Ecclesiastes 6

Институт перевода Библии, 2022

← Chapter 5 Jump to: Chapter 7 →

1Men quyash astında adamlar arasında bolıp turatuǵın, awır bir apattı kórdim:

2Quday adamǵa baylıq, mal-múlik, ataq-abıray beredi. Ol kewli kúsegeniniń hámmesine iye boladı. Biraq Quday oǵan sonıń qızıǵın kóriwge imkaniyat bermeydi hám bulardıń barlıǵı basqaǵa buyıradı. Bul da biyhuda, bul – qayǵılı bir dárt.

3Eger bir adamnıń júz balası bolsa hám ol uzaq ómir súrse, biraq ol ómirdiń ráhátin kórmese hám óligin kómgendey adam bolmasa, onda men óli tuwılǵan bala onnan baxıtlıraq der edim.

4Óli tuwılǵan bala biykarǵa dúnyaǵa kelip, qarańǵılıq ishinde dúnyadan ótedi, atı da qarańǵılıqqa kómiledi.

5Ol, hátte, quyashtı kórgen de, bilgen de joq. Biraq óli tuwılǵan balanıń jaǵdayı sol adamnıń jaǵdayınan jaqsıraq.

6Sol adam, hátte, mıń jıldan eki ret ómir súrse de, ráhát kórmeydi. Bári bir hámme de bir jerge barmay ma?

7Adamnıń barlıq miyneti qarındı toydırıw ushın, Biraq ashkózlikten kewil toymaydı.

8Dananıń aqılsızdan qanday artıqmashlıǵı bar? Jarlıǵa ómirde ózin qalay tutıwdı bilgeninen ne payda?

9Ózińde joqtı kúsegennen, barǵa qanaat etken jaqsıraq. Ol da biyhuda, ol da samaldıń izinen quwǵanday nárse.

10Bar nárseniń hámmesine álle qashan at qoyılǵan. Adamnıń da táǵdiri belgili. Hesh kim ózinen kúshli bolǵan menen qasarısa almaydı.

11Sóz kóp bolsa, biyhudalıq kóbeyer. Bunnan adamǵa ne payda?

12Saya sıyaqlı ótip ketetuǵın ómiriniń mánissiz kúnlerinde adam ushın neniń jaqsı ekenin kim biledi? Ózinen keyin quyash astında ne bolatuǵının adamǵa kim ayta aladı?

← Chapter 5 Jump to: Chapter 7 →