Genesis 37

Jinghpaw Common Language Bible © Bible Society of Myanmar, 2009

← Chapter 36 Jump to: Chapter 38 →

1Yaku gaw shi a kawa nga ai Hkanan mung hta matut nna nga nga wu ai.

2Da ndai gaw Yaku a dinghku ginru ginsa lam rai nga ai. Yosep gaw asak 17 ning re ai shabrang ma rai nna, shi a kahpu ni hte mung, shi a kawa a lashi num ni rai nga ai Bila hte Zilhpa yan a shadang sha ni hte mung sagu bainam ni rem wu ai.

3Yaku mahtang shi asak kaba sayang she Yosep shangai wa wu ai majaw, shi a kasha kaga ni yawng hta shi hpe grau tsaw ra wu ai. Dai rai nna tsawm htap ai hte mawn sumli da ai palawng lawng ta galu langai mi chywi ya wu ai.

4Shanhte a kawa shanhte hpe tsaw ra ai hta Yosep hpe mahtang grau nna tsaw ra ai hpe mu ma yang, shanhte gaw shanhte a kanau hpe grai wa n dawng nga ma ai hte shi hpe hku lahkun re ai lai hte n kam hkap shaga ma ai.

5Yosep gaw kalang mi na aten hta yup mang mu nna shi a kahpu ni hpe dai lam hkai dan wu ai. Shanhte gaw shi hpe grau nna n ju nga ma ai.

6Shi gaw, “Ngai mu ai yup mang hpe madat yu mu.

7Anhte yawng sun e hkaulan mam hkauling ni hpe gyit nga ga yang, nye a hkauling mahtang jan rai rawt tsap nga ai. Nanhte a hkauling ni chyawm gaw grup wan rai nna nye a hkauling hpe gum dagup nga ma ai,” ngu nna tsun wu ai.

8Shi a kahpu ni gaw, “Nang gaw hkawhkam tai wa nna anhte hpe up hkang lu na zawn myit nawn nga n ni?,” ngu nna san mu ai. Dai rai nna shi a yup mang hte shanhte hpe tsun ai shi a ga ni a majaw shanhte shi hpe grau nna n ju n dawng nga ma ai.

9Dai hpang Yosep gaw yup mang kaga hpe mung bai mu nna shi a kahpu ni hpe, “Yup mang kaga mung ngai mu se ai; jan shata hte shagan shi langai, ngai hpe nawku dingnyawm ai hpe ngai mu nngai,” ngu nna tsun wu ai.

10Shi gaw shi a kawa hpe mung dai yup mang tsun dan wu ai rai nna shi a kawa mung shi hpe, “Dai yup mang gaw hpa wa rai nga lit ta? Ngai hte na nnu, na nhpu ni nang kaw sa nna nawku dingnyawm na rai nga ga ai ngu, nang myit nawn da wu ni?,” ngu nna shi hpe daru kau wu ai.

11Yosep a kahpu ni gaw shi hpe yu manawn da mu tim, shi a kawa chyawm gaw dai lam mahkra hpe amyit yu nga wu ai.

12Lani mi na nhtoi hta Yosep a kahpu ni gaw shanhte a kawa a sagu bainam hpung ni hpe rem na matu, Shehkem de sa mat wa ma ai.

13Yaku gaw Yosep hpe, “Na a nhpu ni sagu bainam rem ai Shehkem de sa na ngai ra nga nngai,” ngu nna tsun wu ai. Yosep mung, “Ngai jin jin rai nga nngai,” ngu nna htan wu ai.

14Shi a kawa mahtang, “Na a nhpu ni shim lum nga ai hpe mung, sagu hpung ni kaja nga ai hpe mung sa yu su, shing rai bai wa nna ngai hpe tsun dan e,” ngu nna tsun wu ai. Shi a kawa mung shi hpe Hebron Kadit kaw nna shangun dat wu ai.

15Yosep gaw Shehkem de du nhtawm dai shara de shi kayin hkawm yang, masha langai mi shi hpe mu nna, “Nang hpa baw tam nga n ta?,” ngu nna san wu ai.

16Shi gaw, “Sagu bainam ni hpe rem hkawm nga ai nye hpu ni hpe tam hkawm nngai; shanhte kanang hkan nga hkawm nga ai lam ngai hpe nang tsun dan lu na n ni?,” ngu nna htan wu ai.

17Dai masha wa mung, “Shanhte pru mat wa masai. Shanhte gaw Dohtan de sa wa na ga ai, nga nna shanhte tsun hkat ai hpe ngai na nngai,” ngu nna tsun dan wu ai. Dai rai nna, Yosep mung shi a kahpu ni hpang de hkan mat wa nhtawm Dohtan e shanhte hpe sa mu wu ai.

18Shi tsan tsan e naw rai nga yang, shanhte shi hpe mu nna, shanhte kaw garai n du yang, shi hpe lagu sat kau na myit daw dan da mu ai.

19Shanhte langai hte langai mung, “Yu mu, ndai yang e, yup mang mu ai wa du ra ai.

20Sa rit, ya chyawm gaw shi hpe sat kau nna, hkun hkraw ai hka htung langai ngai hta shi hpe kabai bang da gaw; matse labye dusat langai ngai mahtang shi hpe kawa sat kau nu ai, ngu nna anhte lu tsun na ga ai. Dai hpang shi a yup mang ni hpa tai na nu ai gaw, anhte mada yu ga,” ngu nna tsun hkat ma ai.

21Rubin gaw shanhte tsun hkat ai ga hpe na kau wu ai rai nna, Yosep hpe hkye la na shakut wu ai. Shi gaw, “Anhte shi hpe n sat ga, nam na ndai hka htung kata de mahtang shi hpe kabai bang da ga;

22rai ti mung, shi hpe chyawm gaw n machyi shangun ga,” ngu nna tsun wu ai. Shing ngu shi tsun ai gaw, Yosep hpe shanhte a lata kaw na hkye la nhtawm shi a kawa hpang de bai wa sa ya na matu maw mawn ai lam rai nga ai.

23Ya Yosep kahpu ni kaw du jang, shanhte gaw tsawm htap ai arai hte mawn sumli da ai shi a palawng ta galu hpe gang raw kau ya mu ai.

24Dai hpang shi hpe woi mat wa nna hkun hkraw ai hka htung kata de shi hpe kabai bang da mu ai.

25Shanhte shat sha nga ma yang, Gilead mung kaw nna Egutu mung de bu hkawm sa wa ai Ishmaela masha wuhpung ni hpe shanhte akajawng mu dat ma ai. Shanhte a gawla-uk ni hta manam pyaw ai namji namya, hpun naw hte mura ni hpe htaw nga ma ai.

26Yuda chyawm gaw shi a kahpu ni hpe, “Anhte a kanau wa hpe sat kau nna dai sai kap ai amu hpe magap da ai rai yang, anhte hta hpa akyu hkam la lu na rai nga ga ta?

27Shi hpe mahtang ndai Ishmaela masha ni a lata de dut kau dat ga; shaloi anhte shi hpe hpa mung n machyi shangun ra nga ga ai; hpang jahtum dik dik tsun ga nga yang, shi gaw anhte a kanau rai nna anhte a ashan hte asai majing nan rai nga ai,” ngu nna tsun wu ai. Shi a kahpu kanau ni mung dai lam hpe myit hkrum ya mu ai.

28Midian hpaga masha nkau mi lai sa wa nga yang, kahpu kanau ni mung dai hka htung kata na gang shaw shapraw nhtawm Ishmaela masha ni hpe gumhpraw hkun hte dut kau dat ya mu ai. Shanhte mung shi hpe woi nna Egutu mung de woi mat wa ma ai.

29Rubin dai hka htung de bai wa yu wu yang, dai shara hta Yosep n nga sai hpe mu wu ai; shi gaw yawn hkyen ai hte shi a palawng ni hpe gang je kau wu ai.

30Shi gaw shi a kanau ni hpang de bai nhtang wa nhtawm, “Dai ma n nga sai! Ngai kaning di na rai nga a ta?,” ngu nna tsun wu ai.

31Dai hpang bainam langai mi hpe shanhte sat nna, Yosep a palawng hpe de a asai hta kapruk bang mu ai.

32Shanhte gaw dai palawng hpe shanhte a kawa hpang de la wa nhtawm, “Ndai hpe anhte mu ga ai; na nsha a palawng wa n rai a ni?,” ngu nna tsun mu ai.

33Kawa mung dai hpe shi matsing da wu ai rai nna, “Rai sa, dai gaw shi a rai nga lu ai! Matse labye dusat lama mi e shi hpe kawa sat kau nu ai. Nye a kasha Yosep gaw kahtum kadaw rai mat hkra ashep ashin gang je kau hkrum nga sahka!,” ngu nna tsun wu ai.

34Yaku gaw yawn hkyen ai hte shi a hpun palawng ni hpe gang je kau nhtawm lachyit nba lawai da wu ai. Shi gaw shing rai hkrum hkra sai kasha a matu nhtoi na na wa sharung shayawt nga wu ai.

35Shi a shadang sha ni hte shayi sha ni yawng mung shi hpe shalan shabran na nga, rawt sa wa ma timung, shi chyawm gaw shalan shabran hkrum na hpe n kam hkam la wu ai rai nna, “Ngai gaw nye kasha a matu sharung shayawt ai hte katsan ga de yu mat wa na ni ai,” ngu nna tsun wu ai. Dai rai nna shi a kasha Yosep a matu matut nna sharung shayawt nga wu ai.

36Dai aten hta Midian masha ni gaw Yosep hpe Egutu mung na hkawhkam wa a du salang rai nga ai hkaw wang na sin langa ni a du Hputihpa hpe dut ya kau mu ai.

← Chapter 36 Jump to: Chapter 38 →