkenlerdiń, yaǵnıy Iyemizdiń jolında sizlerge jolbasshılıq qılıp, aqıl-násiyat bergenlerdiń qádirin biliwińizdi sizlerden ótinish etemiz.

13Islegen isleri ushın olardı súyip, sheksiz húrmet etińler. Óz ara tatıw jasańlar.

14Sizlerge jalbarınamız, tuwısqanlar, is jaqpaslarǵa eskertiw jasap, júreksizlerdi jigerlendirińler, kúshsizlerge járdem berip, hámmege sabırlı bolıńlar.

15Abaylı bolıńlar, hesh kim jamanlıqqa jamanlıq penen juwap qaytarmasın. Kerisinshe, hámme waqıtta bir-birińizge hám pútkil adamlarǵa jaqsılıq islewge umtılıńlar.

16Bárqulla quwanıńlar.

17Tınbay duwa etińler.

18Qanday awhal bolsa da, Qudayǵa shúkirlik bildirińler. Óytkeni Masiyx Iysaǵa tiyisli bolǵan sizlerge degen Qudaydıń erki usılar.

19Muxaddes Ruwxtı sóndirip taslamańlar.

20Payǵambarshılıq sózlerin kemsitpeńler.

21Biraq, hámme nárseni sınap kórińler. Jaqsılıqqa jabısıp alıńlar.

22Hár qanday jamanlıqtan qashıńlar.

23Tınıshlıq beriwshi Qudaydıń Ózi sizlerdi tolıq muxaddes qılsın: pútkil ruwxıńız, janıńız hám deneńizdi Iyemiz Iysa Masiyxtıń keliwine kemshiliksiz qılıp saqlasın.

24Sizlerdi shaqırǵan Quday sadıq, Ol usını ámelge asıradı.

25Tuwısqanlar, bizler ushın duwa etińler.

26Barlıq tuwısqanlardı muxaddes posa menen súyip, sálem aytıńlar.

27Bul xattıń hámme tuwısqanlarǵa oqıp beriliwin Iyemizdiń atı menen sizlerge qatań túrde tapsıraman.

28Iyemiz Iysa Masiyxtıń miyrimi sizlerge yar bolsın!

← Chapter 4 Jump to: