1 Timothy 1

Институт перевода Библии, 2022

Jump to: Chapter 2 →

1Qutqarıwshımız Qudaydıń hám úmitimiz Masiyx Iysanıń buyrıǵı menen Masiyx Iysanıń elshisi bolǵan men, Pavelden,

2isenimdegi haqıyqıy ulım bolǵan Timofeyge sálem! Ákemiz Quday hám Iyemiz Masiyx Iysa saǵan miyrim, rehim hám tınıshlıq bersin!

3Men Makedoniyaǵa ketip baratırǵanımda saǵan ótinish etkenimdey, Efeste qal. Ol jerdegi ayırım adamlarǵa jalǵan tálimatlardı úyretpewdi,

4ańızlar hám sheksiz shejireler menen bánt bolmawdı buyır. Bular isenim arqalı bilinetuǵın Qudaydıń islerine payda beriwdiń ornına, tartıslardı keltirip shıǵaradı.

5Al bul buyrıqtıń maqseti bolsa – pák júrekten, taza hújdannan hám haqıyqıy isenimnen súyispenshilikti payda etiw.

6Geybir adamlar bulardan júz burıp, bos gáplerge erip adastı.

7Olar nızam muǵallimi bolıwdı qáleydi, biraq neni sóylep hám neni taban tirep tastıyıqlap atırǵanın túsinbeydi.

8Durıs qollanǵan adam ushın Muxaddes Nızam paydalı ekenin bilemiz.

9Jáne de, Muxaddes Nızam haq adamlar ushın emes, al nızamdı buzıwshılar hám boysınbaytuǵınlar, qudaysızlar hám gúnakarlar, muxaddes emesler hám muxaddes nárselerdi sıylamaytuǵınlar, ata-anasın óltiretuǵınlar, adam óltiriwshiler,

10buzıqlar, óz jınısındaǵı adam menen qosılıwshılar, adamdı urlap satıwshılar, ótirikshiler, jalǵan gúwalıq beriwshiler hám durıs tálimatqa qarsı is qılatuǵın basqa hámme ushın qollanılatuǵının bilemiz.

11Durıs tálimat bolsa, alǵıs-maqtawlarǵa ılayıq Qudaydıń ullı Xosh Xabarına tiykarlanǵan. Usı Xosh Xabardı Quday maǵan isenip tapsırdı.

12Maǵan kúsh-quwat berip qoyǵan Iyemiz Masiyx Iysaǵa minnetdarshılıq bildiremen. Sebebi Ol meni sadıq dep esaplap, Óz xızmetine tayınladı.

13Bir waqıtları men Oǵan til tiygiziwshi, quwdalawshı hám zalım adam bolsam da, Ol maǵan miyrim-shápáátin berdi. Óytkeni mende haqıyqıy isenim bolmaǵanlıqtan, ne islep júrgenimdi bilmeytuǵın edim.

14Biraq Jaratqan Iyeniń miyrimi Masiyx Iysadaǵı isenim hám súyispenshilik penen birlikte meniń ústime mol-mol bolıp tógildi.

15«Masiyx Iysa bul dúnyaǵa gúnakarlardı qutqarıw ushın keldi», – degen sózler isenimli hám hámme adamlar tárepinen qabıl qılınıwǵa ılayıqlı sózler. Men ózimdi gúnakarlardıń ishindegi eń jamanıman dep esaplayman.

16Biraq, men gúnakarlardıń ishindegi eń jamanı bolsam da, Masiyx Iysa maǵan rehim etti. Keyinirek Ózine isenip, máńgilik ómirge erisetuǵınlarǵa órnek bolıwım ushın, Ol maǵan sheksiz sabırlıǵın kórsetti.

17Máńgilik Patshaǵa, ólmeytuǵın hám kórinbeytuǵın jalǵız Qudayǵa máńgi-baqıy húrmet hám dańq bolsın! Awmiyin.

18Ulım Timofey! Sen tuwralı aldın aytılǵan payǵambarshılıq sózlerine tiykarlanıp, saǵan buyıraman: usı sózler boyınsha jaqsı ásker sıyaqlı is-háreket et.

19Isenimińdi hám hújdanıńdı taza saqla. Ayırımlar hújdanın satıp, iseniminen ayırıldı.

20Olardıń arasında Himeney hám Iskender de bar. Qudayǵa til tiygizbewdi úyrensin dep, men olardı jámáátten shıǵarıp, shaytannıń qolına tapsırdım.

Jump to: Chapter 2 →