Titus 1

Институт перевода Библии, 2022

Jump to: Chapter 2 →

1Qudaydıń qulı hám Iysa Masiyxtıń elshisi bolǵan men, Pavelden, Titusqa sálem! Men Qudaydıń tańlaǵan adamlarınıń isenimin bekkemlew ushın hám ózlerin Qudaydıń jolı menen alıp júretuǵın haqıyqatlıqtı olardıń biliwi ushın tayınlandım.

2Usı isenim hám haqıyqatlıqtı biliw ótirik sóylemeytuǵın Qudaydıń dúnya jaratılmastan burın wáde etken máńgilik ómirin alıw úmitine tiykarlanǵan.

3Waqtı kelgende, Quday járiyalaw arqalı Óz sózin ashıp berdi. Al men usı sózdi járiyalaw ushın Qutqarıwshımız Qudaydıń buyrıǵı menen tapsırma aldım.

4Ortaq isenimimiz boyınsha haqıyqıy ulım bolǵan Titusqa Ákemiz Quday hám Qutqarıwshımız Iysa Masiyx miyrim hám tınıshlıq bersin!

5Juwmaqlanbay qalǵan islerdi tártiplestirip, meniń saǵan buyırǵanımday, hár bir qalada jámáát aqsaqalların tayınlawıń ushın, seni Kritte qaldırǵan edim.

6Aqsaqal bolıp tayınlanatuǵın adam ayıpsız, tek bir hayallı bolsın. Onıń balaları da iseniwshi bolıp, ádepsiz hám tárbiya kórmegen, dep ayıplanbawı tiyis.

7Sebebi jámáát jetekshisi Qudaydıń xızmetshisi sıpatında kemshiliksiz bolıwı kerek. Ol qaysar, qızba, máskúnemlikke berilgen, jánjelkesh, haram paydanı gózleytuǵın bolmawı tiyis.

8Kerisinshe, ol miymandos, jaqsılıqtı súyiwshi, saldamlı, haq, muxaddes hám ózin tutıp biletuǵın bolıwı kerek.

9Jáne de, jámáát jetekshisi basqalardı durıs tálimat penen jigerlendiriwi ushın hám haqıyqatqa qarsı shıqqanlardı áshkaralawı ushın, iseniwshilerge úyretilgen haqıyqat sózi boyınsha is tutıwı tiyis.

10Óytkeni haqıyqatqa boysınbaytuǵın, pátiwasız hám ótirikshi kóp adamlar bar. Onday adamlar ásirese yahudiy toparları arasında kóp.

11Bunday adamlardıń awzın jawıw kerek. Olar óz haram nápsi ushın, úyretiwge bolmaytuǵın nárselerdi úyretip, barlıq xojalıqlardı buzıp júr.

12Hátte, kritlilerdiń óz danıshpanı: «Kritliler bárqulla ótirikshiler, jawız haywanlar hám jalqaw ashkózler bolǵan», – degen edi.

13Bul gúwalıq – haqıyqat. Sonlıqtan isenimde bekkem turıwı ushın, olardı qatań eskertip qoy

14hám olardı yahudiylerdiń mánissiz ańızlarına, haqıyqattan adasqan adamlardıń buyrıqlarına qulaq astırma.

15Pák adamlar ushın hámme nárse pák. Biraq, napák adamlar menen isenbeytuǵın adamlar ushın hesh bir nárse pák emes. Sebebi olardıń aqıl-oyları da, hújdanı da iplaslanǵan.

16Qudaydı bilemiz dese de, islegen isleri menen Onnan tanadı. Olar – jerkenishli, Qudaydıń sózine qulaq aspaytuǵın hám hár qanday jaqsı iske jaramsız adamlar.

Jump to: Chapter 2 →