Ephesians 4

Институт перевода Библии, 2022

← Chapter 3 Jump to: Chapter 5 →

1Solay etip, Iyemiz ushın tutqın bolǵan men sizlerden jalınıp sorayman: Qudaydıń ózlerińizdi shaqırǵan ómirine ılayıqlı túrde jasańlar.

2Tolıq kishipeyillik, múláyimlilik hám sabırlılıq penen jasańlar. Bir-birińizdi súyip, miyzamkesh bolıńlar.

3Ózlerińizdi birlestiriwshi tınıshlıq penen, Muxaddes Ruwx bergen birlikti saqlawǵa tırısıńlar.

4Quday sizlerdi shaqırǵanda bir úmitti berdi. Sol sıyaqlı, hámmemiz bir denemiz hám bir Muxaddes Ruwxqa iyemiz.

5Iyemiz bir, isenimimiz bir, suwǵa shomıldırılıw rásimimiz bir.

6Quday da bir. Ol hámmeniń ústinen húkimdar, hámme arqalı háreket etiwshi, hámmemizde bar bolǵan, hámmemizdiń Ákemiz.

7Biraq Quday hár birimizge Masiyxtıń saqıylıǵına muwapıq Óz miyrimin sıyǵa berdi.

8Sonlıqtan Muxaddes Jazıwda bılay delingen: «Ol joqarıǵa shıǵıp, Tutqınlardı tutqın etti. Adamlarǵa sıylar berdi».

9Endi bul: «Ol joqarıǵa shıqtı» degen sózler neni ańlatadı? Masiyx burın tómenge, jerge tústi degendi ańlatadı.

10Túsken Adam da, hár bir nárseni toltırıw ushın aspannan da biyigirekke shıqqan Adam da – Sol.

11Masiyx geybirewlerdi elshi, bazılardı payǵambar, ayırımlardı Xosh Xabardı járiyalawshı, al birewlerdi jámáát shopanı hám ustaz qılıp qoydı.

12Ol bunı muxaddeslerdi xızmetke tayarlaw hám Óz denesi bolǵan jámáátti bekkemlew ushın isledi.

13Nátiyjede bizlerdiń hámmemiz Qudaydıń Ulına iseniwde hám Onı biliwde birlikke erisip, Masiyxtıń tolıq minsizligine deyin ósip baramız.

14Solay eken, endigiden bılay, gódek bolmayıq. Adamlardıń jalatayshılıǵı hám hiylekerligi arqalı payda bolǵan hár túrli tálimatlardıń samalı menen ana jaqtan mına jaqqa shayqatılmayıq.

15Kerisinshe, haqıyqatlıqtı súyispenshilik penen aytıp, deneniń bası bolǵan Masiyxqa qaray hár tárepleme ósip barayıq.

16Onıń basqarıwında pútkil deneniń músheleri óz ara birigip, hár bir múshe óz minnetin atqarıwı arqalı bir-birine járdem berip, baylanıs jasaydı. Usılay etip, pútkil dene súyispenshilik penen ósip, ózin bekkemlep baradı.

17Sonlıqtan men usını aytıp, sizlerdi Iyemizdiń atınan eskertemen: bunnan bılay, butqa tabınıwshı milletlerdiń adamları sıyaqlı, bos oy-qıyallarǵa berilip jasamańlar.

18Olardıń sana-sezimleri topırlanıp, ishindegi nadanlıq hám júreklerindegi qatallıq sebepli, Qudaydan berilgen ómirge jat bolǵan.

19Olar pútkil ar-namıs sezimlerin joytqan, hár túrli haramılıqtı nápsiqawlıq penen islew ushın, buzıqshılıqqa berilgen.

20Biraq sizler Masiyxtı bunday qılıp tanımaǵansız.

21Álbette, sizler Iysa Masiyx haqqında esitkenińizden keyin, Onıń menen qatnasta bolıp, Ondaǵı haqıyqattı úyrendińler.

22Sol sebepten burınǵı ómir jolıńızdan, yaǵnıy deneniń jaman qálewleri sebepli shirigen eski tábiyatıńızdan waz keshińler.

23Oy-pikirlerińizdi hám ruwxıńızdı jańalap,

24Qudayǵa uqsatılıp jaratılǵan, shın haqlıq hám muxaddeslikten ibarat jańa tábiyatqa bólenińler.

25Sonlıqtan ótirikten waz keship, hár birińiz iseniwshi tuwısqanıńızǵa haqıyqattı aytıńlar. Sebebi hámmemiz bir deneniń múshelerimiz.

26Ǵázeplenseńiz de, gúna islemeńler. Quyash batqansha, ǵázepten qaytıńlar.

27Shaytanǵa jol bermeńler.

28Urlıq islegen endigiden bılay urlıq islemesin. Kerisinshe, mútáj adamlarǵa úlestiretuǵın bir nársesi bolıwı ushın, ol óz qolları menen hadal miynet etsin.

29Awızlarıńızdan hesh bir jaman sóz shıqpasın. Al ornı menen sóylep, esitkenlerdiń ruwxın kóteretuǵın paydalı sózlerdi aytıń.

30Qudaydıń Muxaddes Ruwxın qapa qılmańlar. Qutqarılatuǵın kúnińiz ushın usı Ruwx penen mórlengensizler.

31Jek kóriwshilik penen birlikte hár bir jaman niyet, ashıw, ǵázep, baqırıs hám ósek sizlerden awlaq bolsın.

32Al bir-birińizge miyirman hám jan ashır bolıńlar. Quday sizlerdi Masiyx arqalı keshirgendey, sizler de bir-birińizdi keshirińler.

← Chapter 3 Jump to: Chapter 5 →