Ecclesiastes 12

Институт перевода Библии, 2022

← Chapter 11 Jump to:

1Qayǵılı kúnler, yaǵnıy aqırǵı kúnler kelip: «Men olardan hesh ráhát tappadım», – dep aytpasıńnan aldın, Jaslıq shaǵıńda Jaratıwshıńdı eske al!

2Quyash, jarıqlıq, ay hám juldızlar gúńgirtlenip, Jawın izinen jáne qara bultlar qaplamastan aldın, Onı eske al!

3Sol kún kelgende, Úydi qorǵaytuǵınlar qaltıraydı, Kúshliler iyiledi, Digirman tartıwshılar az qalǵanlıqtan, isin toqtatadı, Terezeden sırtqa qaraytuǵınlardı gúńgirt tartadı.

4Kóshege qaraǵan qapılar jabıladı, Digirmannıń sestin esitpeytuǵın boladı. Qus sestinen oyanadı, Biraq sayraǵanın zorǵa esitedi.

5Bálentlikten qorqatuǵın bolıp qaladı, Kóshege shıǵıwǵa júreksinbeydi, Badam aǵashı aq túske enedi, Shegirtke súyretilip qaladı, Hesh bir miywe qushtarlıq oyatıwǵa járdem bermeydi. Adam óziniń máńgilik úyine kirejaq, Kóshe joqlaw aytıp jılaǵanlarǵa tolıp ketedi.

6Sonlıqtan gúmis shınjır úzilip, Altın kese sınbastan, Bulaq basındaǵı gúze qıyrap, Qudıq ústindegi suw tartqısh úzilmesten,

7Topıraqtan islengen deneń jerge qaytpastan, Quday bergen ruwxıń da Qudayǵa qaytpastan burın, Ózińdi Jaratqandı eske al!

8Biyhuda, biyhuda! – deydi Wazshı, – Hámmesi biyhuda!

9Wazshı dana adam bolıp ǵana qoymay, bilgenlerin xalıqqa da úyretti. Ol kóplegen naqıl-maqallardı oy eleginen ótkizip, izertledi hám qayta islep, ornı-ornına qoydı.

10Wazshı tereń mánili sózlerdi izledi, ol haqıyqat sózlerin durıs jazdı.

11Danalardıń sózleri shopannıń ushlı tayaǵına, jıynalǵan naqıl sózler bekkem qaǵılǵan shegege uqsaydı. Bul sózler bir Shopan tárepinen berilgen.

12Bulardan tısqarı, balam, mınalardı bilip qoy: kóp kitap jazıwdıń shegi joq, kóp kitap oqıw deneni sharshatadı.

13Hámme nárse aytıldı, endi juwmaqtı tıńlayıq: Qudaydan qorq, Onıń buyrıqların orınla! Bul hár bir adamnıń parızı.

14Quday hár bir isti, Jasırın islengen jaqsı-jaman islerdiń hámmesin húkim qıladı.

← Chapter 11 Jump to: