1 Timothy 6

Институт перевода Библии, 2022

← Chapter 5 Jump to:

1Qudaydıń atına hám tálimatına til tiymew ushın, qullıq moyıntırıǵı astında bolǵanlardıń hámmesi óz xojayınların tolıq húrmetke ılayıqlı dep sanasın.

2Xojayınları iseniwshi bolǵan qullar bolsa, tuwısqanbız-ǵo dep, húrmetsizlik qılmay, kerisinshe, olarǵa jáne de jaqsıraq xızmet etsin. Sebebi olardıń bul jaqsı xızmetinen payda kóretuǵın xojayınlar – súyikli iseniwshiler-ǵo. Usılardı úyretip, násiyatla.

3Kim de kim ózge tálimattı úyretip, Iyemiz Iysa Masiyxtıń haqıyqat sózlerin hám Qudaydıń jolına tiykarlanǵan tálimattı maqullamasa,

4ol menmen hám hesh nárseni bilmeytuǵın adam bolǵanı. Aytısıw hám tartısıw keseline jolıqqan bunday adamnıń gápleri kúnshillik, alawızlıq, ósek hám jaman gúmanlardı keltirip shıǵaradı.

5Aqıl-oyları uwlanǵan, haqıyqatlıqtı joytqan, Qudayǵa xızmet etiw arqalı bayıwǵa boladı, dep oylaytuǵın bul adamlar arasında bárqulla tartıslar boladı.

6Ózińde barǵa qanaat etip, Qudaydıń jolı menen júriw – úlken jetiskenlik.

7Óytkeni bizler bul dúnyaǵa hesh nárse alıp kelmedik hám onnan hesh nárse de alıp kete almaymız.

8Jeytuǵın hám kiyetuǵın nárselerimiz bolsa, usılarǵa qanaat eteyik.

9Al bayımaqshı bolǵanlar azǵırılıwǵa ushıraydı. Olar adamlardı bálege jolıqtırıp nabıt qılatuǵın kóp mánissiz hám zıyanlı háweslerdiń duzaǵına ilinedi.

10Sebebi hár túrli jamanlıqtıń negizi – aqshanı súyiw. Ayırımlar aqshanıń izine túsip, isenimnen qayttı hám ózlerin kóp azaplarǵa duwshar etti.

11Al sen, Qudaydıń adamı, bul nárselerden awlaq bol. Al haqlıqqa, Qudaydıń jolı menen júriwge, isenimge, súyispenshilikke, sabırlılıqqa hám múláyimlilikke umtılıp jasa.

12Isenim ushın bolatuǵın jaqsı gúreste jan-tániń menen háreket etip, máńgilik ómirdi jeńip al. Óytkeni Quday seni usı máńgilik ómir ushın shaqırǵan hám sen kóplegen gúwalar aldında isenimińdi ashıq tán alǵansań.

13Hámmege ómir beretuǵın Qudaydıń hám Pontiy Pilat tergegende turaqlılıq penen gúwalıq bergen Masiyx Iysanıń aldında saǵan mınanı buyıraman:

14Iyemiz Iysa Masiyx kelgenshe, ózińe berilgen buyrıqlardı orınlap, minsiz hám ayıpsız bol.

15Quday Ózi belgilegen waqıtta Iysa Masiyxtıń qayta keliwin kórsetedi. Quday – alǵıs-maqtawlarǵa ılayıqlı jalǵız Hákim, patshalar Patshası, húkimdarlar Húkimdarı.

16Jalǵız Qudaydıń ǵana basında ólim joq. Ol hesh kim jaqınlay almaytuǵın nurda jasaydı, Onı hesh kim kórmegen hám kóriwi de múmkin emes. Húrmet hám máńgilik kúsh-qúdiret Onıki bolsın! Awmiyin.

17Bul dúnyadaǵı bay adamlarǵa menmen bolmawdı hám ótkinshi baylıqtan úmit etpewdi buyır. Al olar ráhát kóriwimiz ushın bizlerge hámme nárseni mol-mol etip beretuǵın Qudaydan úmit etsin.

18Olarǵa jaqsılıq islewdi, jaqsı isler menen bay bolıwdı hám ózinde barın basqalar menen bólisip, saqıy bolıwdı da tapsır.

19Sonda olar haqıyqıy ómirge iye bolıwı ushın, ózlerine keleshekte bekkem tayanısh bolatuǵın ǵáziyne toplaydı.

20Háy Timofey, saǵan isenip tapsırılǵandı saqla. Jaramas sózlerden, ótirikten «bilim» dep atalıp, haqıyqatqa qarsı turatuǵın tálimatlardan awlaq bol.

21Sebebi ayırım adamlar bul jalǵan bilimge berilip, isenimnen qayttı. Qudaydıń miyrimi sizlerge yar bolsın!

← Chapter 5 Jump to: