bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Karakalpak
/
Институт перевода Библии, 2022
/
Judges 2
Judges 2
Институт перевода Библии, 2022
← Chapter 1
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 3 →
1
Jaratqan Iyeniń perishtesi Gilgaldan Boximge kelip, izraillılarǵa bılay dedi: – Sizlerdi Mısırdan shıǵarıp, ata-babalarıńızǵa beremen dep ant ishken jerge alıp keldim. Men sizlerge: «Sizler menen dúzgen kelisimimdi hesh qashan buzbayman.
2
Al sizler bul jerlerde jasap atırǵanlar menen kelisim dúzbeńler hám olardıń qurbanlıq orınların qıyratıp taslańlar», – degen edim. Biraq sizler sózime qulaq salmadıńlar. Ne ushın bunday isledińler?
3
Jáne de, Men sizlerge: «Bul xalıqlardı sizlerdiń arańızdan quwıp shıǵarmayman. Olardıń ózleri sizlerge dushpan, al qudayları duzaq boladı», – dep aytqan edim.
4
Jaratqan Iyeniń perishtesi usı sózlerdi aytqanda, pútkil Izrail xalqı dad salıp jılay basladı.
5
Sonlıqtan olar sol jerdi Boxim dep atadı hám sol jerde Jaratqan Iyege arnap qurbanlıq shaldı.
6
Eshua xalıqtı tarqatıp jibergennen soń, olardıń hár qaysısı óz payına tiygen jerlerdi iyelep alıw ushın jolǵa shıqtı.
7
Eshuanıń tiri waqtında hám Jaratqan Iyeniń Izrail ushın islegen ullı islerin kórip, Eshuadan keyin ómir súrgen aqsaqallar dáwirinde, xalıq Jaratqan Iyege xızmet etti.
8
Jaratqan Iyeniń qulı Nun ulı Eshua bir júz on jasında qaytıs boldı.
9
Onı Efrayımnıń tawlı úlkesindegi Gaash tawınıń arqa tárepine, óziniń payına tiygen Timnat-Xeres degen jerge jerledi.
10
Bul áwladtan bolǵanlardıń hámmesi ólip, ata-babalarına qosılǵannan soń, Jaratqan Iyeni tanımaytuǵın hám Onıń Izrail xalqı ushın islegen islerin bilmeytuǵın basqa bir áwlad ósip jetisti.
11
Izrail xalqı Jaratqan Iyeniń názerinde jawız bolǵan islerdi islep, Baallarǵa tabına basladı.
12
Olar ózlerin Mısırdan alıp shıqqan ata-babalarınıń Qudayı Jaratqan Iyeden júz burıp, átiraptaǵı xalıqlardıń qudaylarına awıp ketti hám olarǵa tabındı. Bul Jaratqan Iyeniń qáhárin keltirdi.
13
Óytkeni olar Jaratqan Iyeden júz burıp, Baal hám Ashtarta butlarına tabına baslaǵan edi.
14
Sonlıqtan Jaratqan Iyeniń Izrail xalqına ǵázebi qaynap, olardı múliklerin tonaytuǵın basqınshılardıń qolına tapsırdı. Jaratqan Iye olardı átiraptaǵı dushpanlarǵa táslim etti. Solay etip, artıq olar dushpanlarına qarsı tura almadı.
15
Jaratqan Iyeniń aytqanınday hám ant ishkenindey, Izrail xalqı hár sapar sawashqa túskende, Jaratqan Iyeniń Ózi olarǵa qarsı boldı hám olar awır awhalda qaldı.
16
Sonda Jaratqan Iye olardı tonawshılardıń qolınan qutqaratuǵın biylerdi jiberdi.
17
Biraq olar biylerdi de tıńlamadı hám Jaratqan Iyege opasızlıq etip, basqa qudaylarǵa tabınıp ketti. Olar Jaratqan Iyeniń buyrıqların orınlaǵan ata-babaları sıyaqlı bolmay, ata-babaları júrgen joldan tez azǵırıldı.
18
Jaratqan Iye olar ushın bir biy tańlap shıǵarǵanda, Ol sol biy menen birge boldı hám sol biy jasaǵan waqıtta olardı dushpanlarınıń qolınan qutqaratuǵın edi. Sebebi olar eziwshilik hám zulım astında nala shekkende, Jaratqan Iyeniń olarǵa rehimi keletuǵın edi.
19
Degen menen, biyler óliwden-aq, olar ata-babalarınan da beter bolıp, jáne basqa qudaylardıń izine eretuǵın, olarǵa xızmet etip, tabınatuǵın edi. Olar islegen jaman is-háreketlerinen hám qaysarlıqtan waz keshpedi.
20
Solay etip, Jaratqan Iyeniń Izrailǵa ǵázebi qaynap, bılay dedi: «Bul xalıq Meniń ata-babalarına orınlań dep buyırǵan kelisimimdi buzıp, sózime qulaq salmadı.
21
Sonlıqtan endi Men de Eshua ólgende, usı jerlerde qalǵan xalıqlardıń hesh birin olardıń aldınan quwıp shıǵarmayman.
22
Ata-babaları sıyaqlı Jaratqan Iyeniń jolınan júretuǵının yamasa júrmeytuǵının kóriw ushın, olardı usı milletler arqalı sınayman».
23
Solay etip, Jaratqan Iye sol milletlerdi dárhal quwıp shıǵarmaǵan hám olardı Eshuaǵa táslim ettirmey, elde qalıwǵa ruxsat bergen edi.
← Chapter 1
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 3 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21