Nehemiah 12

Институт перевода Библии, 2022

← Chapter 11 Jump to: Chapter 13 →

1Shealtiel ulı Zerubbabel hám bas ruwxaniy Eshua menen birge súrginnen qaytıp kelgen ruwxaniyler menen lebiyliler mınalar edi: Ruwxaniyler: Seraya, Eremiya, Ezra,

2Amariya, Mallux, Xattush,

3Shekaniya, Rexum, Meremot,

4Iddo, Ginneton, Abiya,

5Minyamin, Moadiya, Bilga,

6Shemaya, Ioyarib, Edaya,

7Sallu, Amoq, Xilkiya, Edaya. Bular Eshuanıń dáwirinde ózleriniń izindegi barlıq ruwxaniylerge basshılıq etken edi.

8Lebiyliler: Eshua, Binnuy, Qadmiel, Sherebiya, Yahuda hám Mattaniya. Mattaniya óz tuwısqanları menen birge táriyiplew qosıqların alıp barıw isine juwapker edi.

9Al olardıń tuwısqanları Baqbuqıya menen Unniy xızmet waqtında olardıń qarsı aldında turatuǵın edi.

10Bas ruwxaniy bolǵan Eshua Ioyakimniń ákesi edi. Ioyakim Elyashibtiń ákesi, Elyashib Ioyadanıń ákesi,

11Ioyada Yuxanannıń ákesi, Yuxanan Yadduanıń ákesi edi.

12Bas ruwxaniy Ioyakim dáwirinde áwlad basshıları bolǵan ruwxaniyler mınalar edi: Seraya násilinen Meraya, Eremiya násilinen Xananiya,

13Ezra násilinen Meshullam, Amariya násilinen Ehoxanan,

14Mallux násilinen Ionatan, Shekaniya násilinen Yusup,

15Xarim násilinen Adna, Meremot násilinen Xelqay,

16Iddo násilinen Zexariya, Ginneton násilinen Meshullam,

17Abiya násilinen Zixriy, Minyamin násilinen bir basshı, Moadiya násilinen Piltay,

18Bilga násilinen Shammua, Shemaya násilinen Ehonatan,

19Ioyarib násilinen Mattenay, Edaya násilinen Uzziy,

20Sallu násilinen Qallay, Amoq násilinen Eber,

21Xilkiya násilinen Xashabiya, Edaya násilinen Netanel.

22Bas ruwxaniyler bolǵan Elyashib, Ioyada, Yuxanan hám Yadduanıń waqtında, Persiya patshası Dariydiń húkimdarlıǵı dáwirinde, lebiyli áwlad basshılarınıń hám ruwxaniylerdiń dizimi jazıp qoyıldı.

23Elyashib ulı Yuxanannıń zamanına deyingi lebiyli áwlad basshılarınıń dizimi jılnama kitabına jazıldı.

24Lebiyli basshılardan Xashabiya, Sherebiya hám Qadmiel ulı Eshua bir tárepte, olardıń tuwısqanları qarsı tárepte turıp, Qudaydıń adamı bolǵan Dawıttıń kórsetpesine muwapıq, gezekpe-gezek alǵıs-maqtaw hám táriyiplew qosıqların aytatuǵın edi.

25Mattaniya, Baqbuqıya, Obadiya, Meshullam, Talmon hám Aqqub náwbet penen dárwaza qarawılları bolıp, Ibadatxana dárwazasınıń ishindegi zatlar saqlanatuǵın bólmelerdi qarawıllaytuǵın edi.

26Olar Iosadaqtıń aqlıǵı, Eshuanıń ulı Ioyakim, hákim Nexemiya, ulama hám ruwxaniy Ezra jasaǵan dáwirde xızmet etti.

27Erusalimniń jańa diywallarınıń pitkenine arnap rásim ótkergende, táriyiplew qosıqların aytıp, kimbal, arfa hám liralar shertip, onı quwanıshlı túrde ótkeriw ushın, hámme jerde jasap atırǵan lebiyliler Erusalimge shaqırtıldı.

28Qosıqshılar Erusalimniń átirapındaǵı úlkelerden, netofalılardıń awıllarınan,

29Beyt-Gilgaldan hám Geba menen Azmawet jerlerinen keldi. Sebebi qosıqshılar Erusalim átirapınan ózleri ushın awıllar qurıp alǵan edi.

30Ruwxaniyler menen lebiyliler dáslep ózlerin páklew rásiminen ótkerdi, sońınan xalıqtı, dárwazalardı hám diywaldı pákledi.

31Sonda men Yahuda basshıların diywaldıń ústine shıǵardım hám táriyiplew qosıqların aytatuǵın úlken eki topardı tayınladım. Olardıń birewi diywaldıń oń tárepi boylap, Tezek dárwazasına qaray júrdi.

32Olardıń izinen Hoshaya hám Yahuda basshılarınıń yarımı,

33Azariya, Ezra, Meshullam,

34Yahuda, Benyamin, Shemaya, Eremiya,

35hám kárnay shertken bir neshe ruwxaniyler júrdi. Olardan biri Ionatan ulı Zexariya bolıp, Ionatan Shemaya ulı, Shemaya Mattaniya ulı, Mattaniya Mixaya ulı, Mixaya Zakkur ulı, Zakkur Asaf ulı edi.

36Zexariyanıń tuwısqanları Shemaya, Azarel, Milalay, Gilalay, Maay, Netanel, Yahuda hám Xananiy Qudaydıń adamı bolǵan Dawıttıń saz ásbaplarına uqsaǵan ásbaplardı shertip júrdi. Olardıń aldında ulama Ezra júrdi.

37Olar Bulaq dárwazasınan ótip, Dawıttıń qalasınıń diywalına qaray kóteriletuǵın teksheler arqalı Dawıttıń sarayınıń ústingi tárepinen kesip ótip, shıǵıs táreptegi Suw dárwazasına qaray ketti.

38Táriyiplew qosıqların aytatuǵın ekinshi topar diywaldıń ústi boylap, shep tárepke qaray júrdi. Men de xalıqtıń yarımı menen birge olardıń izine erdim. Bizler Tandırlar minarasınan ótip, Keń diywalǵa qaray júrdik.

39Efrayım dárwazasın, Eshana dárwazasın, Balıq dárwazasın, Xananel minarasın, Júzlik minarasın hám Qoy dárwazasın basıp ótip, Saqshılar dárwazasına kelip toqtadıq.

40Keyin táriyiplew qosıqların aytatuǵın eki topar Qudaydıń Úyindegi ózleriniń ornında turdı. Men de, meniń janımda bolǵan basshılardıń yarımı da sol jerde turdı.

41Ruwxaniyler: Elyakim, Maaseya, Minyamin, Mixaya, Elyoenay, Zexariya, Xananiya janımda kárnay shertip júrdi.

42Jáne de, Maaseya, Shemaya, Elazar, Uzziy, Ehoxanan, Malkiya, Elam hám Ezer de bar edi. Qosıqshılar Izraxiyanıń basshılıǵında baqırıp qosıq ayttı.

43Sol kúni kóp qurbanlıqlar berildi. Xalıq shadlıqqa bólendi, sebebi Quday olarǵa úlken quwanısh sıylaǵan edi. Hayallar da, balalar da shadlıqqa bólendi, Erusalimniń shadlıǵı uzaq-uzaqlarǵa esitilip turdı.

44Sol kúni berilgen sadaqalar, dáslepki ónimler hám hámme zattıń onnan biri saqlanatuǵın bólmeler ústinen juwapker adamlar xızmetke qoyıldı. Hámme yahudalılardıń ruwxaniyler menen lebiylilerdiń xızmetinen kewli toq bolǵanlıqtan, Nızam boyınsha qalalardıń átirapındaǵı egislik jerlerden jıynalatuǵın, ruwxaniyler menen lebiylilerge arnalǵan úlesler usı bólmelerge alıp kelindi.

45Ruwxaniyler menen lebiyliler ózleriniń Qudayınıń xızmetin hám páklew xızmetin alıp bardı. Qosıqshılar menen dárwaza qarawılları da Dawıttıń hám onıń ulı Sulaymannıń kórsetpesi boyınsha óz xızmetlerin atqardı.

46Óytkeni burınnan Dawıt penen Asaftıń dáwirinde qosıqshılarǵa jetekshi qoyılǵan bolıp, Qudayǵa arnap alǵıs-maqtaw hám táriyiplew qosıqların aytatuǵın edi.

47Zerubbabeldiń hám Nexemiyanıń zamanında pútkil Izrail xalqı qosıqshılar menen qarawıllardı kúndelikli azıq-awqat penen támiyinlep turdı. Xalıq lebiylilerge óz úleslerin ayırıp berdi, lebiyliler de Xaron urpaqlarına, yaǵnıy ruwxaniylerge tiyislisin ajıratıp berdi.

← Chapter 11 Jump to: Chapter 13 →