Titus 2

Институт перевода Библии, 2022

← Chapter 1 Jump to: Chapter 3 →

1Al saǵan kelsek, sen durıs tálimat boyınsha tálim ber.

2Úlken jastaǵı er adamlarǵa saldamlı hám húrmetke miyasar bolıwdı, ózlerin tutıp biliwdi, isenimde, súyispenshilikte hám sabırlılıqta bekkem bolıwdı úyret.

3Sol sıyaqlı, úlken jastaǵı hayallarǵa da húrmetke ılayıqlı ómir súriwdi, ósekshi hám sharaptıń qulı bolmawdı, al jaqsılıqtı úyretiwshi bolıwı kerekligin úyret.

4Sonda úlken jastaǵı hayallar jas hayallarǵa aqıl-násiyat bere aladı. Qudaydıń sózine til tiymewi ushın, olar jas hayallarǵa kúyewlerin hám balaların súyiwdi, ózlerin tutıp biliwdi, pák, xojalıqqa jankúyer, miyrimli bolıwdı hám kúyewlerine boysınıwdı úyrete aladı.

6Jas er adamlarǵa da ózlerin tıyıp biliwdi násiyat et.

7Jaqsı isler islep, olarǵa hár bir nársede órnek bol. Tálim bergenińde hadal hám saldamlı bolıp,

8hesh kim ayıplay almaytuǵın durıs sózlerdi sóyle. Solay etip, saǵan qarsı shıqqanlar bizler tuwralı hesh jaman nárse ayta almaǵanlıqtan uyalıp qaladı.

9Qullarǵa xojayınlarına hár bir nársede boysınıp, olardıń kewlinen shıǵıwdı, qaytarıp sóylemey

10hám urlıq islemey, tolıq sadıqlıq kórsetiwdi úyret. Sonda olar Qutqarıwshımız Qudaydıń tálimatına hár tárepleme jaqsı at keltiredi.

11Óytkeni Qudaydıń qutqaratuǵın miyrimi pútkil adamlarǵa ashıq kórindi.

12Bul miyrim bizlerge qudaysızlıqtan hám dúnyanıń jaman háweslerinen waz keship, házirgi dáwirde ózlerimizdi tıyıp biliwdi, haq bolıwdı hám Qudaydıń jolına ılayıqlı ómir súriwdi úyretedi.

13Jáne de, ol bizlerge házirshe, múbárek úmitimizdiń, yaǵnıy ullı Qudayımız hám Qutqarıwshımız bolǵan Iysa Masiyxtıń saltanat penen keliwin kúttiredi.

14Ol qun tólep bizlerdi hár bir nızamsız islerimizden azat etiw ushın hám jaqsılıq islewge intalı, ayrıqsha bir xalıqtı Ózine tazalap alıw ushın Óz janın baǵıshladı.

15Usılardı tolıq biylik penen úyretip, jigerlendir hám keyi. Ózińdi hesh kimge kemsittirme.

← Chapter 1 Jump to: Chapter 3 →