Joel 2

Институт перевода Библии, 2022

← Chapter 1 Jump to: Chapter 3 →

1Sionda kárnay shertińler! Muxaddes tawımda dabıl urıńlar! Qorqıwdan titiresin bul jerde jasaytuǵınlar, Óytkeni kiyatır Jaratqan Iyeniń kúni, Ol júdá jaqın.

2Bul kún qarańǵı, tas túnek, Bultlı hám qap-qarańǵı bolar. Tawlardıń ústinen jayılǵan tań nurı yańlı, Sansız hám kúshli bir láshker ordası kiyatır. Áwelleri bunday hesh júz bermegen, Áwladlar boyı da hesh qashan bolmas.

3Olardıń aldında jalmaytuǵın ot, Artında lawlaǵan jalın janar. Aldındaǵı Eden baǵı sıyaqlı jerler, Olar ótkennen keyin, izsiz shólge aylanar. Hesh nárse qashıp qutıla almas olardan.

4Olardıń kórinisi atlarǵa uqsaydı, Sawash atlarınday dúsirlesedi.

5Taw tóbesine shıǵıp atırǵan, Sawash arbasınıń dawısınday dúsirleydi, Sabandı jandırıp atırǵan jalınday tısırlaydı, Sawashqa sap tartıp, júris qılǵan, Kúshli láshker ordasınıń shawqımına uqsaydı.

6Olardıń aldında qorqınıshqa túsedi xalıqlar, Hámmeniń júzi solıp, aǵarıp ketedi.

7Bahadırlarday hújim qıladı olar, Batır áskerler sıyaqlı diywallarǵa órmelep minedi. Olar sap tartıwı menen alǵa basıp, Hesh biri óz jolınan shetke shıqpaydı.

8Bir-birin iyterip, túrtpesten, Hámmesi saptı buzbay qádem basadı. Jawdıń qurallı bógetlerin jarıp ótkende de, Olardı hesh nárse toqtata almas.

9Olar qalaǵa bastırıp kirip, Diywallardan órmelep ótedi, Úylerge tırmasıp minip, Urıday terezeden kiredi.

10Olardıń aldında jer silkinedi, Aspan qaltırap turadı. Quyash hám ay qarayıp ketedi, Juldızlardıń nurı sónedi.

11Dawısı gúrkirep, Jaratqan Iye ordasın baslap baradı, Sansız Onıń láshkerleri, Onıń buyrıǵına boysınatuǵınlar qúdiretli. Jaratqan Iyeniń sol kúni ullı hám qorqınıshlı! Sol kúnge kim shıday alar eken?!

12Jaratqan Iye bılay deydi: «Házir oraza tutıp, jılap hám kóz jas tógip, Pútkil júregińiz benen Maǵan qaytıń.

13Kiyimińizdi emes, júreklerińizdi jırtıń». Qudayıńız Jaratqan Iyege qaytıń. Sebebi Jaratqan Iye miyrimli, rehimli, Sabır-taqatlı hám súyispenshiligi ullı. Jazalawdan waz keshetuǵın Quday.

14Kim biledi, Ol rayınan qaytıp, rehim qılıwı múmkin? Keyin bereket beredi. Sonda Qudayıńız Jaratqan Iyege, Ǵálle hám ishimlik sadaqalarıńızdı usınarsız.

15Sionda kárnay shertiń, Oraza ushın kún belgileń, Sol kúni saltanatlı jıynalıs járiyalań.

16Jıynań xalıqtı, Pákleń jámiyetti, Qartayǵanlardı bir jerge shaqırıń, Balalardı, hátteki emiziwli bópelerdi alıp keliń. Jáne de, kúyew óz bólmesinen shıqsın, Kelinshek shımıldıqtan shıǵıp kelsin.

17Ruwxaniyler, Jaratqan Iyeniń xızmetkerleri, Jılasın Ibadatxananıń aywanı menen qurbanlıq orın arasında, Jalbarınsın olar bılay dep: «Jaratqan Iye, Óz xalqıńa rehim qıl, Múlkiń ápsanaǵa aylanıp, masqara bolmasın basqa milletler arasında, Xalıqlar: „Olardıń Qudayı qayaqta?“ – dep mazaq qılmasın».

18Sonda Jaratqan Iye janı ashıp, Rehim qıldı Óz xalqına.

19Bılay dep juwap berdi Ol xalqına: «Mine, sizlerge beremen ǵálle, jańa sharap hám záytún mayın, Bulardan toyıp iship-jeysiz. Endi jol qoymayman milletler arasında mazaq bolıwıńızǵa.

20Arqadan kelgen qáwipti sizlerden uzaqlastıraman, Quwraǵan hám izsiz shólge olardı aydap jiberemen. Aldındaǵılardı shıǵıstaǵı teńizge, Keyindegilerdi batıstaǵı teńizge ılaqtıraman. Sasıq iyis shıǵadı óliklerinen». Shınında da, Jaratqan Iye ullı is qıldı.

21Qorqpa, jer júzi, quwanıp shadlan! Jaratqan Iye ullı islerdi isledi.

22Qorqpań, jabayı haywanlar! Sebebi jasılǵa dónedi jaylawlar. Miywelerin berer miywe aǵashlar, Ánjir hám júzimlerdiń miyweleri mol boladı.

23Háy, Sion xalqı, shadlanıń, Qudayıńız Jaratqan Iyede quwanıń. Tiklenip alıwıńız ushın, Ol sizlerge gúzgi jawın jawdırdı, Óz waqtında jawdırdı gúz hám báhár jawınların.

24Endi qırmanlarda taza dánler mol bolıp, Sharapqa hám záytún mayına ıdıslar tolıp tasadı.

25Jaratqan Iye bılay deydi: «Sol jılları sizlerge jibergen, Shegirtke úyirleriniń jegenleriniń, Qıyratqanlarınıń, jalmaǵanlarınıń, Yaǵnıy, Men jibergen láshker ordasınıń, Keltirgen zıyanınıń ornın toltıraman.

26Endi qálegenińizshe jep toyasız, Sizler ushın ájayıp islerdi kórsetken, Qudayıńız Jaratqan Iye bolǵan Maǵan alǵıs aytasız. Xalqım, sizler endi hasla shermende bolmaysız.

27Háy, Izrail, Meniń arańızda ekenimdi, Meniń Qudayıńız Jaratqan Iye ekenimdi, Mennen basqa quday joq ekenin bilip alasız. Xalqım, sizler endi hasla shermende bolmaysız.

28Sonnan keyin, barlıq adamlardıń ústine, Óz Ruwxımdı jawdıraman. Ul hám qızlarıńız payǵambarshılıq qıladı, Qartayǵan adamlarıńız túsler, Jaslarıńız ayanlar kóredi.

29Óz Ruwxımdı jawdıraman sol kúnlerde, Hátteki qul hám shorılardıń ústine.

30Aspanda hám jer júzinde belgi kórsetemen, Qan, ot hám tútin minarası payda boladı.

31Jaratqan Iyeniń ullı hám qorqınıshlı kúni kelmesinen aldın, Quyash qarańǵılanıp, ay qanǵa aylanadı.

32Sonda Meniń, Jaratqan Iyeniń atın aytıp shaqırǵan hár bir adam qutqarıladı. Jaratqan Iye, yaǵnıy Men wáde bergenimdey, Sion tawındaǵı hám Erusalimdegi qashıp qutılǵanlar, Aman qalǵanlar Jaratqan Iyeniń, yaǵnıy Meniń tańlap alǵanlarım boladı».

← Chapter 1 Jump to: Chapter 3 →