Lamentations 1

Институт перевода Библии, 2022

Jump to: Chapter 2 →

1Áttegene-ay! Bir waqıtları adamǵa tolı qala, Qalayınsha endi jalǵızlanıp qaldı! Milletler arasında ullı sanalǵan, Jesir hayalǵa uqsap qaldı. Wálayatlardıń xanımı bolǵan, Endi kúńge aylandı.

2Tún boyı ol zar jılaydı, Kóz jasları shekelerinen aǵadı. Barlıq oynasları arasında, Onı jubatatuǵını joq. Barlıq dosları satqınlıq etti, Onıń dushpanlarına aylandı.

3Yahuda apatshılıq hám awır qullıq astında, Súrgin qılıp alıp ketildi. Ol basqa milletler arasında jasap, Hesh tınıshlıq tappadı. Ol qısqıǵa ushıraǵanda, Quwǵın qılıwshılardıń qolına tústi.

4Sionǵa baratuǵın jollar aza tutpaqta, Sebebi belgilengen bayramlarǵa keletuǵın hesh kim joq. Barlıq dárwazaları húwlep qaldı, Ruwxaniyleri awır gúrsinbekte. Bul qalanıń qızları qayǵı-azap shekpekte, Qalanıń ózi de ǵamǵa batqan.

5Dushpanları basshı bolıp alǵan, Jawları bereket tappaqta. Qılmısınıń awırlıǵı sebepli, Jaratqan Iye bul azaptı Sionǵa jawdırdı. Balaları dushpannıń aldına salınıp, Tutqın qılıp alıp ketildi.

6Qız Sion óz sawlatın joyttı. Basshıları jaylaw tappaǵan suwın yańlı, Ańshıdan qashıwǵa mádarı qalmadı.

7Azap hám sergizdanlıq kúnlerinde, Erusalim burın iyelegen barlıq ǵáziynelerin eske aladı. Xalqı jaw qolına túskende, Oǵan járdem bergen bolmadı. Onıń qulaǵanın tamashalap, Dushpanlar ústinen kúldi.

8Erusalim awır gúna isledi, Sol sebepli haram boldı. Onı húrmet etkenler jalańashlıǵın kórip, Oǵan jek kóriwshilik penen qaradı. Endi bolsa ol gúrsinip, Hámmeden júzin jasırmaqta.

9Onıń jazıǵı awır edi, Biraq aqıbetin oylamadı. Ol jan túrshigerli tárizde quladı, Oǵan táselle beriwshi bolmadı. «O, Jaratqan Iye, awır awhalıma bir názer sal, Sebebi dushpan mennen ústin shıqtı!»

10Dushpan onıń eń qımbatlı zatlarına qol saldı, Basqa milletlerge Óz jıyınıńa kiriwdi qadaǵan qılǵan bolsań da, Erusalim olardıń Muxaddes mákanǵa kirgenin kórdi.

11Qalanıń pútkil xalqı nan izlep ah urmaqta, Júrek jalǵaw ushın, bar baylıǵın bermekte. «O, Jaratqan Iye, názer salıp, Qanday xorlanǵanımdı kór!

12Háy, joldan ótip baratırǵanlar! Sizlerge bári bir me? Awhalıma bir qarap kóriń, Men jolıqqan dárttey dárt bar ma? Jaratqan Iye ǵázebi lawlaǵan kúni, Bul dártti basıma tókti.

13Ol joqarıdan ot jiberip, Súyeklerimdi kúydirdi. Ayaqlarıma tor taslap, Meni artqa qaytardı. Meni wayran etip, Kún boyı haldan taydırdı.

14Gúnalarımnan maǵan moyıntırıq isledi, Iye olardı Óz qolları menen biriktirip baylap, Onı meniń moynıma asıp qoydı, Onıń menen kúshimdi hálsiretti. Meni ózim qarsı tura almaytuǵın, Dushpanlarımnıń qolına berdi.

15Iye mendegi barlıq batırlarımdı jerge urdı, Jigitlerimdi qırıw ushın maǵan qarsı láshker topladı. Iye pák qız Yahudanı, Júzim sıqqanday etip jenishti.

16Bular ushın eńireymen, Kózimnen jas sel bolıp aǵadı. Qasımda meni jubatıp, Janımdı jay taptırar hesh kim joq. Balalarım wayran boldı, Sebebi dushpan ústin keldi».

17Sion qolların sozadı, Biraq oǵan táselle beretuǵın joq. Yaqıpqa dushpan bolıwdı, Jaratqan Iye buyırdı qońsı xalıqlarǵa. Erusalim olardıń arasında haram nársege aylandı.

18«Awa, Jaratqan Iye ádil, Men Onıń buyrıǵına qarsı shıqtım. Háy barlıq xalıqlar, maǵan qulaq salıń, Meniń shegip atırǵan azabıma qarań. Jas qızlar menen jigitlerim súrgin qılındı.

19Men oynaslarımdı shaqırdım, Biraq olar meni sattı. Ruwxaniylerim menen aqsaqallarım, Jan saqlaw ushın azıq izlep júrip, Qala ishinde jan tapsırdı.

20Qara, Jaratqan Iye, qanday azap shegip atırman, Ishim janıp, júregim qaq ayırılmaqta, Sebebi Saǵan qarsı bas kóterdim. Sırtta qılısh balalarımnan ayırmaqta, Ishte ólim húkim súrmekte.

21Adamlar ahıw-nalamdı esitti, Biraq maǵan táselle beriwshi joq. Barlıq dushpanlarım apatshılıǵımnan xabar taptı, Maǵan islegenlerińnen shad boldı. Sen járiyalaǵan sol kúndi alıp kel, Olar da meniń awhalıma tússin.

22Pútkil jawızlıqları názerińnen qashpasın, Barlıq qılmıslarım ushın maǵan ne qılǵan bolsań, Olarǵa da sonı isle. Ahıw-nalam kóp, Júregimde mádarım qalmadı».

Jump to: Chapter 2 →