Jeremiah 43

Jinghpaw Common Language Bible © Bible Society of Myanmar, 2009

← Chapter 42 Jump to: Chapter 44 →

1Dai Madu shanhte a Karai Kasang gaw shanhte hpe htawn tsun na matu ngai hpe shangun dat ai hte maren, ngai gaw dai amyu masha ni hpe ra ai lam magup tsun dan ngut ni ai.

2Dai hpang, Hoshaia a kasha Azaria, Karea a kasha Yohanan hte myit kaba ai kaga masha ni yawng hte gaw ngai hpe, “Nang masu nga ndai, dai Madu anhte a Karai Kasang gaw Egutu mung de n sa shanu nga mu ga nga, anhte hpe tsun na matu nang hpe shangun dat ai n rai.

3Babelon mung masha ni gaw anhte a ntsa e daru magam n-gun bai rawng wa ai hte anhte hpe sat kau na shing n rai Babelon mung de woi wa na matu Neria a kasha Baruk gaw anhte hpe gumlau na matu nang hpe kasu kabrawng dat nu ai,” ngu nna tsun ma ai.

4Dai rai nna, Yohanan mung, hpyen du ni kadai mung, amyu masha ni kadai mung Yuda mung hta ngam nga na matu tsun ai dai Madu a ga hpe n madat nga ma ai.

5Dai hpang, Yohanan hte luksuk ni a hpyen du ni yawng hte gaw Yuda mung hta ngam nga ai masha shagu hte rau Yuda mung hta bai shanu nga na matu shabra kau dat ai masha amyu baw ni kaw na nhtang wa ai

6lasha, numsha, ma kaji ni hte hkawhkam shayi sha ni hpe woi gahkyin la nna Egutu mung de woi sa mat wa ma ai. Shanhte gaw Yuda mung du Gedalia a lata hta hpyen du Nebuzaradan ap ya ai mung masha mahkra hte hpawn Baruk hte ngai mung lawm rai nna woi mat wa ma ai.

7Shanhte gaw dai Madu a hkang da ai ga hpe n madat ai sha Egutu mung Tahpan mare du hkra sa nga nga ma ai.

8Dai yang e, dai Madu gaw ngai hpe,

9“Nlung kaba mi la nhtawm ndai mare hta nga ai mung up rap daw htingnu de shang wa ai chyinghka lam a man e, wut hte nyep da ai lam hta dai ni hpe lup bang da u, Israela amyu masha nkau mi mung dai nang galaw ai amu hpe mu la mu ga.

10Dai hpang, Chyahtum Chyalai N-gun Rawng ai dai Madu Israela a Karai Kasang ngai nan nye a shangun ma rai nga ai Babelon Hkawhkam Nebuhkadneza hpe ndai shara de shaga la nngai. Shi gaw shi a tingnyang hpe nang lup bang da ai nlung ni a ntsa e shadun da nhtawm shi a hkawhkam sum hpe dai nlung ni a ntsa e hpyan tawn da na ra ai.

11Nebuhkadneza gaw Egutu mung de yu sa nna gasat dang kau na ra ai. Ana zinli hte si ari hkrum ang ai ni gaw bawng dung hkrum nna hpyen majan hta sat kau hkrum na ari lu ai ni mung hpyen majan hta sat kau ai hkrum na mara ai.

12Ngai gaw Egutu hpara ni hpe nat kau na nngai; Babelon hkawhkam wa mung shanhte a hpara ni hpe nat kau nna dai hpara ni hpe hpai kau na ra ai. Sagu rem wa gaw tsi shakrat jasan kau ai shi a hpun palawng ni hpe hta la ai zawn, Babelon hkawhkam wa mung Egutu mung hpe hta jasan da nhtawm awng dang ai hte pru mat wa na ra ai.

13Shi gaw Egutu mung Heliopoli mare hta nga ai chyoi pra ai nlung shadaw ni hpe jahten kau nna Egutu hpara ni a nta ni hpe nat kau na ra ai,” ngu nna tsun ai.

← Chapter 42 Jump to: Chapter 44 →