Joel 3

Институт перевода Библии, 2022

← Chapter 2 Jump to:

1«Mine, sol kúnlerde, Men Yahuda hám Erusalimdi, Qaytadan abadanshılıqqa eristirgenimde,

2Barlıq milletlerdi jıynap, Ehoshafat oypatlıǵına alıp baraman. Múlkim bolǵan Izrail xalqın, Milletler arasına tarqatıp, jerimdi bólisip alǵanı ushın, Sol jerde olardı húkim qılaman.

3Olar qul saylaw ushın shek tasladı xalqım ushın, Ózleri buzıqshılıq qılıw ushın, er balalardı sattı, Ishken sharabı ushın qızlardı tólem ornına berdi.

4Háy, Tir, Sidon hám barlıq filist úlkeleri, Sizlerge Mennen ne kerek? Mennen ósh alıwdı qáleysizler me? Eger Mennen ósh almaqshı bolsańız, Sol waqıttıń ózinde óz qılmısıńızdı, Qaytarıp óz basıńızǵa salaman.

5Sizler tonap aldıńız gúmis hám altınımdı, Alıp kettińiz óz ibadatxanalarıńızǵa qımbat bahalı zatlarımdı.

6Yahuda hám Erusalim xalqın greklerge satıp, Olardı óz watanınan uzaqlastırdıńız.

7Kóresizler, Yahuda hám Erusalim xalqın, Alıp shıǵaman sizler satqan jerlerden. Qılmısıńızdı óz basıńızǵa salaman.

8Endi ul hám qızlarıńızdı Yahuda xalqına tapsıraman, Olardı uzaq bir jurtqa – shebalılarǵa satadı. Bulardı Jaratqan Iye bolǵan Men ayttım.

9Milletler arasında bılay dep járiyalań: „Sawashqa tayarlanıp, batırlarıńızdı shaqırıń, Barlıq áskerlerińiz atlanıp, hújimge shıqsın!

10Paznańızdan qılıshlar, Oraǵıńızdan nayzalar soǵıń. Jawıngermen, – desin hálsizler.

11Háy, dógerektegi barlıq milletler, asıǵıń, Hámmeńiz jıldam keliń“». Jaratqan Iyeden Óz batırların sol jerge ákeliwin sorań.

12Jaratqan Iye bılay deydi: «Milletler ayaqqa tursın, Ehoshafat oypatlıǵına toplansın. Sebebi dógerektegi barlıq milletlerdi, Húkim etiw ushın sol jerde bolaman.

13Qáne, oraq salıńlar, eginler pisti, Kelińler, júzim iskenjeleri tolıp ketti, Basıp júzimlerdi sıǵıńlar. Óytkeni olardıń jawızlıqları tolıp ketti».

14Húkim oypatlıǵına, Sansız alaman jıynaldı, Húkim oypatlıǵına, Jaqınlastı Jaratqan Iyeniń kúni.

15Quyash hám ay qarańǵılasqan, Juldızlardıń nurı sónip qalǵan.

16Jaratqan Iye Sionda turıp baqıradı, Erusalimnen gúrkiregen dawıs shıǵaradı. Aspan hám jer shayqaladı. Biraq Jaratqan Iye Óz xalqın panasına aladı, Izrail xalqınıń qorǵanı boladı.

17Jaratqan Iye jáne bılay deydi: «Sol waqıtta sizler biletuǵın bolasız, Muxaddes tawım bolǵan Siondı mákan etken, Qudayıńız Jaratqan Iye – Men ekenimdi. Erusalim muxaddes qala, Basqa xalıqlar onı endi hasla basıp almaydı.

18Sol kúni mazalı júzim sharabı aǵar tawlardan, Sút aǵıp turar tóbeshiklerden, Yahudadaǵı hámme suwsız ózekler suwǵa toladı, Jaratqan Iyeniń Úyinen bir bulaq shıǵadı, Shittim oypatlıǵın suwǵaradı.

19Biraq Mısır wayran boladı, Edom izsiz shólge aylanadı, Sebebi olar yahudalılardıń jerine hújim qılıp, Ayıpsız adamlardıń qanın tókti.

20Al Yahuda adamnıń máńgi mákanlaytuǵın jeri boladı, Erusalim áwladtan-áwladqa turadı.

21Tógilgen qanlar ushın jaza bermegen edim, Endi olardıń qanınıń óshin alaman. Jaratqan Iyeńiz bolǵan Men Siondı mákanlayman».

← Chapter 2 Jump to: