Genesis 49

Jinghpaw Common Language Bible © Bible Society of Myanmar, 2009

← Chapter 48 Jump to: Chapter 50 →

1Yaku gaw shi a shadang sha ni hpe shaga la nna, “Nang e grup rai wa hpawng yu mu; du na ra ai aten nanhte hta hpa byin wa na lam, ngai nanhte hpe tsun dan made ga:

2“Yaku a shadang sha ni e, rau wa hpawng nna madat la mu. Nanhte a kawa Israela a ga hpe madat la mu.

3“Nye a kasha alat Rubin e, nang gaw nye a n-gun hte Nye a ram prat na ma ningshawng rai nna, Nye a shadang sha ni yawng hta arawng kaba htum ai hte n-gun ja htum ai wa rai nga ndai.

4Nang gaw mawru hka zawn kabrawng nga ndai, Rai ti mung nang gaw ahkyak htum ai wa n rai nga ndai, Nang gaw nye a lashi num hte yup nit dai majaw, Na nwa a yup ku hpe sari jahpoi kau ya nga ndai.

5“Simun yan Lewi shan nau rai ma ai. Shan gaw kashun kashe du daw sai hkaw amu shabyin ai laknak ni lang ma ai.

6Ngai gaw shan a mayun bawng ban ai hta shang lawm na n rai, Shan a zuphpawng ni hta shang lawm na n rai, Shan gaw masin kahtet ai a majaw masha sat manu ai. Ginsup chyai na matu dumsu usu lahkap dan masai.

7Shan a sindawng kahtet ai gaw grai laja nga ai majaw dagam dala hkrum nga ma ai, Shan a masin kahtet ai majaw dai gaw grai mazut nga ai. Ngai gaw shan hpe Israela mungdan ting de shabra kau na mawe ai; Ngai gaw shan hpe amyu masha ni hta na shabra kau na mawe ai.

8“Yuda e, na a kahpu kanau ni nang hpe shakawn na mara ai. Na a gumlau hpyen ni a du hpe nang manat nga ndai. Na a nhpu nnau ni na a man e gum dagup na mara ai.

9Yuda gaw nam shan hpe kawa sat nna shi a lungpu de nhtang wa nhtawm Galeng gumkan nga ai hkanghkyi hte bung nga ai. Kadai mung shi hpe shatu gwi na n rai.

10Yuda gaw hkawhkam sumdoi lang lu na ra ai, Shi a amyu matu ni tut nawng a up nga na mara ai. Amyu baw ni shi hpe shagrau kumhpa jaw ai hte Shi a man e madat mara let gum dagup na mara ai.

11Shi a lawze uram hpe kaja htum ai sabyi ru ni hte sabyi hpun ni hta dun da let, Sai zawn hkyeng ai sabyi ntsin hta Shi a hpun palawng ni hkrut wu ai.

12Shi a myi gaw lu ai sabyi ntsin hte hkyeng nga ai; Shi a awa mung lu ai ngachyu hte hpraw nga ai.

13“Zebulun gaw panglai makau e nga na ra ai. Shi a hka kau gaw sanghpaw li ni a matu daru tai na ra ai. Shi a lamu ga jarit mung Sidon du hkra maden na ra ai.

14“Yisahka gaw lit mara ai daw hking ni a lapran hta Lit li nna n lu rawt tsap ai lawze hta pyi grau kaja nga ai n rai.

15Rai ti mung sa ra shara kaja nga ai rai nna Lamu ga mung yu sharawng hpa rai nga ai hpe shi mu mada wu ai. Dai rai nna lit gun na matu shi a shingma hpe shi gum ya nna; Mayam langai mi zawn bungli galaw shadut hkrum nga ai.

16“Dan gaw shi a amyu masha ni hpe up hkang ai wa tai nna, Shanhte mung kaga Israela amyu bawsang ni zawn tai na mara ai.

17Dan gaw nmaw lam makau e hpum nga ai lapu, Lam masun makau na atuk rawng ai lapu zawn tai nna Gumra lahtin achye na ra ai; Gumra jawn ai wa gaw hpang de kadawng mat nga ai.

18“ Madu e, ngai gaw na a hkye hkrang la ai lam hpe ala nga nngai.

19“Gad gaw damya hpung mi htim gasat ai hkrum na ra ai; Rai ti mung shi shanhte hpe kayin htim nna shachyut kau na ra ai.

20“Ashe a lamu ga gaw dwi sau mu mai ai lusha hpe shapraw ya nna; Hkawhkam wa a matu lusha shi jaw na ra ai.

21“Naphtali gaw dat da ai shan nga rai nna Yu tsawm ai shan nga kasha ni hpe shangai ya nga ai.

22“Yosep gaw hka hpawk makau e nga ai lawze shazai hte Kawng nhkrem hkan hkawm nga ai gumra kasha shazai hte bung nga ai.

23Shi a gumlau hpyen ni grai gumshem ai hku shi hpe htim gasat nhtawm, Shanhte a ndan pala ni hte shi hpe hkan shachyut ma ai.

24Rai ti mung Chyahtum Chyalai N-gun rawng ai Yaku a Karai Kasang a daru magam n-gun hte, Sagu rem wa ngu ai Israela hpe makawp maga ai wa a majaw mung, Shi a ndan dingyang kaja nna, Shi a lahpum ni mung n-gun hte hpring nga ai.

25Dai gaw nang hpe karum ai na nwa a Karai Kasang rai nna, Sumsing lamu na shaman ai chyeju marang hte mung, Ga kata na sung ai hka a majaw mung, Yam nga hte kashu kasha law law mayat maya shangun ai shaman chyeju ni a majaw mung,

26Nsi naisi hte nampu nampan ni hpe jaw ya ai shaman chyeju ni a majaw mung, Moi moi na bum ni hpe shagrin da ai shaman chyeju ni a majaw mung, Htani htana agrin nga ai kawng ni kaw na ra sharawng ai arung arai ni hpe hkam la shangun ai shaman chyeju ni a majaw mung, Chyahtum Chyalai N-gun Rawng Ai Karai Kasang gaw nang hpe shaman ya u ga law. Dai shaman chyeju ni gaw Yosep a baw ntsa e mung, Shi a kahpu kanau ni hte hka mat wa ai wa a kahtan ntsa e mung anga nga u ga law.

27“Benyamin gaw matse ai chyahkyawn langai hte bung nga ai. Shi gaw jahpawt shana ashan amya sat nna mayu sha nga ai.”

28Ndai hte gaw Israela amyu bawsang shi lahkawng rai nga ma ai; ga ndai gaw shadang sha shagu lu la ang ai hte maren shanhte a kawa tsun da ai shaman ga rai nga ai.

29Dai hpang Yaku gaw shi a shadang sha ni hpe, “Ya chyawm gaw ngai si wa na ni ai rai nna, nye a amyu masha ni hpawng nga ai de wa na ni ai. Hkanan mung Mamre a sinpraw maga na Makhpela pa hta nga ai dai Heti masha Ehpron a sun na ginlawng hku hta nye a kawa ni hte rau ngai hpe lup makoi da mi. Dai ginlawng hku hpe Abraham gaw lup wa shatai na matu Ehpron a sun hpe mari da nga ai.

31Dai shara hta Abraham hte shi a madu jan Sara hpe shanhte lup makoi da manu ai; dai shara hta Isak hte shi a madu jan Rebeka hpe lup makoi da manu ai; dai hta e Lea hpe mung ngai lup makoi da se ai.

32Dai sun hte dai hta nga ai ginlawng hku hpe Heti masha ni kaw na mari da ai rai nga ai. Dai yang e, ngai hpe lup makoi da mi,” ngu nna htet da wu ai.

33Yaku gaw shi a shadang sha ni hpe numhtet ga tsun matsun ngut jang, shi bai galeng dat ai hte nsa hti mat salu ai. Shi a amyu hpawng nga ai de du mat wa nga ai.

← Chapter 48 Jump to: Chapter 50 →